ዛካርያሳ 13

ናጋራፐ ጌየ

1ኡባፈ ዎልቃማ ጎዳይ ሀይሳዳ ያጌስ፦ “ሄ ዎደ ዳዊታ ኮቻታነ የሩሳላመን ደኤይሳታ ናጋራፐነ ቱናተፈ ጌሽያ ፑልቶይ ቃና። 2ሄ ዎደ ታኒ ኤንቲ ናምአን ቆፈቶና መላ ኤቃታ ሱን ቢታፈ ይሳና። ቃስ ናበታነ ቱና አያናታ ቢታፈ ይሳና። ታኒ ኡባፈ ዎልቃማ ጎዳይ ሀይሳ ኦዳይስ። 3ቃስ ኦንካ፥ ታኒ ናበ ጊኮ፥ እያ አዋነ አይያ እያ፥ ‘ኔኒ ጎዳ ሱንን ዎርዶ ኦድያ ግሾ፥ ሀይቃናዉ በሴስ’ ያጋና። እ ትንብተ ኦድያ ዎደ እያ አዋይነ አይያ እያ ጫድድ ዎና። 4ሄ ዎደ ታኒ ናበ ግያ ኦንካ ባ በእዳ ቆንጨን ዬላታና። ቃስ አሰ ጭማናዉ እክሰይ ደእያ ማኦ ማኤና። 5ሽን እ፥ ‘ታኒ ናበ ግድከ፤ ናአተፈ ዶማዳ ቢታ ኦያ አስ’ ያጋና። 6እስ አስ፥ ‘ያትን፥ ሀ ነ ቦላ ደእያ ማዱንይ አይቤ?’ ያግድ ኦይችኮ፥ እ፥ ‘ሀይስ ታኒ ታ ላገታ ሶን ማዱንፅዳይሳ’ ያጋና” ያጌስ።

ሄንንቾይ ሾጨትን ዶርሳት ላለትዶሶና

7“ማሻዉ ደንዳ፥ ታዉ ማታ ግድዳ ታ ዶርሳታ ሄንንቹዋ ቦላ ባርካ! ዶርሳት ላለታና መላ ሄንንቹዋ ዎ። ታኒ ጉ ዶርሳታ ቦላ ታ ኩሽያ ደንና” ያጌስ ኡባፈ ዎልቃማ ጎዳይ።

8“ቢታ ኡባን ደእያ ሄ ኩሸ አሳፐ ናምኡ ኩሸይ ሾጨትድ ሀይቅን፥ እስ ኩሸ ፃላል አታና። ታኒ ጎዳይ ሀይሳ ኦዳይስ። 9ሀ አትዳ ስኮ አሳ ታኒ ታማን የጋና፤ ብር ታማን ጌያዳ ኤንታ ጌሻና፤ ዎርቀይ ፓጨትያዳ ፓጫና። ሄሳፈ ጉየ፥ ኤንቲ ታ ሱንን ዎሳና፤ ታኒ ኤንታ ስአና። ታኒ ኤንታ፥ ‘ታ አሰ’ ጋና፤ ኤንቲ፥ ጎዳይ፥ ‘ኑ ፆሰ’ ያጋና” ያጌስ።