ሌምሶ 30

አጉራ ሌምሶታ

1ያቀ ናኣ አጉራ ሌምሶት ሀይሳፈ ካልድ ፃፈትዳይሳታ። አጉር እትኤላስነ ኡካላስ ሀይሳ ሃሳይስ። 2ታኒ አሳ ኡባፈ አዳ ኤያ፤

አሳስ ደእያ አኬክ ታዉ ዴና።

3ታኒ ጭንጫተ ታማራብከ፤

ጌሻ ፆሳባካ ኤርከ።

4ሳሎ ፑደ ከይድ ዱገ ዎዳይ ኦኔ?

ጫርኮ ባ ኩሸን ኦይክዳይ፥

ሃ ባ አፍላን ዪጭዳይ፥

ሳኣ ጋፃ ምንድ ኤስዳይ ኦኔ?

እያ ሱንይ ኦኔ?

እያ ናኣ ሱንይ ኦኔ?

እያ ኤርያ ግድኮ አነ ታዉ ኦዳ?

5ፆሳ ቃላን ቦረይ ባዋ፤ ኡባይ ቱማ

እያን አማነትያ ኡባስ እ ጎንዳለ።

6እያ ቃላ ቦላ አይባካ ጉጆፋ፤

ጉጅኮ እ ነና ሴራና፤

ነ ዎርዳንቾ ግደይሳ እ ቆንጭሳና።

7ጎዳዉ፥ ታ ነና ናምኡባ ኦይቻይስ፤

ታ ሀይቃና ጋካናዉ ኤንታ ታና ድጎፋ።

8ታ አሰ ጭሞና መላነ ዎርዶ ሃሳዮና መላ ታና ናጋ፤

ታዉ ኮሽያ ካ እማፈ አትሽን፥ ታና ዱረ ዎይኮ ማንቆ ኦፋ።

9ዱረ ግዳዳ፥ “ጎዳይ ኦኔ?” ጋዳ ነና ካዳና፤

ማንቆ ግዳዳ፥ ካይሳዳ ታ ፆሳ ሱን ጫይሳና።

10ነና ባዶና መላነ

እያ ባደይ ነዉ ጎመ ግዶና መላ፥

አይልያ እያ ጎዳራ ዝግሮፓ።

11ባ አዋ ባድያነ ባ አይዉ አንጆና የለተ ደኤስ።

12ዳሮ ቱና ግድ ኡትድ

ባንታና ጌሽ ኦያ አሳት ደኦሶና።

13ኦቶሮን ኩምዳ አሳትነ

አሰ ካድ ፄልያ አሳት ደኦሶና።

14ኤንታ አቻይ ማሸ ግድን፥

ኤንታ ጋጮይ ቶራ ግድን፥

ማንቆታነ መቶታንቾታ ናቅድ፥

ኤንታባ ቦንቅያ አሳት ደኦሶና።

15ኡላስ ናምኡ ማጫ ናይት ደኦሶና፤

ኤንቲ፥ “ሀማ! ሀማ!” ያግድ ዋሶሶና።

ካልድ ኤሮና ሄባት ደኦሶና፤

ኦይዳንይ ቃስ “ግዳና” ግድ ኤረና።

16ሄሳት፥

ዱፎ፥

ማይንዳ ማጫስ፥

ሃ ካልድ ኤሮና መላ ቢታነ፥

“ግዳና!” ግድ ኤሮና ታማ።

17ባ አዋ ለቅያ ናኣ አይፍያ፥

ባ አይያ ጭምን ካያ ናኣ አይፍያ፥

ዛንጋራን ደእያ ቁሮት ዎጫና፤

እያ አሹዋ አንኮት ማና።

18ታና ሄባት ማላልሶሶና፤

ኦይዳንይ ኡባ ታዉ ገለና።

19ሄሳት፥

ሳሎራ ፓልያ አርጋን፥

ዛላ ቦላራ ኮልፅያ ሾሽ

አባ ቦላራ ብያ ማርካበነ

ጌላኦራ ስቆ ኦይከትዳ አደ።

20ላይማ ማጫስ ሀንያ ሀኖይካ ሄሳ መላ፤

እያ ማሱ፤ ሽን ባ ዶና ቁቻዳ፥

“ታኒ አይኮካ ባላቢከ” ያጋዉሱ።

21ሄባን ቢት ቃፄስ፤

ኦይዳንዋ ኡባ ቶካናዉ ዳንዳኤተና።

22ሄሳትካ፥

አይለይ ካዎትዳ ዎደ፥

ኤያ አስ ካ ካልዳ ዎደ፥

23አስ እፅዳ ማጫስ አዝና ገልዳ ዎደነ

ማጫ አይልያ ባ ጎዳትዉ ላትዳ ዎደ መትያ ሀኖታ።

24ሳአ ቦላ ኦይዱ ጉ መተት ደኦሶና፤

ሽን ኤንቲ አዳ ጭንጫ።

25ሄሳትካ፥

ጩንጫለይ ዎልቅ ባይና መተ፤

ሽን ባንታዉ ምያባ ቦነ ሺሽድ፥ ምንጆሶና።

26ጉፓለት ዎልቅ ባይናይሳታ፤

ሽን ባንታ ኬ ዛላ ቆጶን ኬፆሶና።

27ቦለታስ ካዎይ ባዋ፤

ሽን ኤንቲ ኡባይ ማራን ዛቶሶና።

28ዛረት ኩሸን ኦይከቶሶና፤

ሽን ካዎ ጋን ደኦሶና።

29ባንታ ማታ በስሸ ሄመትያ ሄ መተት ደኦሶና፤

ኦይዳንይ ሎኦ ሄመ ሄመቴስ።

30ሄስካ፥

ዶአ ኡባፈ ምኖነ ያሽ ኤሮና ጋሞ።

31ማጫ ኩቶታ ግዶን ሄመትያ አደ ኩቶ፥

ዉደ ካለያ ዴሻ ኮለ፤

ባ ኦላንቾታ ግዶን ቆንጨን ኤቅያ ካዋ።

32ኔኒ ኤያዳ ኦቶርትዳባ ግድኮካ፥

ኢታ ኦናዉ ሀልችዳባ ግድኮ፥

አነ ታክ ጋዳ ቆፓ።

33ማ ቡከይ ኦይሱ ከሰይሳዳ፥

ሲ ድችን ሱ የይሳዳ፥

ሀንቆ ደንይ ኦሹ ኤሄስ።