ሌምሶ 5

ላይማተፈ ሃካ

1ታ ናአዉ፥ ታ ጭንጫተ ሀይዛ ስአ፤

ነ ሀይ ታ ትምርትያኮ ዛራ።

2ሄስ ነና ዎዛናማ ኦና፤

ነ ኦዳይ ነ ኤራተ ቆንጭሳና።

3ላይማ ማጫሳ እንፃርሳፈ እልሎ ኤስ ፆኬስ፤

እ ኦዳይ ኦይሳፐ አድ ሎፅኬስ።

4ሽን ዉርሰን እያ ጎዳረ ኡዳ ጫማዉሱ፤

ናምኡ ባጋራ ቃንፅያ ማሻዳ ቃራ።

5እ ቶሆይ ሀይቆኮ ቤስ፤

እ ታንጎይ ዱፎ ጋስ።

6እያ ደኦ ኦገ ቆፑኩ፤ እ ኦገይ ጌላ፤

ሽን ጌላ ግደይሳ እያ ኤሩኩ።

7ታ ናአዉ፥ ታና ስአ፤

ታ ኦደይሳፈ ከዮፓ።

8ላይማ ማጫሳ ሄራ ቦፕተ፤

እ ኬ ፐንግያኮ ሺቆፕተ።

9ሄስ ሀኖና እፅኮ ህንተ ቦንቹዋ ሀራት ኤካና፤

ናአተን ዎዛና ምኖ አሳ ኩሸን ህንተ ሀይቃና።

10ህንተ አቁዋ አላጋት ኤካና፤

ህንተ ዳቡራድ ሺሽዳባይ ሀራ አሳስ ግዳና።

11ዉርሰን ህንተ አሾይነ

ህንተ አሳተይ ዉርን ህንተ ዬካና።

12ህንተ ያጋና፤ “ታ አይስ ትምርተ እፃድና?

ታ ዎዛናይ ሴራ አይስ ካዴ?

13ታኒ ታ አስታማረታ ስአብከ፤

ታና ዞረይሳታ ዞርያ ኤካብከ።

14ሄሳ ግሾ፥ ታ አሳይ ሺቅዳ ሺቁዋን፥

ካዉያናዉ ማታስ” ያጋና።

15ኔኒ ነ ፑልቱዋፈ ሃ ኡያ፤

ነ ማቸ ፃላላ ሲቃ።

16ነ ፑልቱዋ ዳባባን፥

ነ ኦላ ሃ ደንባን አይስ ጉሳይ?

17ኤንታ ነዉ ቡዞ ኦ፤

ሀራ አላጋ ኡራራ ኮፆፋ።

18ነ ፑልቶይ ነዉ አንጀቶ፤

ነ ናአተ ማቸራ ኡፋይታ።

19ሎእያ ጋረዳንነ ኡፋይስያ ገንኤዳ

እ ንይ ኡባ ዎደ ነና አሎ፤

ኡባ ዎደ እ ሲቆይ ነና ድኦ።

20ታ ናአዉ፥ ላይማ ማጫሳን አይስ ድኤታይ?

ሀራ አሳ ማቾ አይስ ቆማይ?

21አስ ኦያባ ኡባ ጎዳይ በኤስ፤

እ ሄመትያ ሆሮጋ ኡባ ፄሌስ።

22ናጋራንቹዋ እ ኦዳ ናጋራይ ኦይኬስ፤

እያ ናጋራ ግተይ እያ ቃቼስ።

23እ ባ ኤያተን ይስ፤

ባና ናግቦና ግሾ ሀይቅስ።