ጌሻ ማፃፋ
ከሳ 40
ጌሻ ዱንካነ ቶከ
ጎዳይ ሙሰኮ ሀይሳዳ ያግስ፤ “ኮይሮ አጌናን፥ ኮይሮ ጋላሳን፥ ጌሻ ዱንካንያ ቶካ። ታሙ ኪታታ ኦይክዳ ጫቆ ታቦትያ እያ ግዶን ዎዳ፥ እያ ስንን ማጋራጁዋ ካቃ። ፃርጴዛ ጋ ገልሳዳ፥ ኮሽያ ሚሸታ ኡባ እያ ቦላ ዎ። ፆምፐ ዎያ ኮጫ ገልሳዳ እያ ቦላ ፆምፐታ ዎ። እፃነ ጩይስያ ዎርቃ ፃርጴዛ ጫቆ ታቦትያ ስንን ዎ። ጌሻ ዱንካንያ ፐንገ ማጋራጁዋ ካቃ። ፁሳ ያርሾ በሲ ጌሻ ዱንካንያ ስንን ዎ። ሜቻ ከርያ ጌሻ ዱንካንያፐነ ያርሾ በሳፈ ግዶን ዎዳ፥ እያን ሃ ኩን። ጌሻ ዱንካንያፐ ካረራ ዳባባ ዩሻ አ ጊግሳዳ፥ ማጋራጁዋ ዱንካንያ ፐንገ ቦላ ካቃ።
“ያታዳ፥ ጌሻ ዛይትያ ኤካዳ፥ ጌሻ ዱንካንያነ እያ ግዶን ደእያ ኡባባ ትያዳ፥ ዱማያ፤ እ ጌሽ ግዳና። ካላዳ፥ ፁሳ ያርሾ በስነ እያን ጎኤትያ ሚሸ ኡባ ትያዳ፥ ዱማያ፤ እ ፖሎ ጌሽ ግዳና። ሜቻ ከርያነ እያ ዎያ ሚሸታ ትያዳ፥ ዱማያ።
“አሮናነ እያ ናይታ ጌሻ ዱንካንያ ፐንገ ኤሀዳ ሃን ኤንታ ሜጫ። ካህነ ማኡዋ አሮና ማይዛዳ፥ እ ታዉ ካህነተን ኦና መላ እያ ትያዳ፥ ዱማያ። እያ አደ ናይታካ ኤሀዳ ሻምዘ ማይዛ። ኤንቲ ታዉ ካህነተን ኦና መላ፥ ኤንታ አዋይ ትየትዳይሳዳ፥ ኤንታካ ትያ። ሄ ትሻ ጋሶን፥ ያና ላይ ኡባን፥ ኤንቲ ታዉ ካህነ ግድድ ኦና” ያግስ።
ሙሰይ፥ ኡባባ ጎዳይ ኪትዳይሳዳ ኦስ።
ሄሳ ግሾ፥ ኤንቲ ግብፀፈ ከይዳ ናምአን ላይን፥ ኮይሮ አጌናን፥ ኮይሮ ጋላሳን ጌሻ ዱንካንያ ቶክስ። ሙሰይ፥ ዱንካንያ ቶሆታ ኤስስ፥ ቱቀታ፥ ልዮታነ ቱሳታ አስ። ጎዳይ ኪትዳይሳዳ፥ ሙሰይ፥ ጋርሳ ካማነ ቦላ ካማ ዱንካንያ ቦላ ካምስ።
ያትድ፥ ታሙ ኪታታ ኦይክዳ ናምኡ ሎቸ ሹቻታ፥ ታቦትያ ግዶን ዎስ። ቶሆ ካሶ ምታ ታቦትያ ሳጋዮታን አስ፤ ናጋራ አቶተ ካማካ ታቦትያ ቦላ ዎስ። ታቦትያ ጌሻ ዱንካንያ ግዶ ገልስድ፥ ገሸ ማጋራጁዋ ካቅስ። ያትድ፥ ጎዳይ ኪትዳይሳዳ፥ ጫቆ ታቦትያ ካምስ።
