मरकुस 12

ठ्याका देल कोळ्द अंगुर इन केई इन उदाहरण

(मत्ती २१:३३-४६; लूका २०:९-१९)

1बाक यीशु उदाहरणगोळ दा आंदुर से मात माळली कुरतुन; ऊंद घन ऊंद मंळसा ईरोन याव ऊंद अंगुर इन केई हचदुन, अदिक बेली इन नाकु दी ज्वाळा कटदुन, अदिक रास्सा अन्द गड्डा अगुळदुन, अदिक मचान माळदुन; अदिक दुसरा केईवाळेरी आ अंगुर इन केई अन्द ठ्याका कोटकु दुसरा द्याश दा होटोदुन. 2बाक काय इन मौसम दा आव केईवाळेर हात्‍ती ऊंद दास उक कळुदुन, कि आ केईवाळेर से अंगुर इन केई इन फसल इन हिस्सा ताकोमुल. 3लेकीन आंदुर आ दास उक हुळकु बळदुर अदिक आऊक खाली कय कळु बुटुर! 4मालिक मात्‍त ऊंद दास उक आंदुर हात्‍ती कळुदुन; आंदुर आऊन ताल्ला ओळ्द बुटुर अदिक आऊन अपमान माळदुर! 5बाक मालिक ऊंद दास उक अदिक कळुदुन; आंदुर आऊक कोंद बुटुर. अदिक आंदुर हापाळ लॉकुर सांगुळ हांगा व्यवहार माळदुर, आंदुर दा टु आंदुर यारीकारा बळदुर, अदिक यारीकारा कोंद बुटुर! 6ईग ऊंदा ईरोन, जो आऊन प्रिय पार ईरोन; आखरी दा आव आऊक भी आंदुर हात्‍ती ईद सोचकु कळुदुन कि आंदुर नान पार उन आदर माळ्यार. 7लेकीन आ केईवाळेर आबुर दाबुर से अंदुर, ईवा रा वारीस हुन; बरी, नाव ईऊक कोंद बुळाता, अदिक आऊन धन दौलत नाम्द आदीत! 8इदुरसाटी आंदुर आ पार उक हुळ कोंडुर अदिक आऊक कोंद बुटुर, अदिक अंगुर इन केई इन व्हार्या भीट बुटुर!

9इदुर मा यीशु से केळदुर अंगुर इन केई इन “स्वामी येन माळ्यान? आव बंदकु केईवाळेर्द नाश माळ्यान अदिक अंगुर इन केई दुसरा अक कोट बुटान.” 10येन नीव शास्त्र दा ईद वचन वाचुसीदील:

“याता कल्ल इक कारीगरीगोळ बेकार मान्सीदुर,

अदा क्वाना अन्द महत्वपुर्ण कल्ल बनसेत;

11ईद प्रभु अन्द दी टु आत,

अदिक नाम नजर दा अदभुत आद.”

12आग नियम इन गुरुगोळ आऊक हुडोद चाहासदुर; यतिकी समसेगिदुर कि यीशु नाम विरोध दा ईद उदाहरण अंदान. लेकीन आंदुर लॉकुर से अंजोर, अदिक आऊक बिटकु होटोदुर.

सरकार उक कर कोळोद

(मत्ती २२:१५-२२; लूका २०:२०-२६)

13आग आंदुर आऊक मातगोळ दा फसुसोरसाटी येनारा फरीसीगोळ अदिक हेरोदेस राजा अन्द पक्ष इन येनारा लॉकुरी यीशु उन हात्‍ती कळुदुर. 14अदिक आंदुर बंदकु आऊन से अंदुर, “हे गुरु, नाव जान्सतेव, कि नी खरा आय, अदिक यारदु परवा माळाल; यतिकी नी मंळसागोळ्द बाय नोळकु मात माळाल, लेकीन परमेश्वर उन खरा हादी कल्सत्या! रा येन सरकार उक कर कोळोद उचित आद का ईला?”

15आव आंदुर्द कपट जान्सकु आंदुर से अंदुन, “नानी येती फसुसोद कोशिश माळेतीर? ऊंद दीनार नान हात्‍ती तरी, कि ना अदरी नोळाईन.”

16आंदुर ऊंद चाँदी इन सिक्‍का आऊन हात्‍ती तंदुर, अदिक आव आंदुर से अंदुन, “ईद छाप अदिक हेसुर यार्द हुन?”

