ጌሻ ማፃፋ
ታይቦ 29
ሞይዘ ፑኖ ያርሾ
“ላፑን አጌናስ ኮይሮ ጋላሳን ጎይናናዉ ሺቅተ፤ አይ ኦሶካ ኦፍተ፤ ሄ ጋላሳይ ሞይዘይ ፑነትያ ጋላስ። ቦረይ ባይና እስ ዎፋኖ፥ እስ ማራዘነ እስ ላይ ኩምዳ ላፑን ዶርሳ ኡርገታ ሳውያ ፁሳ ያርሾ ኦድ ጎዳስ ያርሽተ። ሄ ዎፋኑዋራ ሻማሆ ዛይተን ሙኑቀትዳ ሄ ክሎ ግራመ ሎኦ ግስተ ለ፥ እስ ማራዝያራ ናምኡ ክሎ ግራመ ግስተ ለነ፥ ላፑን ዶርሳ ኡርገታፐ እስ እስ ኡርግያራ እስ ክሎ ግራመ ለ ያርሽተ። ቃስ እስ ኮለ ህንተዉ ናጋራ አቶተስ ያርሽተ። ዎጋይ ኪተይሳ፥ አጌና ፄሮን ያርሸትያ ፁሳ ያርሾ ቦላ፥ ካ ያርሾ ቦላ፥ ጋላስ ጋላስ ያርሸትያ ፁሳ ካ ያርሾ ቦላነ ኡሻ ያርሾ ቦላ ጉጅድ ያርሽተ፤ ሄስ ጎዳ ሳውያ ፁሳ ያርሾ።
ናጋራ አቶተ ያርሾ
“ላፑን አጌናን ታማን ጋላሳን አይ ኦሶካ ኦፍተ፤ ህንተና ካዉሽድ ጎይኖስ ሺቅተ። ቦረይ ባይና እስ ዎፋኖ፥ እስ ማራዘነ እስ ላይ ኩምዳ ላፑን ዶርሳ ኡርገታ ሳውያ ፁሳ ያርሾ ኦድ ጎዳስ ያርሽተ። ካ ያርሾ ኦድ እስ ዎፋኖራ ሻማሆ ዛይተን ሄ ክሎ ግራመ ሎኦ ግስተ ለ፥ እስ ዶርሳ ኡርግያራ ናምኡ ክሎ ግራመ ለነ ላፑን ዶርሳ ኡርገታፐ እስ እስ ኡርግያራ እስ ክሎ ግራመ ለ ያርሽተ። ቃስ ናጋራ ያርሾ ኦድ እስ ኮለ ያርሽተ። ናጋራ አቶ ያርሹዋ ቦላ፥ ጋላስ ጋላስ ያርሸትያ ፁሳ ያርሹዋ ቦላ፥ ካ ያርሹዋ ቦላነ ኡሻ ያርሹዋ ቦላ ሄሳ ጉጅድ ያርሽተ።
ሻቃራ ባኣለ ያርሾ
(ሌወ 23:33-44)
“ላፑን አጌናን ታማነ እቻሻን ጋላሳን፥ ዴፆ ኦሶ ኦፍተ፤ ላፑን ጋላስ ኩመ ጎዳ ቦንቻናዉ ሻቃራ ባኣለ ቦንችተ። ቦረይ ባይና ታማነ ሄ ዎፋኖታ፥ ናምኡ ማራዘታ፥ እስ ላይ ኩምዳ ታማነ ኦይዱ ዶርሳ ኡርገታ ሳውያ ፁሳ ያርሾ ኦድ ጎዳስ ያርሽተ። ካ ያርሾ ግዳና መላ ታማነ ሄ ዎፋኖታፐ እስ እስ ዎፋኑዋራ ሻማሆ ዛይተን ሙኑቀትዳ ሄ ክሎ ግራመ ሎኦ ግስተ ለ፥ ናምኡ ማራዘታፐ እስ እስ ኡርግያራ ናምኡ ክሎ ግራመ ለነ ታማነ ኦይዱ ዶርሳ ኡርገታፐ እስ እስ ኡርግያራ እስ ክሎ ግራመ ለ ያርሽተ። ቃስ ናጋራ ያርሹዋስ እስ ኮለ ያርሽተ። ሄስ ጋላስ ጋላስ ፁሳ ያርሹዋ ቦላ፥ ካ ያርሹዋ ቦላነ ኡሻ ያርሾ ቦላ ጉጅድካ ያርሽተ።
“ናምአን ጋላሳን ታማነ ናምኡ ቦረይ ባይና ዎፋኖታ፥ ናምኡ ማራዘታነ እስ ላይ ኩምዳ ታማነ ኦይዱ ኡርገታ ያርሽተ። ዎፋኖታራ፥ ማራዘታራነ ዶርሳ ኡርገታራ ካ ያርሹዋነ ኡሻ ያርሹዋ ዎጋይ ኪተይሳ መላ ኤንታ ታይቡዋዳ ያርሽተ። ጋላስ ጋላስ ያርሸትያ ፁሳ ያርሹዋ ቦላ፥ ካ ያርሹዋ ቦላነ ኡሻ ያርሹዋ ቦላ ጉጅድ ናጋራ ያርሹዋስ እስ ኮለ ያርሽተ።