ሙሰይ፥ ፃርጴዛ ጌሻ ዱንካንያ ግዶ ገልስድ፥ ማጋራጁዋፈ ካረራ፥ ፑደሀ ባጋን ዎስ። ጎዳይ ኪትዳይሳዳ፥ ጎዳ ስንን ዎያ ጌሻ ዳቡዋ እያ ቦላ ዎስ።
ፆምፐ ዎያ ኮጫ፥ ጌሻ ዱንካንያ ግዶ ገልስድ፥ ፃርጴዛፐ ስን ባጋራ ጌሻ ዱንካንያስ ዱገሀ ባጋን ዎስ። ጎዳይ ኪትዳይሳዳ፥ ሙሰይ፥ ጎዳ ስንን ፆምፐታ ኦይስ። ሙሰይ፥ ዎርቃ ያርሾ በሳ ጌሻ ዱንካንያ ግዶ ገልስድ፥ ማጋራጁዋፈ ስን ባጋራ ዎስ። ጎዳይ ኪትዳይሳዳ፥ ሳውያ እፃነ እያ ቦላ ጩይስስ። ጌሻ ዱንካንያ ፐንገን ማጋራጁዋ ካቅስ።
ፁሳ ያርሾ በሲ፥ ጌሻ ዱንካንያ ፐንገ ስንን ዎስ። ጎዳይ ኪትዳይሳዳ፥ እያ ቦላ ፁሳ ያርሾነ ካ ያርሾ ያርሽስ።
ሜቻ ከርያ ጌሻ ዱንካንያፐነ ያርሾ በሳፈ ግዶን ዎድ፥ እያን ሃ ኩንስ። ሙሰይ፥ አሮንነ እያ ናይት ባንታ ኩሽያነ ቶሁዋ እያን ሜጨትዶሶና። ጎዳይ ኪትዳይሳዳ፥ ኤንቲ ጌሻ ዱንካንያ ገልያ ዎደ ዎይኮ ያርሾ በሲ ሺቅያ ዎደ ሄሳ ኦሶና።
ጌሻ ዱንካንያነ ያርሾ በሳ ዩሽ አድ ዳባባ ጊግስድ፥ ሄ ዳባባ ፐንገን ማጋራጆ ካቅስ። ሄሳዳ ኦድ፥ ሙሰይ ኦሱዋ ፖልስ።
ጎዳ ቦንቹዋ
(ታይቦ 9:15-23)
ሄሳፈ ጉየ፥ ሻራይ ጌሻ ዱንካንያ ካምስ፤ ጎዳ ቦንቾይካ እያ ኩምስ።1 ሻራይ ጌሻ ዱንካንያ ካምዳ ግሾነ ጎዳ ቦንቾይ እያን ኩምዳ ግሾ፥ ሙሰይ እያ ግዶ ገላናዉ ዳንዳእቤና።
እስራኤለት ባንታ ደእያ በሳ የድድ፥ ባናዉ ደንደይ፥ ሄ ሻራይ ዱንካንያፐ ደንድያ ዎደና። ሽን ሻራይ ደንዶና እፅኮ፥ ኤንቲ ባንታ ደእያ በሳ የድድ ቦኮና። ጎዳ ሻራይ ጋላስ ጋላስ ጌሻ ዱንካንያ ካሜስ፥ ቃማ ቃማ ቃስ ሻራ ግዶን ታማይ ኤፄስ። እስራኤለ አሳይ ብያ ዎደ ኡባን ሄ ሻራ በኦሶና።
Source notes (1)
- Cross-reference 1 ካዎ 8:10-11፤ እሳ 6:4፤ ህዝ 43:4-5፤ ቆን 15:8.
ጌሻ ማፃፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.