ପୁନାଦ୍ ଆର୍ର୍
୧ ପିତର୍ 3
ମୁତେ ନୁ ମୁଦ୍ପାଲଡ଼୍ ସେଙ୍ଗେ ଶିକ୍ଷା
ଆ ମୁତେନଡ଼ି ! ମିଡ଼୍ ମୁଦ୍ପାନଡ଼୍ ସନ୍ତୁଷ୍ଟ ଆୟମୁଟ୍ । ଆଲେକେ, ଯଦି ବେନ୍ ଆୟି ମୁଦ୍ପାଲ୍ ଇଶ୍ୱର୍ତେ ବାକ୍ୟତେ ବିଶ୍ୱାସ୍ ମାଡ଼୍ୱେ ମାତ୍କେ, ଆଲେକ୍ ମିୟାଦ୍ ସାୟେତ୍ ବ୍ୟବହାର୍ ତଡ଼୍ ଆଦ୍ ବାକ୍ୟ ସେଙ୍ଗେ ଅନାଦ୍ ବିଶ୍ୱାସ୍ ଆଦ୍ତେ । ମିଡ଼୍ ସୁଦୁଟ୍ ମିକା କେତାନଙ୍କ୍ ଦର୍କାଡ଼୍ ଆୟ । ବାତେଙ୍କ୍ଇତ୍କେ ମିୟାଦ୍ ପବିତ୍ର ବ୍ୟବହାର୍ ନୁ ବକ୍ତି ବାବ୍ ଅଡ଼୍ ଉଡ଼ିତଡ଼୍ । 2ମିଇଆଦ୍ କେଲ୍କ୍ ସଜା, ସଜ୍ବାଜ୍, ସୁନାବାନା କେର୍ସ୍ ବାୟେଦେ ତଅତାନାଦ୍ ନିଜର୍ ସଜ୍ବାଜ୍ ମାଡ଼ାନାଦ୍ ଉଚିତ୍ ଆୟ । ନିଜାତାଦ୍ ସୁନ୍ଦୁର୍ ଆଦୁତ୍, ମୀଇ ଜିୱୁନ୍ଲୋପେତ୍ ସାୟେତ୍ ନମ୍ରମନ୍ । ମିୟାଦ୍ ଆଦ୍ ନଷ୍ଟ ଆୟ୍ୱାଦ୍ ସଜ୍ବାଜ୍ ଇଶ୍ୱର୍ତେ କଣ୍ଡେତେ ସାରେତିଙ୍କ୍ ମୁଲ୍ୟବାନ୍ । ମୁନେଙ୍କ୍ତେ ବେନ୍ ପବିତ୍ର ମୁତେକି ଇଶ୍ୱର୍ ତାଗେ ବର୍ସା ନେଃଏସ୍ମାତ୍ତା, ଆୱୁ ମୁଦ୍ପାନଡ଼୍ ସନ୍ତୁଷ୍ଟ ଆଦାନ୍ ସେଙ୍ଗେ ନିଜେତିଙ୍କ୍ ପବିତ୍ରତଡ଼୍ ସଜ୍ବାଜ୍ ମାଡ଼ମାତ୍ତା । ସାରା ଆସତ୍ଲେକାତ୍ ୱେରଡ଼୍ ମୁତେ ମାତ୍ତେ । ଆଦ୍ ଅବ୍ରାହାମ୍ତେ ଆଦେଶ୍ ପାଲନ୍ ମାଡ଼ି ଅଙ୍କ୍ ପ୍ରବୁ ଇଞ୍ଜ ମାନେମ୍ ଆସମାତ୍ତେ । ମିଡ଼୍ ଇଞ୍ଜେ ଅଦିନ୍ ମାୟାସ୍କ୍ । ଯଦି ସାୟେତ୍ ବ୍ୟବହାର୍ ମାଡ଼୍ତିନ୍, ଆଲେକେ, ବାତେବା ବିଷୟ ମିକିଙ୍କ୍ ମେଣ୍ଡେ ୱେର୍ରେସ୍ପେ ପାର୍ୱ । 3
