ምክያሳ 5

ካለይስ ቤተለመፐ ያና

1ህንተኖ፥ የሩሳላመ አሳዉ፥ ህንተ ኦላንቾታ ሺሽተ! ኑ ሞርከት ኑና ተቅዶሶና፤ ኤንቲ እስራኤለ ካለይሳ ጋጩዋ ፃምአን ሾጫና ሀኖሶና። 2ጎዳይ፥ “ኤፍራታን ደእያ ቤተለመ ካታማዉ፥ ኔኒ ይሁዳ ካታማታ ግዶን ጉ፤ ሽን እያዉ ደንዶይ በንፐ ዶምድ፥ መርናዉ ግድዳይስ፥ እስራኤለ ሃራናይስ ታዉ ኔፐ ከያና” ያጌስ።

3ሄሳ ግሾ፥ እቀ ኦይክዳ ማጫስያ ናኣ የላና ጋካናዉ፥ ጎዳይ እስራኤለ ሞርከታስ አድ እማና። ሄሳፈ ጉየ፥ ድኤትድ ደእያ እያ እሻት ስሚድ፥ ባንታ አሳራ ዋላከታና። 4እ ጎዳ ምኖተን ይድ፥ ጎዳ ባ ፆሳ ሱን ዎልቃን ባ አሳ ሄማና። እ ሳኣ ጋፃ ጋካናዉ ግታ ግድያ ግሾ፥ ኤንቲ ሳሮተን ዳና። 5እ ኤንታዉ ሳሮተ ግዳና።

አሶረ ቢታ አሳት ኑ ቢታ ኦይክያ ዎደነ ኑ ሚፃታ የድ ገልያ ዎደ ኑኒ ላፑን ናገይሳታነ ሆስፑን ካለይሳታ ኤንታ ቦላ ደንና። 6ኤንቲ ናምሩደይ ደእያ አሶረ ቢታ ኦላን ፆንድ ሃራና። አሶረ ቢታ አሳት ኑ ቢታ ኦልድ ኦይክያ ዎደነ ኑ ዛዋ የያ ዎደ እ ኑና ኤንታ ኩሸፐ አሻና። 7አትዳ ያይቆባ ዛረት ዳሮ ደርያ ግዶን ጎዳይ ኪትዳ ፃሳ መላነ ማታ ቦላ ዎያ አካ መላ ግዳና። ኤንቲ አማነትድ ናገይ ጎዳፐ አትሽን፥ አሰ ግደና። 8አትዳ ያይቆባ ዛረት ካዎተታ ግዶንነ ዳሮ አሳ ግዶን፥ ባዞን ዶአታ ግዶን ጋሞ መላነ ዶርሳ ዉደ ግዶን ጉፕ ዎያ ዎዳላ ጋሞ መላ ግዳና። እ ያራ አያ ዎደ የረስነ መንረስ፤ ኦንካ አሻናዉ ዳንዳኤና። 9ህንተ ኩሸይ ህንተራ ኤቀተይሳታ ቦላ ደንዳና፤ ህንተ ሞርከት ኡባይ ያና።

10ጎዳይ፥ “ሄ ጋላስ ታኒ ህንተ ፓራታ ህንተ ግዶፈ ይሳና፤ ህንተ ፓራ ጋረታ መንረና። 11ታኒ ህንተ ቢታን ደእያ ካታማታ ይሳና፤ ህንተ ሚፃ ኡባ ላላና። 12ህንተ ማሮታ ታኒ ይሳና፤ ህዛፐ ጉየ ሙሩነይሳት ህንተ ግዶን ዶኮና። 13ታኒ ህንተ ኤቃ ምስለታነ ህንተ ጎይናናዉ ኤስዳ ሹቻታ ህንተ ግዶፈ ይሳና፤ ህዛፐ ጉየ ህንተ ህንተ ኩሸን መዳባ ጎይነከታ። 14ታኒ አሼራ ኤቃ ፆሳታ ህንተ ግዶፈ ሾዳና፤ ህንተ ካታማታ ይሳና። 15ታዉ ኪተትቦና ካዎተታ ቦላ ይሎንነ ሀንቆን ሀሎ ከያና” ያጌስ።