“ሄን ጋላሳን ቦረይ ባይና ታማነ እስ ዎፋኖታ፥ ናምኡ ማራዘታ እስ ላይ ኩምዳ ታማነ ኦይዱ ዶርሳ ኡርገታ ያርሽተ። ዎፋኖታራ፥ ማራዘታራነ ዶርሳ ኡርገታራ ካ ያርሹዋነ ኡሻ ያርሹዋ ዎጋይ ኪተይሳ መላ ኤንታ ታይቡዋዳ ያርሽተ። ጋላስ ጋላስ ያርሸትያ ፁሳ ያርሹዋ ቦላ፥ ካ ያርሹዋ ቦላነ ኡሻ ያርሹዋ ቦላ ናጋራ ያርሾስ እስ ኮለ ጉጅድ ያርሽተ።
“ኦይዳን ጋላሳን ቦረይ ባይና ታሙ ዎፋኖታ፥ ናምኡ ማራዘታነ እስ ላይ ኩምዳ ታማነ ኦይዱ ዶርሳ ኡርገታ ያርሽተ። ዎፋኖታራ፥ ማራዘታራነ ዶርሳ ኡርገታራ ካ ያርሹዋነ ኡሻ ያርሹዋ ዎጋይ ኪተይሳ መላ ኤንታ ታይቡዋዳ ያርሽተ። ጋላስ ጋላስ ያርሸትያ ፁሳ ያርሹዋ ቦላ፥ ካ ያርሹዋ ቦላነ ኡሻ ያርሹዋ ቦላ ጉጅድ ናጋራ ያርሾስ እስ ኮለ ያርሽተ።
“እቻሻን ጋላሳን ቦረይ ባይና ኡዱፉን ዎፋኖታ፥ ናምኡ ማራዘታነ እስ ላይ ኩምዳ ታማነ ኦይዱ ዶርሳ ኡርገታ ያርሽተ። ዎፋኖታራ፥ ማራዘታራነ ዶርሳ ኡርገታራ ካ ያርሹዋነ ኡሻ ያርሹዋ ዎጋይ ኪተይሳዳ ኤንታ ታይቡዋዳ ያርሽተ። ጋላስ ጋላስ ያርሸትያ ፁሳ ያርሹዋ ቦላ፥ ካ ያርሹዋ ቦላነ ኡሻ ያርሹዋ ቦላ ጉጅድ ናጋራ ያርሾስ እስ ኮለ ያርሽተ።
“ኡሱፑን ጋላሳን ቦረይ ባይና ሆስፑን ዎፋኖታ፥ ናምኡ ማራዘታነ እስ ላይ ኩምዳ ታማነ ኦይዱ ዶርሳ ኡርገታ ያርሽተ። ዎፋኖታራ፥ ማራዘታራነ ዶርሳ ኡርገታራ ካ ያርሹዋነ ኡሻ ያርሹዋ ዎጋይ ኪተይሳ መላ ኤንታ ታይቡዋዳ ያርሽተ። ጋላስ ጋላስ ያርሸትያ ፁሳ ያርሹዋ ቦላ፥ ካ ያርሹዋ ቦላነ ኡሻ ያርሹዋ ቦላ ጉጅድ ናጋራ ያርሾስ እስ ኮለ ያርሽተ።
“ላፑን ጋላሳን ላፑን ዎፋኖታ፥ ናምኡ ማራዘታነ እስ ላይ ኩምዳ ታማነ ኦይዱ ዶርሳ ኡርገታ ያርሽተ። ዎፋኖታራ፥ ማራዘታራነ ዶርሳ ኡርገታራ ካ ያርሹዋነ ኡሻ ያርሹዋ ዎጋይ ኪተይሳ መላ ኤንታ ታይቡዋዳ ያርሽተ። ጋላስ ጋላስ ያርሸትያ ፁሳ ያርሹዋ ቦላ፥ ካ ያርሹዋ ቦላነ ኡሻ ያርሹዋ ቦላ ጉጅድ ናጋራ ያርሾስ እስ ኮለ ያርሽተ።
“ሆስፑን ጋላሳን ጎይናናዉ ሺቅተ፤ አይ ኦሶካ ኦፍተ። ቦረይ ባይና እስ ዎፋኖ፥ እስ ማራዘ፥ እስ ላይ ኩምዳ ላፑን ዶርሳ ኡርገታ ሳውያ ፁሳ ያርሾ ኦድ ጎዳስ ያርሽተ። ዎፋኖታራ፥ ማራዘታራነ ዶርሳ ኡርገታራ ካ ያርሹዋነ ኡሻ ያርሹዋ ዎጋይ ኪተይሳዳ ኤንታ ታይቡዋዳ ያርሽተ። ጋላስ ጋላስ ያርሸትያ ፁሳ ያርሹዋ ቦላ፥ ካ ያርሹዋ ቦላነ ኡሻ ያርሹዋ ቦላ ጉጅድ ናጋራ ያርሾስ እስ ኮለ ያርሽተ።
“ህንተ ጋሶ ያርሹዋ ቦላነ ህንተ ዶሳ ያርሹዋ ቦላ ፁሳ ያርሾ፥ ካ ያርሾ፥ ኡሻ ያርሾነ እስፈተ ያርሾ ባልያ ቦንቻናዉ ኪተትዳ ዎድያን ያርሽተ” ያግስ።
ሙሰይ፥ ጎዳይ ባና ኪትዳይሳ ኡባ እስራኤለ አሳስ ኦድስ።
ጌሻ ማፃፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.