ሌምሶ 19

1ባ ዶናን ዎርዶትያ ኤያ አሳፐ

ባ ደኡዋን ቦረይ ባይና ማንቆይ ሎኦ።

2ኤር ባይና ዳፈተ ሎኦ ግደና፤

ኤሶ ዳሮይ ኦገ ባለስ።

3አስ ባ ኤያተን ባ ደኡዋ ኢሴስ፤

ያትድ ጎዳ ቦላ ይሎቴስ።

4ዱረተ ዳሮ ላገ ሺሼስ፤

ሽን ማንቆተ ደእያ ላገታ ዱስ።

5ዎርዶ ማርክ ሴረቶና አተና፤

ዎርዶ ኦደተይ ከስ ኤከና።

6ዳሮ አሳይ ሹማ ሶምኦ ኮዮሶና፤

እሞታ እምያ አሳራ አስ ኡባይ ዳቦቴስ።

7ማንቆ አስ ሀር አቶሽን እያ እሻት እፆሶና፤

እያ ላገት እያፐ ሃኮሶና፤

እ ኤንታ አዳሽንካ ኤንቲ እያ ኮዮኮና።

8ጭንጫተ ደምያ አስ ባ ሸምፑዋ ዶሴስ፤

ኤራተ ምንድ ኦይክያ ኡራስ እንጀቴስ።

9ዎርዶ ማርክ ሴረቶና አተና፤

ዎርዶ ኦደተይ ያና።

10ኤያ አሳስ እንጀ ደኦይ በሰና፤

አይለይ ሀላቃታ ሃሮይ ዳሮ ኢታ።

11ጭንጫተ አሰ ዳንዳአ ታማርሴስ፤

ቆሆ ካድ አ ቦንችሴስ።

12ካዋ ሀንቆይ ጋሞ ጉደ መላ፤

ሽን እያ ናሾይ ማታ አጭስያ አካ መላ።

13ኤያ ናእ ባ አዋ ይሴስ፤

ዶናማ ማቻ ፆክያ ኬ መላ።

14አስ ኬነ ሻሎ አዉፐ ላቴስ፤

ሽን አኬካ ማቾ ጎዳይ እሜስ።

15አዛላተ ስኮ ኤሄስ፤

ኦሶ ኦና አስ ኮሻቴስ።

16ኪታ ናግያ አስ ባ ሸምፑዋ ናጌስ፤

ሽን ቀል ግያ አስ ሀይቄስ።

17ማንቆስ ኬህያ አስ ጎዳስ ታልኤስ፤

ጎዳይ ሄ ሎኦ ኦሱዋ ግሾ ዎይቴስ።

18ስሞ ኡፋይስ ደእሽን ነ ናይታ ሴራ፤

ሴሮና እፅኮ፥ ነ ኤንታ ይሳሳ።

19ኤለ ሸነትያ አስ ባ ጋትያ ኤካናዉ በሴስ፤

ኔኒ እያ እስ ቶሆ አሽያባ ግድኮ፥

ሀራ ዎደካ ነ እያ ሄሳዳ አሻናይስ አተና።

20ዞረ ስአ፤ ታማራናዉ ኮያ፤

ኔኒ ዉርሰ ጋካናዉ ጭንጫ ግዳና።

21አስ ዳሮባ ሀልቼስ፤

ሽን ጎዳይ ግዳባይ ፖለቴስ።

22አሳፐ ኮየተይ አማነተ፤

ዎርዶ ግዳናፐ ማንቆ ግደይስ ሎኦ።

23ጎዳስ ያሽ ደኦኮ ካለስ፤

እያ ያይያ አስ ካልድ ደኤስ፤ ኢት እያ ቦቸና።

24እስ እስ አስ ዳሮ አዛላ፤

ሀር አቶሽን ዎፀን ቱሽክዳ

ኡይ ፑደ ባራናዉ ዋየቴስ።

25ኔኒ ቀልቅስያ አስ ሾጭኮ፥

አኬክ ፓጭዳይስ ጭንጫተ ታማራና፤

አኬካ አስ ነ ሀንቀትኮ፥ እ ኤራተ ደማና።

26ባ አዋ ቦንቅያ ናአይ፥

ባ አይዉ የደያ ናአይ፥

ዬላነ ካዉሻተ ኤህያ ናአ።

27ታ ናአዉ፥ ነ ዞረ ስኦና እፅኮ፥

ኤራ ኦግያፐ ሃካሳ።

28ዎርዶ ማርክ ሱረ ፕርዳ ቦላ ቀልቅሴስ፤

ኢታ አሳ ዶን ኢታተ ምቴስ።

29ቀልቅስያ አሳስ ፕርዳ

ኤያታስ ዋ ኮሼስ።