ሌምሶ 4

ጭንጫተ ኡባፈ ቦላ

1ታ ናይቶ፥ ህንተ አዋ ዞርያ ስእተ፤

ሎይ ስእተ፤ ህንተ አኬካ ደማና።

2ታ ህንተዉ ሎኦ ትምርተ እምያ ግሾ፥

ታ ትምርትያ ካፕተ።

3ታካ ታ አዋስ ናአ፤

ታ አየስ እያ ዶስያ እስ ናአ።

4ታ አዋይ ታና ሀይሳዳ ያግድ ታማርስስ፤

“ታ ኦዳይ ነዉ ገሎ፤ ታ ኪታ ናጋ፤

ኔኒ ሄሳ ኦኮ ደኦን ዳና።

5ጭንጫተነ አኬካ ደማናዉ ምና፤

ታ ነዉ ኦድያባ ዶጎፓ፤ እያፐ ካረ ከዮፓ።

6ጭንጫተስ ዞኮ ዛሮፓ፤ እያ ነና አሻና፤

እዮ ዶሳ፤ እያ ነና ናጋና።

7ጭንጫተ አያ ግሾ እዮ ደማ፤

ነዉ ደእያባ ዉርስድ ኤክኮካ አኬካ ደማ።

8ነ እዮ ቦንቻ፤

እያ ነና ቁ ቁ ኦና፤

ነ እዮ ኦይክኮ፥ እያ ነና ቦንቻና።

9እያ ነ ሁጵያስ ሳባ ግዳና፤

ቦንቾ ካላቻ እማና” ያግስ።

10ታ ናአዉ፥ ስአ፤ ታ ኦደይሳ ኤካ፤

ነ ላይይ አዱቃና።

11ታኒ ነና ጭንጫተ ኦገ ካለና፤

ሱረ ሆሮጋ በሳና።

12ነ ሄመትያ ዎደ ብያባይ ዴና፤

ዎፅያኮካ በታካ።

13ታ ትምርትያ ሎይ ናጋ፤ የዶፋ፤

ትምርተይ ነዉ ደኦ እምያ ግሾ ሎይ ናጋ።

14ናጋራንቾታ ኦግያራ ቦፓ፤

ኢታ አሳታ ኦግያን ሄመቶፋ።

15እያፐ ሃካ፤ እያን ሄመቶፋ፤

ጉየ ስማ፤ ነ ኦግያን ባ።

16ኤንቲ ኢታባ ኦና ደእሽን ስኮይ ኤከና፤

ኤንቲ አሰ ቦና ደእሽን ስኮይ ኤፈና።

17ኤንቲ ናጋራ ካዳ ሞሶና፤

ጌላተ ኡሻዳ ኡዮሶና።

18ፅሎታ ኦገይ ሴታ ጋላስ ጋካናዉ፥

ጉጅ ጉጅ ፖእያ ዎንታ ፃልቀ መላ።

19ሽን ጌላታ ኦገይ ሳካና ማ መላ፤

ኤንቲ አይብን በትያኮካ ኤሮኮና።

20ታ ናአዉ፥ ታ ኦደይሳ ስአ፤

ነ ሀይ ታኮ ዛራ።

21ነ አይፍያ ስንፈ ሃሶፋ፤

ነ ዎዛናን ናጋ።

22ኤንታ ደምያ ኡባስ ኤንቲ ደኦ፤

ኤንቲ አሳተስ ፓያተ እሞሶና።

23ደኦይ እያፐ ፑልትያ ግሾ፥

ኡባፈ አዳ ነ ዎዛና ምንዳ ናጋ።

24ነ ዶናፐ ኢታ ሃሳያ ድጋ፤

ዎርዶ ሃሳያ ነ ማታፐ ሃሳ።

25ስት ጋዳ ስን ፄላ፤

ነ አይፈይ ነ ስንን ደእያባ

ትሽ ኦድ ፄሎ።

26ነ ቶሁዋ ኦግያ ጊግሳ፤

ሱረ ኦገ ፃላላን ሄመታ።

27ሱረ ኦገፐ ኡሻች ሀድርስ ጎፓ፤

ነ ቶሆይ ኢታ ኦገ ቦናዳ ናጋ።