ପୁନାଦ୍ ଆର୍ର୍
୧ ପିତର୍ 4
ବାଦ୍ଲେମ୍ ଆତ୍ତେ ଜିୱୁଣ୍ଡ୍
କ୍ରିଷ୍ଟ ନିଜେତ୍ ମେନ୍ଦୁଲ୍ତେ ମାନ୍ଦାନ୍ ୱେଲେ କଷ୍ଟ ମାଡ଼୍ତାଙ୍କ୍, ମିଡ଼୍ ମିକା ଅନ୍ ଲେକାମ୍ ମନ୍ ମାଡ଼ି ନିଶ୍ଚିତ୍ ଆୟମୁଟ୍ ଯେ, ବେନ୍ ନାରୁଣ୍ଡ୍ ଜିୱୁନ୍ ମେନ୍ଦୁଲ୍ତେ ତିପାଲ୍ ଆଦ୍ତନ୍, ଅଣ୍ଡ୍ ମେଣ୍ଡେ ପାପାମ୍ତାଗ୍ ମୁଡ଼ୁନ୍ଦି ମାନଣ୍ଡ୍ । ମୀଇଡ଼୍ ଇଞ୍ଜେକଞ୍ଜ୍ ଜିୱୁଣ୍ଡ୍ତାଗ୍ ମାନ୍ଦାନ୍ ବେସ୍କ୍ ଦିନା ଲୋପେ ନିଜେତ୍ ମେନ୍ଦୁଲ୍ ଅବିଲାଷତେ ଜିୱୁଣ୍ଡ୍ ବାଦ୍କ ଆୟକଟ୍ ଇଶ୍ୱର୍ତେ ଇଚ୍ଛାଦିନାମ୍ ଆୟ୍ମୁଟ୍ । ମୁନେଙ୍କ୍ ମିଡ଼୍ ଅଣଯିହୁଦୀଡ଼୍ ଲେକାମ୍ କାମ୍ ମାଡ଼ି ନାର୍ଗେ ସମୟ କାଟେମ୍ ଆତ୍ତିଡ଼୍ । ମିୟାଦ୍ ଜିୱେ ସାର୍ରେ କାରାପ୍ ପାଡ଼୍ୟି, କାମୁକତା, କାଲ୍ଉନ୍ଦାନ୍, ଲାଲସା, ମାତାଲ୍ ନୁ ପାସ୍କାନ୍ ପୁତ୍ଲାମ୍ ପୁଜାନାଗ୍ କାଟେମ୍ ଆତ୍ତେ । ମିଡ଼୍ ଇଞ୍ଜେ ଇଦ୍ ଲେକାମ୍ କାରାପ୍ କାମ୍ତାଗ୍ ଅଡ଼୍ତଡ଼୍ କାଇଲ୍ୱାଙ୍କ୍ ଅଡ଼୍ ଆଶର୍ଯ୍ୟ ଆସ୍ ମିକିଂଙ୍କ୍ ଗାଟି ନାର୍ଗେ ଲିନ୍ଦେ ମାଡ଼ୁତଡ଼୍ । କିନ୍ତୁ ବେନ୍ ଇଶ୍ୱର୍ ଜିୱେ ନୁ ଡଲ୍ତେନଡ଼୍ ବିଚାର୍ ମାଡ଼ିତଣ୍ଡ୍, ଅନ୍ ଗାରେ ଅଡ଼୍କିଂଙ୍କ୍ ଇସାବ୍ ଇଦାନଙ୍କ୍ ଆଦ୍ତେ । ଅଦିନ୍ ସେଙ୍ଗେ ଡଲ୍ତେନଡ଼୍ ଗାରେମିକା ସୁସମାଚାର୍ ପ୍ରଚାର୍ ମାଡ଼ିମାତ୍ତଡ଼୍, ବେଲାନ୍ ଅଡ଼୍ ନାରୁଡ଼୍ ଲେକାମ୍ ମେନ୍ଦୁଲ୍ତେ ବିଚାର୍ରିତ ଆସ୍ମାତ୍କେ ମିକା, ଇଶ୍ୱର୍ତେ ଆତ୍ମାତ୍ରକମ୍ ଆତ୍ମାତଡ଼୍ ଜିୱେ ଆଦ୍ତଡ଼୍ ।
ଇଶ୍ୱର୍ତେ ଦାନତିଙ୍କ୍ ସାୟେ ନେଃଏତାନଣ୍ଡ୍ ଗୁମାସ୍ତାଲ୍
