ታይቦ 30

ጋሶ ዎጋ

1ሙሰይ እስራኤለ ዘረ ሀላቃታኮ፥ “ጎዳ ኪታይ ሀይሳ፤ 2እስ አስ ጎዳስ እስባ ኦናዉ ጫቅኮ ዎይኮ እስባፐ ባና ናጋናዉ ቃንግኮ ጉየ ጎና ፖሎ።

3“ባ አዋ ሶን ደእያ ጌላእያ ጎዳስ እስባ ኦናዉ ጫቅኮ ዎይኮ እስባፐ ባና ናጋናዉ ቃንግኮ፥ 4እ አዋይ እያ ጫቅዳይሳ ዎይኮ እያ ቃንገትዳይሳ ስእድ፥ እዮ ድጎና እፅኮ፥ እያ ፖላናዉ ኮሼስ። 5ሽን እ አዋይ ሄሳ ስእድ እዮ ድግኮ እ ጫቆይነ እ ቃንገይ አታናዉ ዳንዳኤስ። እ አዋይ እዮ ድግዳ ግሾ ጎዳይ እዉ አቶ ጋና።

6“ገሎና ማጫ ናእያ ጫቃዳ ደአሸ ዎይኮ እስባፐ ባና ናጋናዉ ቃንገታዳ ደአሸ አዝና ገልኮ፥ 7እ አዝናይ ሄሳ ስእድ እዮ ድጎና እፅኮ እያ ባ ጫቁዋነ ባ ቃንገ ፖላናዉ ኮሼስ። 8ሽን እ አዝናይ ሄሳ ስእድ እዮ ድግኮ እያ ጫቅዳ ጫቆይ ዎይኮ ቃንገትዳ ቃንገይ እዮ ጎመና። ሄሳ ጎዳይ እዉ አቶ ጋና።

9“ሽን አምእያ ዎይኮ ሳዮ ማጫስ ጫቅዳ ጫቁዋ ዎይኮ ቃንግዳ ቃንገ ፖላናዉ በሴስ።

10“አዝናራ ደእያ ማጫስ ጫቅኮ ዎይኮ እስባ ኦናዉ ቃንግኮ፥ 11እ አዝናይ ሄሳ ስእድ እዮ ድጎና እፅኮ፥ እያ ጫቅዳ ጫቁዋነ ቃንገትዳ ቃንገ ፖሎ። 12እ አዝናይ ሄሳ ስእዳ ጋላስ እዮ ድግኮ እ ጫቆይ ዎይኮ እያ ኦናዉ ቃንገትዳ ቃንገይ እዮ ጎመና። እ አዝናይ ድግዳ ግሾ ጎዳይ እዉ አቶ ጋና። 13እ አዝናይ እያ ጫቅዳ ጫቁዋ ዎይኮ እያ ባና ካዉሻናዉ ቃንገትዳ ቃንገ ላላናዉ ዎይኮ ምንናዉ ዳንዳኤስ። 14ሽን እ አዝናይ ሄ ጋላስ ዎይኮ ዎንተ ጋላስ አይኮካ ጎና እፅኮ፥ እ ጫቁዋ ዎይኮ እ ቃንገ ምንስ ጉሱ። እ ሄሳ ስእድ፥ ስእ ጊኮ እ ቆፋ ማእስ ጉሱ። 15ሽን እ ሄሳ ስእ ጋምእድ ዛር ድግያባ ግድኮ ሄሳስ ኦይሸተይ እያ” ያግስ።

16ህዛ ሀይስ አዝና ግዶንነ ማች ግዶን፥ ባ አዋራ ሶን ደእያ ጌላኦ ግዶንነ እ አዋ ግዶን ደእያ ጋሄተባ ጎዳይ ሙሰስ እምዳ ዎጋ።