आंदुर अंदुर, “रोमन राजा अन्द हुन.”

17अदिक यीशु आंदुर से अंदुन, “जो रोमन राजा अन्द हुन अद रोमन राजा अक कोळी, अदिक जो परमेश्वर उन आद अद परमेश्वर उक कोळी.”

अदिक आंदुर यीशु नव मात केळकु चकित आगेदुर.

दुबारा मात्‍त मदा माळोद

(मत्ती २२:२३-३३; लूका २०:२७-४०)

181

बाक सदूकीगोळ भी, जो अनतार कि सोत्‍त मंळसागोळ्द जित्‍ता आगोद हई हैलेच, यीशु उन हात्‍ती बंदकु आऊन से केळ कुरतुर, 19आंदुर अंदुर, “हे गुरु, आंदुर यीशु उक अंदुर, मूसा इजाजत कोटान कि ऊंद मंळसा छोळ चिट्ठी लिख्सकु तान हिंग्स उक तलाक कोळ सकतान. नाम साटी लिखस्यान कि अगर यारदारा वार्ट बिना औलाद पैदा माळ्त सोतोदान अदिक आऊनोर हिंग्स ईतोदार, रा आऊन वार्ट आऊन हिंग्स उन से मदा माळ कोमुल, अदिक तान वार्ट उन साठी वंश पैदा माळुल. 20ऊंद जागा दा येळ वार्टुर ईरोर. पयला वार्ट मदा माळकु बिना औलाद सोतोदुन; 21आग दुसरा वार्ट आ आर्त से मदा माळ कोंडुन अदिक आव भी बिना औलाद सोतोदुन; अदिक हांग अच तिसरा भी माळदुन. 22अदिक येळु वार्टुर्द ऊंद भी औलाद आगीदील. सप्पा मुंदुर हिंद आ आर्त भी सोतोदुर. 23इदुरसाटी पुनरूत्थान आगदुर बाद्दा आक आंदुर दा टु यारोर हिंग्स आदार? यतिकी आक रा येळु मुंदुर हिंग्स आगेगीदुर.”

24यीशु आंदुर से अंदुन, “नीव रा शास्त्र अक जान्सतीर, अदिक ना ही परमेश्वर उन सामर्थ्य इक इदुरसाटी नीव गलती माळतीर? 25यतिकी याग आंदुर सोत्‍तुर दा टु जित्‍ता आदार, रा आंदुर ना मदा माळ्यार अदिक ना मदा दा कोटकु आदार, लेकीन स्वर्ग दा स्वर्गदूतगोळ घाई आदार. 26सोत्‍तुर दा टु जित्‍ता आगोद बारा दा येन नीव मूसा अन्द किताब दा होत्‍त झाळी इन कात्‍ता दा वाचुसीदील कि परमेश्वर आऊन से अंदुन, ‘ना अब्राहम उन परमेश्वर, अदिक इसहाक उन परमेश्वर, अदिक याकूब उन परमेश्वर हुईन?’ 27परमेश्वर जो सोत्‍तुर आंदुरव ईला उलटा जित्‍तागोळोव परमेश्वर हुन; इदुरसाटी नीव पुरा पुरा तरीका देल ख्वाटा आईर.”

सब से धोळ्द आग्या

(मत्ती २२:३४-४०; लूका १०:२५-२८)

28आग शास्त्रीगोळ दा टु ऊंद बंदकु आंदरी विवाद माळ्त केळदुन, अदिक ईद जान्सकु कि यीशु सदूकीगोळी वळ्लीद रीति देल उत्‍तर कोट्टुन, आऊन से केळदुन, “सब से मुख्य आग्या यातोद आद?”

29यीशु आऊक उत्‍तर कोट्टुन, सब आग्यागोळ दा टु ईद मुख्य आद: “हे इस्त्राएल इन लॉकुरा केळी! प्रभु नामव परमेश्वर ऊंदा प्रभु आन, 30अदिक नी प्रभु तान परमेश्वर से तान पुरा मन देल, अदिक तान पुरा जीव देल, अदिक तान पुरा बुद्धी देल, अदिक तान पुरा ताकत देल प्यार ईटेत.” 31अदिक दुसरा आग्या ईद आद, “नी तान मान्ना हातळोर से तांदा घाई प्यार ईटेत. ईव येढ्ढ आग्यागोळी बिटकु दुसरा यातु धोळ्द आग्या ईलच.”

