কুলিজকুরাআ কামি 14

নান্ডেহান্ডে বুগিন বার্তা পাসনা।

1হেৎদ পৌল হেৎদ বার্ণবা ইকনিয় নাগাররে ইহুদি কুরাঃআ সমাজ অড়ারে বলয় নাকিন হেৎদ সাপা সাপি বুগিন থুতি গামকেয়ায় যে, ইহুদি হেৎদ গ্রিক (বিন ইহুদি) কুরাঃআ তালারে গাদা হড়কু পাতিআয়না।

2মেন্খান অকা ইহুদিকু বেঃরাহি নাকু, ইঙ্কূ হাগাকু রাঃআ বিরুধরে অইহুদি হড় কুরাঃআ জিউতাকুয়া উস্কুরকেৎ কুয়াকু হেৎদ ক্ষেপা রাকাবকেৎ কুয়াকু।

3এন্তে ইঙ্কিন অটঃহঅ গাদামাহা এনথাংরে তাহীনাকিন, সাহস লঅ হেৎদ প্রভু রাঃআ দাড়িতে থুতি কেনা কিন, হেৎদ ইনি প্রভু রাঃআ দায়া-দুলাড় রাঃআ থুতি গামে কেনায়, হেৎদ প্রভুহঅ পৌল হেৎদ বার্ণবা রাঃআ তিহি হরকাতে নাআ হানা চিহ্না হেৎদ হাহাড়া কামি কেনাকিন।

4ইনাতে শেহার রিঙ্কূ হড়কু বার ভাগেনাকু, মিয়াৎ দল ইহুদিকু রাঃআ হেৎদ অট মিয়াৎ দল কুলিচ কুরাঃআ পক্ষ হাতাকেৎয়াকু।

5ইন্তং অইহুদি হেৎদ ইহুদিকু রাঃআ কথক হড় আকুয়া লাউড়িয়াকু লঅ যুক্তি থুতি জাগার কাতে, ইনকিনা মানখাট হেৎদ দিরি লেবদা রাঃআ কারসাদি কেৎয়াকু। 6ইনকিন ইঙ্কূয়া কারসাদি আটকার নামকাতে লুকায়নিয়া মুলুক রাঃআ, লুস্ত্রা হেৎদ দর্বী নাগার তে হেৎদ ইনা রাঃআ গোটা টলাতে নিরে নাকিন;

7হেৎদ এন থাংরে ইনকিন বুগিন বার্তা পাসনা লাগায়নাকিন।

পৌল, বার্নাবা, লুস্ত্রা নাগার হেৎদ দর্বী নাগাররে।

8লুস্ত্রা নাগার রে মিয়াৎ হড় দুবতাহিনো কেনায়, ইনি রাঃআ তিঙ্গু রাঃআ যাহান দাড়ি কা তাহিনো কেনা, ইনি জানাম হাতেনগে বারান কাটা খড়দা, যাহা চিল্লং কায় তাড়ম ভাড়া তাৎআয়।

9ইনি হড় পৌল রাঃআ থুতি আয়ুমেৎ কেনায়; পৌল ইনি রাঃআ হান্তে মিৎ ঢেকতে কয়ঃঅ কিয়ায়, হেৎদ নেল নাম কেয়ায় বুগি রাঃআ নাতিনাং ইনি রাঃআ পাতিয়া মেনা।

10ইনি জোরতে ইনিকে গামকিয়ায়, আমা কাটারে ভর এমকাতে সজেহে তিঙ্গুনমে; এন্খান ইনি জেহেদ কাতে তিঙ্গুইনায় হেৎদ তাড়ম লাগায়নায়।

11পৌল অকা করাকেয়ায়, ইনা নেলকাতে হড়কু লুকানিয় জাগারতে জোরতে গাম লাগায়নাকু, দেবতাকু মান্মি রাঃআ ভেশ হাতাকাতে আবুয়া তালারে হিচা কানাকু। 12ইঙ্কূ বার্ণবাকে দ্যুপিতর1 (জিউস) হেৎদ পৌলকে মর্কুরিয় (হারমেশ) গামাৎ কিনাকু, চিয়াচি পৌল মুখিয়া জাগারিজ তাহিনকেনায়।

13হেৎদ শেহার রাঃআ সামাংরে দ্যুপিতর রাঃআ অকা জাহের থান্তে তাহীন কেনা, এনথাং রিনিজ বামড়ে কথক লেকা উরিচ আন্ডিয়া হেৎদ মালা ইদিকাতে শেহার রাঃআ বলন দুয়াররাঃআ সামাংরে হড়কু লঅ বলিদান নানামেনায়।

14মেন্খান কুলিচ কু, বার্ণবা হেৎদ পৌল, নিয়া থুতি আয়ুমকাতে ইঙ্কূ নিজে রাঃআ কিচি-সনঃঅ ওড়েজ কেৎয়াকিন হেৎদ নিরকাতে বাহারতে সেনকাতে হড়কু রাঃআ দিশাকাতে গাম লাগায়নাকু,

15গমকেকু, আপে নেকা চিয়া করায় তানাপে? আলেহঅ আপে লেকা সমান সুখ দুঃখ সাহা হড়; আলে আপেকে নিয়া বুগিন বার্তা সারিতকা হিচাকানালে যে, নিয়া যত অসার জিনিস হাতেন জীউৎ ঈশ্বর রাঃআ হান্ডে হিজুপে, অকয় সেরমা, ধার্তি, দরেয়া, হেৎদ দরেয়ারে যাগে মেনা ইনা যত সির্জনতাৎ আয় (সেসেন . 20:11, দুরাং মালা . 146:6)

