BIBLE MUTAL

Exodus 20

Ma Sap Singoul

(Deuteronomy 5:1–21)

Na God El kaskas, ac pa inge kas nukewa El tuh fahk: “Nga LEUM GOD, su kowos alu nu se, su uskowosme liki facl Egypt, acn se ma kowos tuh mwet kohs we.

“Nik kom eis siena god1 sayuk.

“Nik kom oru nu sum kutena ma sruloala, ku kutena luman ma oan in kusrao lucng, ku ma oan in faclu ten, ku ma oan in kof ye faclu.2 Nik kom sifacna epasr nu selos, ku orekma nu selos; tuh nga LEUM GOD lom, sie God lemta; lahi ma koluk lun papa tuma nu fin tulik natu, nu ke fwil se aktolu ac akakosr selos su srungayu.3 4 A oru kulang nu sin siu selos5 su lungse nga ac liyaung ma sap luk.

Nik kom aklusrongtenye Inen LEUM GOD lom, tuh LEUM GOD El tia mu wangin mwatan el su aklusrongtenye Inel.6

Esamya len Sabbath, in akmutalye.7 Len onkosr kom in orekma, ac oru orekma lom nukewa.8 A len se akitkosr Sabbath lun LEUM GOD lom. Nik kom oru kutena orekma — kom, ku wen nutum, ku acn nutum, ku mwet mukul kulansap lom, ku mwet mutan kulansap lom, ku kosro nutum, ku mwetsac lom su muta in kalkal lom.9 Tuh in len onkosr LEUM GOD El orala kusrao, ac faclu, ac meoa, ac ma nukewa loac, a mongla len se akitkosr, tuh ouinge LEUM GOD El akinsewowoye len Sabbath, ac akmutalye.10

Sunakin papa tomom ac nina kiom, tuh len lom in pus fin facl se su LEUM GOD lom El sot nu sum.11

Nik kom akmas.12

Nik kom kosro.13 14

Nik kom pisrapasr.15

Nik kom kaskas kikiap16 lain mwet tulan lom.17 18

Nik kom rapkui19 lohm sin mwet tulan lom. Nik kom rapkui mutan kien mwet tulan lom, ku mwet mukul kulansap lal, ku mwet mutan kulansap lal, ku cow natul, ku ass natul, ku kutena ma lun mwet tulan lom.”20

Mwet Uh Sangeng

(Deuteronomy 5:22–33)

Ke mwet uh elos lohng pulahl ac pusren mwe ukuk, ac liye sarom, ac ke eol uh fosryak, elos rarrar ke sangeng, ac tu yen loessula.21 Elos fahk nu sel Moses, “Kom fin kaskas nu sesr, kut ac porongo; tusruktu God Elan tia kaskas nu sesr, sahp kut ac misa.”

Ac Moses El fahk nu selos, “Nimet sangeng. God El tuku na in tuh srike kowos, ac oru in yokelik akfulat lowos nu sel, pwanang kowos in tia orekma koluk.” Tusruktu mwet uh srakna tu loessula, ac Moses mukena kalukyang nu ke pukunyeng lohsr matoltol uh, yen God El oasr we.

Ma Sap Ke Loang Uh

LEUM GOD El sapkin nu sel Moses in fahk nu sin mwet Israel, “Kowos liye ke nga, LEUM GOD, kaskas nu suwos inkusrao me. Nimet oru kutena kain god ke silver ku gold tuh kowos in alu nu kac in oana ke kowos alu nu sik. Oru sie loang ke fohkon acn uh nu sik, ac kisakin sheep ac cow nutuwos fac tuh in mwe kisa firir ac in mwe kisa in akinsewowo. In acn nukewa ma nga srela nu suwos in alu nu sik we, nga ac fah tuku nu yuruwos ac akinsewowoye kowos. Kowos fin oru sie loang eot nu sik, nimet sang eot tufahlla oru, mweyen ke kowos orekmakin chisel in taflela eot uh, kowos akkolukyela.22 Nimet musai nu sik sie loang ma oasr nien fan nu kac. Kowos fin oru, kowos ac sifacna fahkak koflufol lowos ke kowos ac fan kac.

Source notes (22)

Footnote siena god: kas Hebrew fahk mu “kutena god”.
Cross-reference 20:4–5; Exo 34:17; Lev 19:4; 26:1; Dut 4:15–18; 27:15
Footnote lahi ma koluk ... su srungayu: kalmac pa God El fah kolla mwatan ma koluk lun sie papa su srungal nu fin tulik natul ac oayapa tulik nutin tulik natul.
Cross-reference 20:5–6; Exo 34:6–7; Oek 14:18; Dut 7:9–10
Footnote siu selos: kalmac pa ‘sie tausin’ ku ‘sie tausin fwil’ — oana fahk mu “A nu selos su lungse nga ac liyaung ma sap luk, nga fah fahkak lungse kawil luk nu sin tausin fwil natulos”.
Cross-reference Lev 19:12
Cross-reference Exo 16:23–30; 31:12–14
Cross-reference 20:9–10; Exo 23:12; 31:15; 34:21; 35:2; Lev 23:3
Footnote in kalkal lom: kas Hebrew fahk mu “ke siti nukewa in facl sum”.
Cross-reference Gen 2:1–3; Exo 31:17
Cross-reference 20:12; Dut 27:16; Mt 15:4; 19:19; Mk 7:10; 10:19; Lk 18:20; Eph 6:2; Eph 6:3
Cross-reference Gen 9:6; Lev 24:17; Mt 5:21; 19:18; Mk 10:19; Lk 18:20; Rom 13:9; Jas 2:11
Cross-reference Lev 20:10; Mt 5:27; 19:18; Mk 10:19; Lk 18:20; Rom 13:9; Jas 2:11
Footnote kosro: kalmen ma sap se inge in kas Hebrew pa kosro inmasrlon sie mukul nu sin siena mutan payuk tari.
Cross-reference Lev 19:11; Mt 19:18; Mk 10:19; Lk 18:20; Rom 13:9
Footnote kaskas kikiap: kas Hebrew fahk mu “orek loh kikiap”.
Footnote mwet tulan lom: kalmac pa sie pac mwet Israel wiom.
Cross-reference Exo 23:1; Mt 19:18; Mk 10:19; Lk 18:20
Footnote rapkui: kalmen kas se inge in kas Hebrew pa ‘mwel’.
Cross-reference Rom 7:7; 13:9
Cross-reference 20:18–19; Heb 12:18–19
Cross-reference Dut 27:5–7; Jos 8:31

BIBLE MUTAL. Public domain. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · SourceEdition imported 2026-10-25.