ምክያሳ 6

ጎዳይ እስራኤለራ ሞተቴስ

1ጎዳይ እስራኤለ አሳስ ኦደይሳ ስእተ።

አቤት ጎዳዉ፥ ደንዳዳ ቃ ደረታ ስንን ፕርደታ፤ ኔኒ ኦድያባ ዙማት ስኦ። 2ህንተ ደረት፥ ህንተ ምኖ ሳኣ ባሶት፥ ጎዳይ ሞትያ ሞቱዋ ስእተ። ጎዳይ ባ አሳራ ሞተቴስ፤ እስራኤለ አሳራ ፓላሜስ።

3ጎዳይ፥ “ታ አሳዉ፥ ታኒ ህንተና አይ ቆሀድና? ታኒ ህንተዉ ዋናዳ ቶሆ ግዳድና? አነ ታዉ ኦድተ! 4ታኒ ህንተና ግብፀ ቢታፈ ከሳስ፤ ታ ህንተና አይለተ ቢታፈ ዎዛስ። ህንተና ካለና መላ ሙሰ፥ አሮናነ ማይራሞ ህንተዉ እማስ። 5ታ አሳዉ፥ ሞአበ ካዋ ባላቅ ነዉ ቆፕዳባነ ብኦራ ናአይ ባላም እያዉ ዎይግድ ዛርዳኮ አኬክተ። ኔኒ ሴፅማፐ ጋልጋላ ብያ ዎደ፥ ኦገን ሀንዳባ አነ ቆፕተ። ሄሳ ህንተ ቆፕኮ ታኒ ጎዳይ ህንተና አሻናዉ ኦዳባ ኡባ ህንተ አኬካና” ያጌስ።

6ጎዳ፥ ቃ በሳን ደእያ ፆሳ ስንን ጎይናናዉ ያሸ ታኒ አይ ኤካዳ ሺቆ? እያዉ ፁሳ ያርሾ ግዳና መላ እስ ላይ ዎፋኖ ኤካዳ ዮ? 7ጎዳይ ሙኩሉ ዶርሳ ማራዘታን ዎይኮ ታሙ ሙኩሉ ሻፋን ደእያ ሃ መላ ሻማሆ ዛይተን ኡፋይታንዴ? ታ ናቁዋ ግሾ፥ ታ ባይራ ናኣ፥ ታ ሸምፑዋ ናጋራ ግሾ ታ የሉዋ እሞ?

8አሳ ናኦ፥ ጎዳይ ነዉ ሎኦባ ኦድ ዎስ። ጎዳይ ኔፐ ኮየይ አይቤ? ኔኒ ሱረ ፕርዳና መላ፥ ማሮታ ዶሳና መላነ አሽከተን ነ ፆሳራ ዳና መላ ግደኔ?

እስራኤለ ናቆነ ፕርደተ

9ጎዳይ፥ “የሩሳላመ ካታማ ፄግድ፥ ‘እያ ሱንስ ያሸተ ጭንጫተ’ ሴራ ፃምአነ እያ ጊግስዳይ ኦነኮ አኬክተ። 10ናጋራንቾይ ገነን ባ ሶን ሺሽዳ ሻሉዋነ እፀትዳ ዎርዶ ማካ ሚሸታ ታኒ ዶጋነዬ? 11ያትን፥ ታኒ ዎርዶ ምዛነን ዎርዶ ማካ ሚሸታ ዋታዳ አቶ ጎ? 12ሄ ካታማ ዱረት ጌላተን ኩምዳይሳታ። እያን ደእያ አሳ ኡባይ ዎርዳንቾ፤ ኤንታ እንፃርሳይ ኢታ። 13ሄሳ ግሾ፥ ታኒ ህንተ ናጋራ ግሾ ህንተና ይሳናዉ ደንዳስ። 14ህንተ ማና፥ ሽን ካለከታ፤ ኮሽ ህንተፈ ዱፀና። ህንተ ቡርድ ሺሻና፥ ሽን ህንተዉ አደና፤ ህንተ ዳጋያባ ታኒ ማሻን ይሳና። 15ህንተ ካ ዘራና፥ ሽን ጫከከታ፤ ሻማሆ ቴራ ጉምአና፥ ሽን ጎኤተከታ፤ ዎይነ ቴራ ጉምአና፥ ሽን እያ ኡየከታ። 16ህንተ ካዋ ኦምራ ዎጋ፥ እያ ናኣ ካዋ አካባ ሶ ኢታ ኦሱዋነ ኤንታ ዞርያ ካልዳ ግሾ፥ ታኒ ህንተና ይሳና፤ ህንተና አስ ኡባይ ቦራና መላ ኦና። አሳይ ህንተና ጫይያ ጫሻ ህንተ ቶካና” ያጌስ።