ማቶሳ 5

ደረ ቦላ ታማርስዳ ትምርተ

1ዳሮ ደረይ ሺቅዳይሳ የሱሲ በእዳ ዎደ ዙማ ቦላ ከይድ ኡትስ። እያ ታማረት እያኮ ሺቅን፥ 2ሀይሳዳ ያግድ ታማርስስ፦

ቱማ ኡፋይስ

(ሉቃ 6:2-23)

3“ባንታ አያናን ማንቆት አንጀትዳይሳታ፥

ሳሎ ካዎተይ ኤንታሳ።

4ዬከይሳት አንጀትዳይሳታ፥

ኤንቲ ምን ደማና።1

5ባንታ ዎዛናን አሽከት አንጀትዳይሳታ፥

ኤንቲ ሳኣ ላታና።2

6ፅሎባ ኦናዉ ኮሻተይሳትነ ሳሞተይሳት አንጀትዳይሳታ፥

ኤንቲ ካላና።3

7ማረይሳት አንጀትዳይሳታ፥

ኤንቲ ማሮተ ደማና።

8ዎዛና ጌሻት አንጀትዳይሳታ፥

ኤንቲ ፆሳ በአና።4

9ስገይሳት አንጀትዳይሳታ፥

ኤንቲ ፆሳ ናይታ ጌተትድ ፄገታና።

10ፅሎባ ኦያ ግሾ ግድ፥

ጎደተይሳት አንጀትዳይሳታ፥

ሳሎ ካዎተይ ኤንታሳ።5

11“አሳይ ህንተና ታ ግሾ ግድ ጫይያ ዎደ፥ ጎድያ ዎደነ ህንተ ቦላ ኢታባ ኡባ ዎርዶን ኦድስያ ዎደ ህንተ አንጀትዳይሳታ።6 12ህንተ ዎይቶይ ሳሎን ግታ ግድያ ግሾ ኡፋይትተ፥ ሀሹ ጊተ። ህንተፈ ካሰ ደእያ ናበታ ሄሳዳ ጎድዶሶና።7

ማፅነነ ፖኦ

13“ህንተ ቢታስ ማፅነ፤ ማፅነይ ባ ማፅነተ አግኮ፥ ባ ማልኦተ ዋት ዛር ደማኔ? ካረ ሆልን አሳን የታናፐ አትሽን፥ አይብስካ ማደና።8

14“ህንተ ቢታስ ፖኦ፤ ዙማ ቦላ ደእያ ካታምያ ቆሰታናዉ ዳንዳኡኩ።9 15ፆምፐ ኦይድ ሶን ደእያ አሳ ኡባስ ፖአና መላ ቃ ሶን ዎስፐ አትሽን፥ ዳሎ ግዶን ዎይ ባዋ።10 16ሄሳ መላ አሳይ ህንተ ሎኦ ኦሱዋ በእድ፥ ሳሎን ደእያ ህንተ አዋ ቦንቻና መላ ህንተ ፖኦይ አሳ ስንን ፖኦ።11

ሙሰ ህገ

17“ታኒ ሙሰ ህግያነ ናበታ ቃላ ሻራናዉ ይዳ ህንተዉ ዳኖፖ። ታኒ፥ ኤንቲ ኦድዳይስ ቱማ ግደይሳ ቆንጭሳናዉ ያስፐ አትሽን፥ ሻራናዉ ያቢከ። 18ታ ህንተዉ ቱማ ኦዳይስ፤ ሳሎይነ ሳእ አና ጋካናዉ ህገ ኡባይ ፖለታናፐ አትሽን፥ ህግያፈ እስ ቃላይ ዎይኮ ፕዳለይ አና።12 19ሄሳ ግሾ፥ ሀ ኪታታፐ ጉፅያ እስ ኪታ መንያ ኦንካ ቃስ ሀራታ ሄሳ ኦና መላ ታማርሰይ ኦንካ ሳሎ ካዎተን ኡባፈ ጉ ግዳና። ሽን ሀ ኪታ ፖለይስነ ሀራታካ ፖላና መላ ታማርሰይ ሳሎ ካዎተን ግታ ግዳና። 20ታ ህንተዉ ኦዳይስ፤ ህንተ ፅሎተይ ፋርሳወታ ፅሎተፈነ ህገ አስታማረታ ፅሎተፈ አና እፅኮ፥ ሳሎ ካዎተ ገለከታ።

ዎባ

21“ህንተ ማይዛታስ፥ ‘ዎፕተ፤ ሸምፖ ዎዳ ኦንካ ፕርደታና’ ጌተቶይሳ ስእደታ።13 22ሽን ታ ህንተዉ ኦዳይስ፤ ባ እሻ ቦላ ሀንቀትያ ኡባይ ፕርደታና። ባ እሻ ጫይያ ኦንካ ዳይና ስን ፕርዳስ ሺቃና። ባ እሻኮ፥ ‘ኤያይ’ ግያ ኦንካ ቃስ ጋናመ ታማን ፕርደታና።

23“ሄሳ ግሾ፥ ኔኒ ነ ያርሹዋ ያርሽያ ዎደ፥ ነ እሻ ቆህዳባይ ነዉ አኬከትኮ፥ 24ነ ያርሹዋ ሄ በሳን አጋዳ ባ፤ ኮይሮታ ባዳ ነ እሻራ ጊጋ፤ ያታ ስማዳ፥ ነ ያርሹዋ ፆሳስ ያርሻ።

