እሳያሳ 57

1ፅሎ አስ ሀይቄስ፤

ሽን ሄሳ ቆፐይ ባዋ።

ባንታና ፆሳስ እምዳ አሳይ ቢታፈ ኤከቶሶና፥

ሽን ፅሎ አስ ኢት ያናፐ ስንትድ፥

ኤከተይሳ ኦንካ አኬከና።

2እ፥ ብድ ሳሮተ ደእያ በሲ ገሌስ፤

ሱረተን ሄመተይሳት ሀይቅድ፥

ሸምፖ ደሞሶና።

3“ህንተኖ፥ ማሮ ናይቶ፥ ህንተኖ ላምያነ

ላይማትያ ዛረቶ፥ ሃ ዪተ።

4ህንተ ኦና ቀልቅሴቲ?

ህንተ ኦና ቦሬቲእ?

ህንተ እንፃርሳ ኦደ ቦላ ከሴቲ?

ህንተ ጌላታነ ዎርዳንቾ ናይታ ግደከቲ?

5ህንተ ዎላ ጋርሳንነ

ዳሻ ም ጋርሳን አሞን ፁገቴታ።

ህንተ ናይታ ዛንጋራንነ

ዛላ ቆጶን ሹክድ ያርሼታ።

6ዛንጋራን ደእያ ሊቆ ሹቻት ህንተ ፆሳታ፤

ህንተ ኤንታዉ ኡሻ ያርሾ ትግደታ።

ካ ያርሾካ እምደታ

ያትን፥ ታኒ ሀይሳን ሀንቀትክና?

7ዙማ ሁጰን ሂፃ የግደታ፤

ያን ያርሻናዉ ከይደታ።

8ህንተ ፐንግያፈነ ጎባነታፐ

ሶ ባጋራ ኤቃ ምስለታ ኤስደታ።

ታና አግድ ህንተ አርሳ ዳልግስድ፥ ያ ከይደታ፤

ኤንታራ ጫቅደታ፤ ያትድ ኤንታ አርሳ ዶስደታ፤

ኤንታ ካሉዋ በእደታ።

9ዛይተነ ሽቶ ኤክድ ሞሎካ ጌተትያ ኤቃኮ ብደታ፤

ህንተ ኪታንቾታ ሃሆ ሶ ኪትደታ፤

ሀር አቶሽን ስኦለ ጋካናዉ ዎደታ።

10ህንተ ሀራ ፆሳታ ኮይሸ ዳቡርደታ፤

ሽን፥ ‘ኡፋይስ ባዋ’ ግቤከታ።

ህንተ ዎልቃይ ሃ ኦራፅስ፤

ሄሳ ግሾ፥ ላባንድ ኩንድቤከታ።

11“ህንተ ኦና ያይድ፥ ታዉ ዎርዶትደቲ?

ህንተ ታና ቆፕበከታ፤

ህንተ ዎዛናን ቆፕበከታ።

ህንተ ታዉ ያዮና እፅዳይ

ታኒ ዳሮ ዎደ ስእ ግዳ ግሾ ግደኔ?

12ታኒ ህንተ ፅሎተነ ህንተ ኦሶታ አዋጃና፤

ሽን ህንተና አይኮካ ጎኦኮና።

13ህንተ ማዶ ደማናዉ ዋስያ ዎደ

ህንተ ሺሽዳ ኤቃት ህንተና አሸና!

ኤንታ ኡባ ጫርኮይ ኤፋና፤

እስ ቶሆ ጫርክያ ጫርኮይ ኤንታ ፑንድ ይሳና።

ሽን ታና ባዉ ባቃትድ አትያ በሰ ኦያ

ኡራይ ቢታ ላታና፤

ታ ጌሻ ዙማ ኤካና”

ያጌስ።

ዎዛን መቅዳ አሳስ ምን

14“ባስተ፥ ባስተ! ኦገ ጊግስተ፤

ታ አሳ ኦግያፐ ብያባ ኡባ ድግተ”

ያጌስ ጎዳይ።

15መርናዉ ደኤይስ፥ ግታይ፥ ቃ በሳን ደኤይስ፥

እያ ሱንይ ጌሻ ጌተተይስ፥ ያጌስ፦

“ካዉይዳ አሳ አያና ደንናዉ፥

መቅዳ ዎዛን ደኤይሳታ ኮላናዉ፥

ካዉይዳነ መቅዳ አያን ደኤይሳራ ዳና።

16ታ መዳ አሳ አያናይነ ሸምፖይ፥

ታ ስንን ዶጮና መላ ታኒ መርናዉ ሞትከ፤

ኡባ ዎደ ሀንቀትከ።

17ኤንታ ናጋራ ጋሶን ታኒ ኤንታ ሀንቀታዳ ሴራስ፤

ታ ሶምኡዋ ኤንታፈ ገንስ፤

ሽን ኤንቲ ሀእካ ባንታ ዎዛና ቆፋን ብዶሶና።

18ታኒ ኤንታ ኦግያ በአስ፤

ሽን ታኒ ኤንታ ፓና፥ ካለና፤

እያዉነ እያ ግሾ ዬከይሳታ ምንና።

19እስራኤለ ቢታን ዬከይሳታ፥

መተርሻን ጋላታ ኩንና።

ሃሆንነ ማታን ደኤይሳታስ፥

ሳሮይ ግዶ፤ ታኒ ኤንታ ፓና”

ያጌስ ጎዳይ።

20ሽን ኢታት ኡርቃነ ስልሞ ከስያ፥

ዎፑ ጋናዉ ዳንዳኦና አባ ቤታ መላ።

21“ኢታታስ ሳሮይ ባዋ”

ያጌስ ታ ፆሳይ።