ሌወታ 1

ፁሳ ያርሾ

1ጎዳ ፆሳይ፥ ጌሻ ዱንካንያ ግዶን ግድድ ሙሰ ፄግድ ያግስ፤ 2እስራኤለ አሳስ ሀይሳዳ ያጋዳ ኦዳ፤ ህንተፈ ኦንካ ጎዳስ ያርሾ ያርሽያ ዎደ ባ መህያፐ፥ ባ ዶርሳፈነ ባ ዴሻፐ ኤሆ። 3ሄ ያርሾይ መሄፐ ፁሳ ያርሾስ ግድኮ ቦረይ ባይና ዎፋኖ ግዶ። ጎዳይ ሄ ያርሹዋ ኤካና መላ ጌሻ ዱንካንያ ገልያ ፐንገን ያርሾ። 4ያርሹዋ ያርሽያ ኡራይ ፁሳ ያርሾስ ኤህዳ መህያ ሁጰን ባ ኩሽያ ዎ። ሄስ እያ ናጋራ አቶተስ ጎዳይ ኤክዳ ያርሾ ግዳና። 5እ ሄ ዎፋኑዋ ጎዳ ስንን ሹኮ፤ ካህነት፥ አሮና ናይት ሄ ሱ ኤክድ፥ ጌሻ ዱንካነ ገልያ ፐንገን ደእያ ያርሾ በሳ ኦይዱ ማዛነታ ቦላ ዉርፆ። 6ሄ መህያ ጋልባ ቃርድ፥ አሹዋ ቆሞን ቆሞን ከሶ። 7ካህንያ አሮና ናይት ያርሾ በሳን ም ዎድ ታማ ኤ። 8ካህነት፥ አሮና ናይት ሄ ከስዳ አሹዋ ቦላ ሁጵያነ ሞዋ ጉጅድ፥ ያርሾ በሳን ታማን ደእያ ም ቦላ ማራይድ ዎ። 9ሽን ሄ ኡራይ ኡሎ አሹዋነ ገዳታ ሃን ሜጮ። ካህነይ ሄ ኡባ ያርሾ በሳን ፁጎ፤ ሄስ ጎዳስ ታማን ፁገትያ ሳዎ ቶንኩ ግያ ያርሾ ግዳና።

10ፁገትያ ያርሾስ እ እምያ እሞይ ዶርሳፈ ዎይኮ ዴሻፐ ግድኮ፥ ቦረይ ባይና ማራዘ ዎይኮ ኮለ ግዶ። 11ሄ መህያ ያርሾ በሳፈ ፑደሀ ባጋራ ጎዳ ስንን ሹኮ። ካህነት፥ አሮና ናይት ሄ ሱ ኤክድ ያርሾ በሳ ኦይዱ ማዛነታ ኡባ ቦላ ዉርፆ። 12ሄ ኡራይ አሹዋ ቆሞን ቆሞን ከሶ፤ ካህነይ ሄ ከስዳ አሹዋ ቦላ ሁጵያነ ሞዋ ጉጅድ፥ ያርሾ በሳን ታማን ደእያ ም ቦላ ማራይድ ዎ። 13ሽን ሄ ኡራይ ኡሎ አሹዋነ ገዳታ ሃን ሜጮ፤ ካህነይ ሄ ኡባ ያርሾ በሳን ፁጎ፤ ሄስ ጎዳስ ታማን ፁገትያ ሳዎ ቶንኩ ግያ ያርሾ ግዳና።

14ጎዳስ ያርሸትያ ፁሳ ያርሾይ ካፎ ግድኮ ሆለ ዎይኮ ኩራቾ ግዶ። 15ካህነይ ሄሳ ኤክድ ቆያ ኩሸራ ዱ፤ ሁጵያ ያርሾ በሳ ቦላ ደእያ ታማን ፁጎ። እያ ሱይ ያርሾ በሳ ምየራ ጉኮ። 16ኡሎ አሹዋነ ቀፍያ ከስድ፥ ያርሾ በሳፈ ዶሎሀ ባጋራ ብዶ ቆልያ በሳን የጎ። 17እ ሄ ካፉዋ ቀፈታ ኦይክድ ሻኮ፥ ሽን ኩመ ሻኮፎ። ካህነይ ያርሾ በሳ ቦላ ደእያ ታማን ዎድ ፁጎ፤ ሄስ ጎዳስ ታማን ፁገትያ ሳዎ ቶንኩ ግያ ያርሾ ግዳና።