16ইনি মুশিং হাড়াম-হাপাড়ামকু রাঃআ পিড়ি লেকাতে যত জাতিকে ইঙ্কূয়া ইচ্ছালেকা সেন তকাতাৎ কুয়ায়্য়য়;

17মেন্খান তুবুই রহঃঅ ইনি নিজেকে সদর দঃহঅকিয়ায়, ইনি মঙ্গল তাৎআয়, নিরালা হাতেন আপেকে দাঃআ হেৎদ জোঃ সাবরাঃআ কালতে জোঃ এমতাৎ আপেয়ায় হেৎদ কুশিতে আপেয়া অন্তর পেরেজ তাৎ আপে।

18নিয়া যত থুতি গামকাতে পৌল হেৎদ বার্ণবা গাদা কষ্টতে ইঙ্কূয়া উদ্দেশে বলি রাকাব হাতেন হড়কুকে আটকা কেৎ কুয়াকিন।

19মেন্খান আন্তীয়খিয়া শেহার হেৎদ ইকনীয় নাগার হাতেন কথক হড় ইহুদি হিচেনা কু; ইঙ্কূ হড়কুকে ইন্ধন এমকেৎ কুয়াকু হেৎদ হড়কু পৌলকে দিরি লেবদা কিয়াকু হেৎদ ইনিকে শেহার রাঃআ বাহারতেকু গহাড় ইদিকিয়াকু, ইনি দ গজাকানায় মেন্তে।

20মেন্খান চেলাকু ইনিরা চারুধার ঘেরাকাতে তিঙ্গুইনতেকু দাঃআ কু ছিটকা কিচ খানঃঅ ইনি বিরিৎ এন্তে শেহার রে বলয়নায়। তায়মতে ইনি বার্ণবা লঅ দর্বী নাগার তে সেনেনাকিন।

সিরিয়া রাঃআ অন্তিয়খিয় শেয়ার তে রুয়াড় সেনেনাকিন।

21ইনকিন ইনা শেহার রে বুগিনবার্তা পাসনা কেয়াকিন হেৎদ গাদা হড় প্রভু রাঃআ চেলা হুইয়েনাকু। ইনকিন লুস্ত্রা হাতেন ইকনিয়তে, হেৎদ আন্তিয়খিয়াতে রুয়াড় হিচেনা কিন;

22ইনকিন ইনা টলা রিঙ্কূ চেলাকুরাঃআ জিউরে দাড়ি আর্জাকেৎ কুয়াকিন হেৎদ ইঙ্কূকে ভরসা এমকেৎ কুয়াকিন, যেন ইঙ্কূ পাতিয়ারে থির তাহীনকাআকু। হেৎদ ইনকিন ইঙ্কূকে গামাৎ কুয়াকিন আবুকে গাদা কষ্টরাঃআ তালা হরকাতে ঈশ্বর রাঃআ মুলুক রে বলঃঅ হুইওয়া।

23চিন্তং ইনকিন ইঙ্কূ য়া নাতিনাং মিমিৎ মন্ডলীরে মুরুব্বিকুকে বহালকেৎ কুয়াকিন হেৎদ বার হেৎদ বিন্তিকেয়াকিন হেৎদ অকয় ঈশ্বরকে পাতীয়ালিয়াকু ইঙ্কূকে প্রভু রাঃআ তিহিরে সম্পাকেৎ কুয়াকিন।

24হেৎদ ইঙ্কিন পিষীদিয়া মুলুক রাঃআ তালা হরকাতে পারমকাতে পাম্ফুলিয়া মুলুক তেকিন সেটেরেনাকিন।

25ইনা তায়ম ইঙ্কিন পর্গা নাগার রে ঈশ্বর রাঃআ জাগার পাসনা কেৎ তেকিন অত্তালিয়া নাগার তে রুয়াড় সেনেনাকিন।

26হেৎদ এন্ডে হাতেন জাহাজ তে আন্তীয়খিয়া শেহার তে সেনেনাকিন, অকা কামি ইনকিন চাবাকেয়াকিন, ইনা কামিরাঃআ নাতিনাং পাতিয়ানকু ইনকিনকে নেথাংরেগে ঈশ্বর রাঃআ দায়া-দুলাড় রাঃআ হান্ডে নিজেকিন সম্পায় নাকিন।

27আন্তীয়খিয়া শেহার তে ইঙ্কিন চিন্তং রুয়াড় হিচেনাকিন, হেৎদ মন্ডলীকে মিৎ কেৎ কুয়াকিন, হেৎদ ঈশ্বর ইঙ্কিন দ্বারায়তে অকা যত কামি করালাৎ আয় হেৎদ চিল্কা অইহুদি হড়কুরাঃআ নাতিনাং পাতিয়া রাঃআ দুয়ার নিজতাৎআয়, ইনি যত থুতি ইঙ্কূকে গুছিয়া কাতেন সারি তুকা কেৎ কুয়াকিন।

28তায়মতে ইঙ্কিন, পৌল হেৎদ বার্নাবা এনথাংরে পাতিয়ানকু লঅ গাদামাহা কিন তাহিনা।