ସାରେ ବିଷୟତାଦ୍ ତେରାନ୍ ଦିନାମ୍ ଏୱୁତେ । ମିଡ଼୍ ପ୍ରାର୍ତନା ତାଗ୍ ମାନ୍ଇସ୍ ମାନ୍ଦାନ୍ ସେଙ୍ଗେ ନିଜର୍ ପର ଆଶେ ୱାଟି ତିଆର୍ଆସ୍ ମାନୁଟ୍ । ନାର୍ଗେ ପ୍ରେମତଡ଼୍ ନିଜର୍ ନିଜର୍ ଲୋପେ ପ୍ରେମ ମାଡ଼ାଟ୍, ବାତେଙ୍କ୍ଇତ୍କେ ପ୍ରେମ ନାର୍ଗେ ପାପାମ୍ତିଙ୍କ୍ ମୁସିତେ । ସାୟେତ୍ ମନ୍ତଡ଼୍ ନିଜର୍ କୁଟ୍ମାମ୍ତିଙ୍କ୍ ସେବା ମାଡ଼ାଟ୍ । ଇଶ୍ୱର୍ ମିଡ଼୍ ସାରେତଡ଼୍କ୍ ସାୟେତ୍ ଦାନ ଇତ୍ତନ୍ । ବେନ ବେନ୍ ଦାନ ପାଏମ୍ ଆତ୍ତନ୍, ଆଦିନାଦ୍ ସାୟେତ୍ ବ୍ୟବହାର୍ ଇସାପ୍ତେ ମେଣ୍ଡେବାଗାତଡ଼ାଦ୍ ସେବା ସେଙ୍ଗେ ଆଦ୍ ଦାନତାଦ୍ ସତ୍ ବ୍ୟବହାର୍ ମାଡ଼ାନାଦ୍ ସାୟେ । ବେନ ପ୍ରଚାର୍ ମାଡ଼ିତନ୍, ଅଣ୍ଡ୍ ଇଶ୍ୱର୍ତେ ଗଟି ପ୍ରଚାର୍ ମାଡ଼ିଣ୍ଡ୍ । ବେନ ସେବା ମାଡ଼ିତନ୍, ଇଶ୍ୱର୍ ଅଙ୍କ୍ ଇସ୍ମାନ୍ଦାନ୍ ଶକ୍ତି ଲେକାମ୍ ଅଣ୍ଡ୍ ସେବା ମାଡ଼ିଣ୍ଡ୍ । ଆଲେଇତ୍କେ, ଇଶ୍ୱର୍ ସାରେ ବିଷୟତେ ଜିସୁ କ୍ରିଷ୍ଟନ୍ ତଡ଼୍ ଗୌରବ୍ ପାଏମ୍ ଆଦ୍ତନ୍ । ଯୁଗ୍ଯୁଗ୍ ମହିମା ନୁ ପରାକ୍ରମ୍ ଅନାଦ୍ । ଆମେନ୍ ।
କ୍ରିଷ୍ଟିୟାନ୍ ନାରୁଡ଼୍ତାଦ୍ ଦୁଃକାମ୍ କଷ୍ଟ
ପ୍ରିୟ ସାଙ୍ଗନଡ଼ି, ବେନ୍ କିସ୍ ପରିକ୍ଷାତାଗ୍ ମିଡ଼୍ ଦୁଃକାମ୍ କଷ୍ଟ ଆଦୁତିଡ଼୍, ଆଦ୍ ୱେରଡ଼୍ ଆସାମ୍ତେ ଗଟ୍ଣା ଆଲ୍ସି ବକୁୱା ଆୟ୍ମାଟ୍ । ମେଣ୍ଡେ ୱେଡ଼୍କାଟ୍, ବାତେଙ୍କ୍ଇତ୍କେ ମିଡ଼୍ କ୍ରିଷ୍ଟନ୍ ଦୁଃକାମ୍ କଷ୍ଟତେ ଅଂଶି ଆୟ୍ନାଦ୍ ଅନାଦ୍ ମୟିମା ପ୍ରକାଶ୍ ଆଦାନ୍ ୱେଲେ ମିଡ଼୍ ୱେଡ଼୍କେତେ ସାର୍ଦେ ଆଦ୍ତିଡ଼୍ । କ୍ରିଷ୍ଟନ୍ ପେର୍କେ ଆନ୍ନାଙ୍କ୍ ଅପମାନିତ୍ ଆତ୍କେ, ମିଡ଼୍ ପ୍ରକୃତ୍ତେ ଦନ୍ୟ, ବାତେଙ୍କ୍ଇତ୍କେ ଇଶ୍ୱର୍ତେ ଗୌରବ୍ମୟ ଆତ୍ମା ମିୟାଗେ ବାସେ ମାଡ଼ିମିନ୍ଦେ । ମିୟାଗାଙ୍କ୍ ବେନ ନରଅନ୍ତା, ଦସ୍ୟୁ ବା ଦୁରାଚାରି, ବା ଗଲ୍କ୍ ସୃଷ୍ଟି ମାଡ଼ାନ୍ ସେଙ୍ଗେ ଦୁଃକାମ୍ କଷ୍ଟ ମାଡ଼୍ମାକିଣ୍ଡ୍ । କିନ୍ତୁ ମିଡ଼୍ ଯଦି କ୍ରିଷ୍ଟିୟାନ୍ ଆୟିନାଙ୍କ୍ ଦୁଃକାମ୍ ମାଡ଼ୁତିଡ଼୍, ଆଲେକ୍ ସିଗ୍ ଆୟ୍ମାଟ୍ । ଇଶ୍ୱର୍ତିଙ୍କ୍ ଦନ୍ୟବାଦ୍ ଇମୁଟ୍, ବାତେଙ୍କ୍ଇତ୍କେ ମିଡ଼୍ କ୍ରିଷ୍ଟନ୍ ପେଦେର୍ ପୟ୍ତିଡ଼୍ ।
ଇଞ୍ଜେ ବିଚାର୍ ଦିନାମ୍ ଏୱୁତ୍ତେ ନୁ ଇଶ୍ୱର୍ତେ ନାରୁଡ଼୍ ମୁନେଙ୍କ୍ ବିଚାର୍ ଆଦ୍ତଡ଼୍ । ଯଦି ମାନାଗାଙ୍କ୍ ଆଦ୍ ଆରାମ୍ ଆତ୍କେ, ଆଲେକ୍ ବେନଡ଼୍ ଇଶ୍ୱର୍ତେ ସୁସମାଚାର୍ତାଗ୍ ବିଶ୍ୱାସ୍ ମାଡ଼ଡ଼୍, ଅଡ଼ାଦ୍ ମାଡ଼େଙ୍କ୍ତାଦ୍ ଦଶା ବାଆତେ ଆଦ୍ତେ ? ଦର୍ମଶାସ୍ତ୍ରତାଗ୍ ଲେକାମିନ୍ଦେ, “ଯଦି ଦାର୍ମିକ୍ନଡ଼୍ ପରିତ୍ରାନ୍ ପାଏମ୍ ଆଦାନାଦ୍ ଇସର୍ କଷ୍ଟ, ଆଲେକ୍ ଆଦାର୍ମିକ୍ ନୁ ପାପିନଡ଼୍ ଦଶା ବାଆତେ ଆଦ୍ତେ ?” ଆଲେକ୍ ବେନଡ଼୍ ଇଶ୍ୱର୍ତେ ଇଚ୍ଛା ଲେକାମ୍ ଦୁଃକାମ୍ ମାଡ଼ିତଡ଼୍, ଅଡ଼୍ ସାରେ ସତ୍କାମ୍ ମାଡ଼ି ଅନାଗେ ପୁରାପୁରି ବର୍ସା ନେଏମୁଟ୍ । ଅଡ଼ାଦ୍ ସୃଷ୍ଟିକର୍ତ୍ତାଲ୍ ଇଶ୍ୱର୍ ସାରେଦାମ୍ ତାନ୍ ପ୍ରତିଜ୍ଞା ରକ୍ଷା ମାଡ଼ିତନ୍ ।
ପୁନାଦ୍ ଆର୍ର୍. Copyright © 2020 The Word for the World International and Koya Translation Samithi, Malkangiri, Odisha. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.