ଆ ମୁଦ୍ପାନଡ଼ି, ଆଦ୍ ଲେକାମ୍ ମୀଇ ମୁତେକିଙ୍କ୍ ଶାତ୍ୱାମ୍ ଇଲ୍ଲେ ଇଞ୍ଜ ପୁଞ୍ଜ୍ ଆୱିନ୍ ସେଙ୍ଗେ ପସନ୍ଦ୍ ଆସ୍ ମାନ୍ନୁଟ୍ । ଆୱିଙ୍କ୍ ସମ୍ମାନ୍ ଇମୁଟ୍ । ଆୱୁମିକା ମିଇତଡ଼୍ ଇଶ୍ୱର୍ତାଗେ ଜିୱେତ୍ ଲେକାମ୍ ଦାନ ପାଏମ୍ ଆଦ୍ତା । ମିଇଡ଼୍ ଆୱିନ୍ ସେଙ୍ଗେ ସାୟେତ୍ ବ୍ୟବହାର୍ ମାଡ଼୍କେ, ମିୟାଦ୍ ପ୍ରାର୍ତନା ଅଟ୍କେମ୍ ଆୟ ।
ସତ୍କାମ୍ତେ ସେଙ୍ଗେ ଦୁଃକାମ୍
ପେର୍କେ, ମିଡ଼୍ ସାରେତଡ଼୍ ଅଣ୍ଡୟ୍ ମନ୍ ଆସ୍ ମାନୁଟ୍ । ନିଜେ ନିଜେତିଙ୍କ୍ ଏଲାଡ଼୍ତାମୁଣ୍ଡ୍ ଲେକାମ୍ ପ୍ରେମ ମାଡ଼ି ନିଜେ ନିଜେ ଲୋପେ ଦୟା ନୁ ନମ୍ର ଆୟ୍ମୁଟ୍ । ଅନିଷ୍ଟ ବଦଲ୍ତେ ଅନିଷ୍ଟ ମାଡ଼୍ମାଟ୍, ଅବିଶାପ୍ ବାଦୁଲ୍ତେ ଅବିଶାପ୍ ମାଡ଼୍ମାଟ୍; ତାନ୍ ପେର୍କେ ଆର୍ଶିବାଦ୍ ମାଡ଼ାଟ୍, ବାତେଙ୍କ୍ଇତ୍କେ ଇଦିନ୍ ସେଙ୍ଗେ ଇଶ୍ୱର୍ ମିକିଙ୍କ୍ କାର୍ଙ୍ଗି ମାତ୍ତନ୍ ନୁ ଆଦ୍ ମାଡ଼ାନ୍ ପେର୍କେ ମିଡ଼୍ ଆର୍ଶିବାଦ୍ ପାଏମ୍ ଆଦ୍ତିଡ଼୍, ଶାସ୍ତ୍ରତାଗ୍ ଲେକାମିନ୍ଦେ, “ବେନ ଜିୱେତାଗ୍ ପ୍ରେମ ମାଡ଼ାନଙ୍କ୍ ନୁ ସୁକାମ୍ତେ ଦିନାମ୍ ଉଡ଼ାନଙ୍କ୍ ଇଚ୍ଛା ମାଡ଼ିତଣ୍ଡ୍, ଅଣ୍ଡ୍ କାରାପ୍ ଗଟ୍ କେଲ୍ମାକିଣ୍ଡ୍ ନୁ ମିଚ୍ ଗଟିନାଗାଙ୍କ୍ ପେୟ୍ସ୍ ୱାଡ଼ିଣ୍ଡ୍ । ଅଣ୍ଡ୍ କାରାପ୍ତାଗାଙ୍କ୍ ମାଲ୍ସ୍ ୱାସ୍ ସାୟେକାମ୍ ମାଡ଼ିଣ୍ଡ୍ ନୁ ମନ୍ଇସ୍ ଶାନ୍ତି କାମ୍ ମାଡ଼ିଣ୍ଡ୍ । ଇଶ୍ୱର୍ ଦାର୍ମିକ୍ ନାରୁଡ଼୍ ସେଙ୍ଗେ ମନ୍ ଇଦ୍ତଣ୍ଡ୍ ନୁ ଅଡ଼୍ ପ୍ରାର୍ତନା କେଞ୍ଜିତଣ୍ଡ୍; ଇତ୍କେ ଅଣ୍ଡ୍ କାରାପ୍ ନାରୁଡ଼୍ ସେଙ୍ଗେ ମନ୍ ଇୱଣ୍ଡ୍ ।”
