ሌምሶ 21

1ካዎ ዎዛን ጎዳ ኩሸና፤

እያ ዎዛና ዋ ሃዳ

ባ ኮይዳ ሶ ዛሬስ።

2አስ ኦያባ ኡባይ እያዉ ልከ ዳኔስ፤

ሽን ጎዳይ እያ ዎዛና ቆፋ ፓጬስ።

3ያርሾ ያርሻናፐ አድ፥

ፅሎነ ሱረ ኦይሳ ጎዳይ ዶሴስ።

4ኢታት ኦቶሮንነ ጬቀተን ኤረቶሶና፤

ሄስ ቃስ ናጋራ።

5ምኖ ኦያ አሳ ሀልቾይ ዱረዬስ፤

ሽን ኤሶትያ ኡባይ ማንቄስ።

6ዎርዶን ዳጋይዳ ሻሎይ ፐንቶዳ ዬስ፤

ሄሳ ኮየይሳት ሀይቆ ኮዮሶና።

7ኢታት ሱረባ ኦናዉ ኮዮና ግሾ፥

ኤንታ ጌላ ኦሶይ ኤንታ ኤክድ ቤስ።

8ናጋራንቾት ጌላ ኦገን ሄመቶሶና፤

ሽን ጌሻት ሱረባ ኦሶና።

9ዶናትያ ማችራ እስ ኬን ዳናፐ

ካረ ዳርማቻን ዱስ ሎኦ።

10ኢታት ኢታባ ኦናዉ አሞቶሶና፤

ባንታ ሾሮታስ ቃቶኮና።

11ቀልቅስያ አስ ሴረትያ ዎደ

ዎዛን ባይና ኡራይ ጭንጫተ ታማሬስ፤

ዎዛናማ ኡራይ ኤራ ደሜስ።

12ፅሎ ፆሳይ ኢታታ ሶን ኦሰትያባ ኡባ በኤስ፤

ኤንታ ሽር የግድ ይሴስ።

13ማንቆታ ዋሱዋ ስአናፐ ግድ፥

ባ ሀይ ቱጭያ ኡራይ፥ እካ ዋሳና፤

እ ዋስን አልያ አስ ያና።

14ጌማን እምያ እሞይ ሀንቆ ዶሽሴስ፤

ቆሳን እምዳ ዎፈይ ሀንቆ እርፅሴስ።

15ሱረ ፕርድ ፕርደትያ ዎደ፥

ፅሎት ኡፋይቶሶና፤

ሽን ኢታ ኦይሳታ ዳጋንስ።

16አኬካ ኦግያ ሃክያ ኡራ

ሀይቆይ ናጌስ።

17እንጀትን ዳና ግያ ኡራይ ማንቄስ፤

ዎይነነ ዛይተ ዶስያ ኡራይ ዱረተና።

18ፆሳ አሳታ አሻናዉ ኢታ አሳት ሴረቶሶና፤

አማነቶና አሳት ሱረ አሳታ ግሾ ሴረቶሶና።

19ዶናትያነ ይሎትያ ማችራ ዳናፐ

ባዞን ደኦይ ሎኦ።

20ዎዛናማ ኡራ ሶን ማልኦ ቁምነ ኦይስ ምንጀቴስ፤

ሽን ኤያ አስ ደእያባ ኡባ ምድጌስ።

21ፅሎተነ ሲቆ ኮይያ ኡራ ላይይ አዱቄስ፤

ሄ ኡራይ ፅሎተነ ቦንቾ ደሜስ።

22ዎዛናማ አስ ዎልቃማ ኦላንቾታ ካታማ ኦልድ ኦይኬስ፤

ኤንቲ አማነትያ ምኖ ሚፃ ላሌስ።

23ባ ዶናነ ባ እንፃርሳ

ናግያ አስ ባና መቶፐ ናጌስ።

24ኦቶረይነ ጬቀተይ ቀልቅስያ አስ፤

እ ኦቶራንቾ ግድዳ ግሾ አሳስ ቆፐና።

25ኦናዉ ኮዮና ግሾ

አዛላ አሞይ ዎስ።

26አዛላ አስ ኡባ ዎደ ዳሮባ ደማናዉ አሞቴስ፤

ሽን ፅሎይ ባዉ አሾና እሜስ።

27ጎዳይ ኢታታ ያርሹዋ እፄስ፤

ኤንቲ እያዉ ኢታ ቆፋን ሺሽያ ያርሹዋ አድ እፄስ።

28ዎርዶ ማርክ ያና፤

ሽን ቱማ ማርክ ኤቅድ ዳና።

29ኢታ አስ በሶና ፃላ ፃሌስ፤

ሽን ሱረ አስ ዩሽ ቆፔስ።

30አስ ባ ጭንጫተን፥ አኬካንነ ዞረን

ጎዳራ ኤቀታናዉ ዳንዳኤና።

31ኦላስ ፓራ ኮራናዉ ዳንዳኤቴስ፤

ሽን ፆኖይ ጎዳባ።