32नियमगोळ गुरु यीशु से अंदुन, “हे गुरु,” हापाळ वळ्लीद! नी खरा अन्द कि परमेश्वर ऊंदा आन, अदिक आऊक बिटकु अदिक याऊ दुसरा परमेश्वर हैलेच. 33अदिक आऊन से पुरा मन, अदिक पुरा बुद्धी, अदिक पुरा जीव, अदिक पुरा ताकत देल प्यार ईटेत; अदिक बाजुवाळेर से तान घाई प्यार ईटेत, पुरा अग्नि-बलिगोळ्द अदिक पशु-बलिगोळ से यक्कुल आद. 342

याग यीशु नोळदुन कि आव समझदारी देल उत्‍तर कोटुन, रा आऊन से अंदुन, “नी परमेश्वर उन राज्य टु दुर हैलेच.”

अदिक यारीकु बाक आऊन से येनु केळोद हिम्मत आगीदील.

मसीह दाऊद उन पार हुन?

(मत्ती २२:४१-४६; लूका २०:४१-४४)

35बाक यीशु मंदिर दा उपदेश माळतेला ईद अंदुन, “नियम इन गुरुगोळ अंदुर कि मसीह ह्यांग दाऊद उन औलाद आग सकतान?” 36दाऊद तान पवित्र आत्मा अन्द सामर्थ्य देल हिंग अंदुन:

प्रभु परमेश्वर नान प्रभु से अंदुन,

“नान ऊमा कय मा कुरूल,

यागासताका कि ना नीनोर दुश्मनगोळी अपमान काल दिशी तरालिन.”

37दाऊद रा खुद अच आऊक प्रभु अनतान, बाक आव आऊन पार ह्यांग आदुन?

नियम इन गुरुगोळ से सावधान ईरी

(मत्ती २३:१-३६; लूका २०:४५-४७)

अदिक भीळ दाकळोर लॉकुर आऊंद मात खुशी देल केळतोगोर. 38यीशु तान उपदेश दा आंदुर से अंदुन, “शास्त्रीगोळ से सावधान ईरी, सम्मान सिक्‍कोर साटी आंदुर ऊद्द-ऊद्द च्वांगा हाक्‍कु वयाळतार अदिक सात्‍तागोळ दा खुद इक नमस्कार माळसुसोद आंदरी वळ्लीद हततद. 39अदिक यहूदी लॉकुर्द सभागृहगोळ दा मुख्य आसन अदिक भोज दा मुख्य जागा भी चाहास्तार. 40आंदुर रांड्यागोळ्द मान्नागोळ इक तिंद बुळतार, अदिक लॉकुरी दिखावा साटी हापाळ होत्त ताका प्रार्थना माळतेला ईरतार. इंदरी यक्कुल से यक्कुल दण्ड सिक्‍कीत.”

कंगाल रांड्या अन्द दान

(लूका २१:१-४)

41यीशु मंदिर इन दानपेटी इन मुंद कुर्तकु नोळतोगोन कि लॉकुर मंदिर इन दानपेटी दा याता प्रकार देल पैस्या हाकतार; अदिक यक्कुल पैस्यावाळेर लॉकुर भी हापाळ येनारा हाकदुर. 42इटुर दा ऊंद कंगाल रांड्यागीत बंदकु तांबा अन्द येढ्ढ स्याण-स्याणेव सिक्‍का हाकदुर यदुर किमत ईतु आतुटु ऊंद पैस्या अन्द बराबर ईतीदाद, हाकदुर. 43आग यीशु तान चेलागोळी हात्‍ती कारूकु आंदुर से अंदुन, “ना नीम से खरा खरा अनतीन, कि मंदिर इन दानपेटी दा हाक्‍कावाळेर दा टु ई कंगाल रांड्यागीत सप्पा मुंदुर से यक्कुल हाकदुर; 44यतिकी सप्पा मुंदुर तान बळोतरी दा टु हाक्यार, लेकीन इक तांद कमी दा टु जो येनारा आकिन ईरोद, इदुर मतलब तांद पुरा जीविका हाक्‍क बुटार.”