25“ነና ሞተይሳራ ፕርዳ ኬ ባሸ ኦገ ቦላ እያራ ጊጋ። ሄስ አቶ ጊኮ እ ነና ዳይና ስን ኤፋና። ዳይናይ ነና ቃቸይሳስ አድ እማና፤ እ ነና ዎይነን የጋና። 26ታ ቱማ ኦዳይስ፤ ነ ቦላ ፕርደትዳ አጩዋ እስ ሳንትመይ አቶና ጭጋ ኦንጋና ጋካናዉ ቃሾ ኬፈ ከያካ።

ላይማተባ

27“ሀይሳፈ ካሰ፥ ‘ላይማቶፕተ’ ጌተቶይሳ ስእደታ።14 28ሽን ታ ህንተዉ ኦዳይስ፥ ማጫስ ፄልድ፥ አሞትዳ ኡባይ ባ ዎዛናን ኢራ ላይማቴስ። 29ነ ኡሻቻ አይፈይ ነዉ ናጋራስ ጋሶ ግድኮ፥ ከሳ ሆላ። ነ አሳተይ ኩመ ጋናመ ታማን ዎናፐ ነ አሳተፈ እሶይ ይኮ ነዉ ሎኦ።15 30ነ ኡሻቻ ኩሸይ ነዉ ናጋራስ ጋሶ ግድኮ፥ እያ ቃንፃ ሆላ። ነ አሳተይ ኩመ ጋናመ ታማን ዎናፐ ነ አሳተፈ እሶይ ይኮ፥ ነዉ ሎኦ።16

ማቾ አንጆባ

(ማቶ 19:9፤ ማር 10:11-12፤ ሉቃ 16:18)

31“ ‘ባ ማቼስ አንጆ ዎርቃተ እሞ’ ጌተትስ።17 32ሽን ታ ህንተዉ ኦዳይስ፤ ባ ማቹያ ላይማቶና ደእሽን ብልያ ኦንካ እያ ላይማታና መላ ኦስ። ሄሳዳካ፥ አንጀትዳ ማጫስዉ ኤክያ ኡባይ ላይማቴስ።18

ጫቆባ

33“ህንተ ማይዛታኮ፥ ‘ዎርዶን ጫቆፍተ፤ ህንተ ፆሳ ስንን ጫቅዳይሳ ፖልተ’ ጌተትዳይሳ ስእደታ።19 34ሽን ታ ህንተዉ ኦዳይስ፤ ኡባራካ ጫቆፍተ። ፆሳይ ኡትያ አራታ ግድያ ግሾ፥ ሳሎን ጫቆፍተ።20 35እያ ቶሆይ የያ ሶ ግድያ ግሾ፥ ሳአንካ ጫቆፍተ። ግታ ካዋ ካታማ ግድያ ግሾ፥ የሩሳላመንካ ጫቆፍተ።21 36ህንተ ብናናፐ እሱዋካ ቦ ዎይኮ ካሬ ኦናዉ ዳንዳኦና ግሾ፥ ህንተ፥ ህንተ ሁጰንካ ጫቆፍተ። 37ሄሳ ግሾ፥ ህንተ ቃላይ፥ ‘ኤ’ ዎይኮ ‘አካይ’ ግዶ። ሄሳፈ ካረ ከየይ ፃላሄፐ ዬስ።

ሀሎ ከዮፓ

38“ ‘አይፈ ግሾ አይፈ፤ አቻ ግሾ አቸ’ ጌተትዳይሳ ስእደታ።22 39ሽን ታ ህንተዉ ኦዳይስ፤ ህንተ ቦላ ኢታባ ኦያ ኡራራ ኤቀቶፍተ። ኦንካ ነ ኡሻቻ ሻካላ ባቅኮ ነ ሀድርሳ ሻካላ በሳ። 40እስ አስ ነ ሻምዝያ ኤካናዉ ነና ሞትኮ፥ ነ ኮትያ ጉጃዳ እማ። 41እስ አስ ነና ዎልቃን ባባ ቶስድ እስ ሳተ ኦገ ባራ ባና መላ ነና ኡንኤኮ፥ እያራ ናምኡ ሳተ ኦገ ባ። 42ዎስያ ኦደስካ እማ፤ ኔፐ ታልአናዉ ኮይያ ኦናካ ድጎፋ።

ነ ሞርከታ ዶሳ

(ሉቃ 6:27-36)

43“ ‘ነና ዶሰይሳ ዶሳ፤ ነና እፀይሳ እፃ’ ጌተቶይሳ ስእደታ። 44ሽን ታ ህንተዉ ኦዳይስ፤ ህንተ ሞርከታ ዶስተ፤ ህንተና ቆሄይሳታስ ዎስተ። 45ሄሳ ህንተ ኦኮ፥ ሳሎን ደእያ ህንተ አዋስ ህንተ ናይታ ግዳና። እ ኢታታስነ ሎኦታስ አዋ ከሴስ፤ ፅሎታስነ ናጋራንቾታስ ባ እራ ቡክሴስ። 46ህንተና ዶስያ አሳ ፃላላ ህንተ ዶስኮ፥ ህንተዉ አይ ዎይቶይ ደኢ? ሀር አቶሽን፥ ቃራፃ ቃንፅሰይሳትካ ሄሳ ኦሶና። 47ህንተ፥ ህንተ እሻታ ፃላላ ሳሮኮ፥ ሀራታፐ አይ ሀራ አያባ ኦደቲ? ሀር አቶሽን፥ ፆሳ አማኖና አሳይካ ሄሳ ኦሶና። 48ህዛ፥ ሳሎን ደእያ ህንተ አዋይ ፖሎ ግዶይሳዳ ህንተካ ፖሎ ግድተ።”23