ସାୟେ କାମ୍ ମାଡ଼ାନଙ୍କ୍ ମିଡ଼୍ ତିଆର୍ ମାତ୍କେ, ବେନ ମିୟାଦ୍ ଅନିଷ୍ଟ ମାଡ଼ିତନ୍ ? 4ସତ୍ କାମ୍ ମାଡ଼୍ନ୍ ସେଙ୍ଗେ ମିଡ଼୍ ଦୁଃକାମ୍ କଷ୍ଟ ମାଡ଼୍କେ ମିକା ମିଡ଼୍ ନିଜାମ୍ ସୁକାମ୍ତେ ମିନ୍ଦେଡ଼ି । ବେନଙ୍କ୍ ୱେର୍ମାଟ୍; ବେସୁଙ୍କ୍ବା ଚିନ୍ତାତେ ମାନ୍ମାଟ୍ । ମାନ୍ କ୍ରିଷ୍ଟଙ୍କ୍ ବକ୍ତି ମାଡ଼ି, ଅଙ୍କ୍ ପ୍ରବୁ ଇଞ୍ଜ କେତ୍କେ । ଯଦି ବେନ ମି ଲୋପେତ୍ ହୃଦୟ୍ତାଗ୍ ବାଆତେ ମିନ୍ଦେ ଇଞ୍ଜ ପୁନ୍ଦାନଙ୍କ୍ ଇଚ୍ଛା ମାଡ଼୍କେ, ଅନ୍ ପ୍ରଶ୍ନତେ ଟିକ୍ ଉତ୍ତର୍ ଇଦାନଙ୍କ୍ ସାରେଦାମ୍ ତିଆର୍ତେ ମାନୁଟ୍ । ଇତ୍କେ ବିନୀତ୍ତେ ନୁ ଲେକେତ୍ ନାରୁନ୍ ଲେକାମ୍ ଉତ୍ତର୍ ଇମୁଟ୍ । ମିୟାଦ୍ ମନ୍ତିଙ୍କ୍ ନିର୍ମଲ୍ତେ ନେଏମୁଟ୍ । ଆଲେଇତ୍କେ, ମିଡ଼୍ କ୍ରିଷ୍ଟନ୍ ପେର୍କେ ଆଦାନ୍ ଲେକାମ୍ ସାୟେତ୍ ବ୍ୟବହାର୍ ମାଡ଼ମାନ୍ଦାନ୍ ୱେଲେ, ବେନଡ଼୍ ମିୟାଦ୍ ମିଚ୍ ଅବିଯୋଗ୍ ମାଡ଼ିତଡ଼୍, ଅଡ଼୍ ସିଗ୍ ଆଦ୍ତଡ଼୍ । କାରାପ୍ କାମ୍ ମାଡ଼ି କଷ୍ଟ ଆଦାନ୍ ନାଗାଙ୍କ୍, ଇଶ୍ୱର୍ତେ ଇଚ୍ଛାଲେକାମ୍ ସତ୍କାମ୍ ମାଡ଼ି ଦୁଃକାମ୍ ମାଡ଼ାନାଦ୍ ଲେକେତ୍ । ମିକିଂଙ୍କ୍ ଇଶ୍ୱର୍ତେ ପାକେ ତାତାନ୍ ସେଙ୍ଗେ କ୍ରିଷ୍ଟ ନିଜେ ଦାର୍ମିକ୍ ଆସ୍ ଅଦାର୍ମିନାରୁଡ଼୍ ପାପତେ ପ୍ରାୟଚିତ୍ତେ ସେଙ୍ଗେ ନିଜେତ୍ ଜିୱେ ଇତ୍ତନ୍ । ଇଦ୍ ପ୍ରାୟଚିତ୍ତେ ଅଣ୍ଡ୍ ଅଣ୍ଡୟ୍ଦାମ୍ ସାରେଦିନାତ୍ ସେଙ୍ଗେ ସାଦନ୍ ମାଡ଼୍ତନ୍ । ଅଣ୍ଡ୍ ମେନ୍ଦୁଲ୍ ଇସାପ୍ତେ ଡଲ୍ତନ୍, ଇତ୍କେ ଆତ୍ମାତେ ଜିୱେ ଆତ୍ତନ୍, ନୁ ଆଦ୍ ଆତ୍ମାତେ ସ୍ଥିତିତଡ଼୍ ବନ୍ଦିଆତ୍ତେ ଆତ୍ମାକିନ୍ ପାକେ ଆଞ୍ଜ୍ ପ୍ରଚାର୍ ମାଡ଼୍ତନ୍ । ନୋହ ଜାହାଜ୍ ମାଡ଼ାନ୍ ସମୟତେ ଇଶ୍ୱର୍ ଦୈର୍ଯ୍ୟତେ କେପିମାତ୍ତନ୍ । ଆସୁଙ୍କ୍ ବେନ୍ ନାରୁଡ଼୍ ଇଶ୍ୱର୍ତଡ଼୍ ଉର୍ଗାଡ଼୍ ଆତ୍ତଡ଼୍, ଆ ପରୁତେ ଆତ୍ମା ଆଦୁତଡ଼୍ ଅଡ଼୍ଲେକେମ୍ । ବେନ୍ ସୁକୁକ୍ ବେସ୍କ୍ତୁଡ଼୍ ସାରେ କାଇଲି ଆଟ୍ଜାନ୍ ମାତର୍ ଗାଟି ୱାର୍ସାମ୍ତାଗାଙ୍କ୍ ରକ୍ଷା ପାଏମ୍ ଆତ୍ତଡ଼୍, ଅଡ଼୍ ମିକିଙ୍କ୍ ପରିତ୍ରାଣ ସାଦନ୍ ମାଡ଼ିମାନ୍ଦାନ୍ ବାପ୍ତିସ୍ମ ଲେକାମ୍ । ଇଦ୍ ବାପ୍ତିସ୍ମ ମୀଇ ମେନ୍ଦୁଲ୍ତେ ମୁର୍କ୍ତିଙ୍କ୍ ଯେକା ମାଡ଼, ଆଦ୍ କ୍ରିଷ୍ଟନ୍ ତେଦାନ୍ ଦିନ୍ତଡ଼୍ ମିୟାଦ୍ ମନ୍ତିଙ୍କ୍ ଲେକେତ୍ ମାଡ଼ାନ୍ ସେଙ୍ଗେ ଇଶ୍ୱର୍ତେ ପାକେ ଆବେଦନ୍ । ଅଣ୍ଡ୍ କ୍ରିଷ୍ଟ ଇଞ୍ଜେ ସ୍ୱର୍ଗତାଗ୍ ଇଶ୍ୱର୍ତେ ତିନ୍ଦେ ପାକେ କୁଦିମିକା ଦୂତ ନୁ ସାରେ ସ୍ୱର୍ଗତାଉ ଅଦିପତି ନୁ ସାରେ ଶକ୍ତିତିଙ୍କ୍ ଶାସନ୍ ମାଡ଼ୁତଣ୍ଡ୍ ।
Source notes (4)
- Cross-reference ଏଫିସିୟ ୫:୨୨; କଲସୀୟ 3:୧୮.
- Cross-reference ୧ ତୀମତି ୨:୯.
- Cross-reference ଏଫିସିୟ ୫:୨୫; କଲସୀୟ 3:୧୯.
- Cross-reference ମାତିଉ ୫:୧୦.
ପୁନାଦ୍ ଆର୍ର୍. Copyright © 2020 The Word for the World International and Koya Translation Samithi, Malkangiri, Odisha. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.