ጌሻ ማፃፋ
መተ 45
ዮሰፍ ባና ቆንጭሰ
ሄ ዎደ ዮሰፍ ባ አይለታ ስንን ገንጫናዉ ዳንዳእቦና ግሾ፥ “አሳ ኡባ ታ ስንፈ ከስተ” ያግድ ዋስስ። ሄሳ ግሾ፥ ዮሰፍ ባ እሻታስ ባና ኤርስዳ ዎደ እያራ ኦንካ አላግ ባዋ። እ ባ ቃላ ቁ ኦድ፥ ግብፀት እያ ስአና ጋካናዉ ዬክስ፤ ካዋ ሶ አሳይካ ሄ ዎርያ ስእዶሶና።
ዮሰፍ ባ እሻታኮ፥ “ታኒ ዮሰፋባይ። ታ አዋይ ሀኖ ጋካናስ ፓፃ ደኢ?” ያግድ ኦይችስ። ሽን እያ እሻት ዳሮ ዳጋምዳ ግሾ፥ እያዉ አይኮካ ዛራናዉ ዳንዳእቦኮና።
ያንን፥ ዮሰፍ ባ እሻታኮ፥ “ታኮ ሃ ሺቅተ” ያግስ። ኤንቲ እያኮ ሺቅን እ ኤንታ፥ “ታኒ ህንተ ታና ግብፀ ቢታ ባይዝዳ ህንተ እሻ ዮሰፋ። ሀእ ህንተ ታና ባይዝዳ ግሾ፥ ቂሮቶፍተነ ህንተና ባዶፍተ። አይስ ጊኮ፥ ፆሳይ ታና ህንተፈ ስን ኪትዳይ አሳ ሸምፖ አሻናሳ። ሀ ቢታ ኮሽ ገልን ሀይስ ናምአን ላይ። አስ ጎዮና ዎይኮ ጫኮና ሀራ እቻሹ ላይት ቡሮ ደኦሶና። ሽን ታኒ ሳአን ህንተ ሼሻነ ህንተና ማላልስያ ኦገን አሻና መላ ፆሳይ ታና ህንተፈ ስን ኪትስ። ሄሳ ግሾ፥ ታና ሀ በሳ ኪትዳይ ፆሳፈ አትሽን፥ ህንተና ግደከታ። እ ታና ግብፀ ካዋስ ዞርያ አዋ፥ እያ አቆ ኡባ ቦላ ጎዳነ ግብፀ ቢታ ሃርያ አስ ኦስ።
“ሀእ ኤለስድ ጉየ ታ አዋኮ ብድ እያኮ፥ ነ ናአይ ዮሰፍ ሀይሳዳ ያጌስ ጊተ፤ ‘ፆሳይ ታና ግብፀ ቢታ ኡባ ቦላ ጎዳ ከስስ፤ ኔኒ ጋምኦና ታኮ ሃያ። ነ ናይታ፥ ነ ናይታ ናይታ፥ ነ ዶርሳ፥ ነ ዴሻ፥ ነ መህያነ ነዉ ደእያባ ኡባ ኤካዳ ሃያ፤ ታ ማታን ጌሳመ ቢታን ደኣሳ። ቡሮ እቻሹ ኮሻ ላይት አትዶሶና። ነና፥ ነ ሶ አሳነ ነ መህያ ኮሽ ቆሆና መላ ታኒ ነና ሙዛና’ ” ያግስ።
ቃስካ ዮሰፍ ኤንታኮ፥ “ህንተካ፥ ታ እሻ ብንያመይካ፥ ሀ ህንተራ ኦደተይ ቱማ ታና ዮሰፋ ግደይሳ ህንተ አይፍያን በእደታ። ታዉ ግብፀ ቢታን ደእያ ግታ ቦንቹዋነ ህንተ በእዳባ ኡባ ታ አዋስ ኦድተ። ታ አዋካ ኤለስድ ሃ ኤክድ ዪተ” ያግስ።
ዮሰፋራ ብንያመራ ናምአይ ዎሉ ቆምድ ዬክዶሶና ዮሰፍ ዬክሸ ባ እሻታ ኡባ ዬርስ። ሄሳፈ ጉየ፥ እያ እሻት እያራ ኦደትዶሶና።
ዮሰፋ እሻታ ዩሳ ዎረይ ካዎ ኬ ጋክዳ ዎደ ካዎይነ እያ ሞርናት ኡፋይትዶሶና። ካዎይ ዮሰፋኮ፥ “ኔኒ ነ እሻታኮ ያጋ፤ ህንተ ሀረታ ጫንድ፥ ካናነ ቢታ ስምተ። ህንተ አዋነ ህንተ ሶ አሳ ኤክድ፥ ጉየ ታኮ ሃ ዪተ። ታኒ ህንተዉ ግብፀ ቢታን ኡባፈ ሎእያ በሳ እምኮ፥ ሄ ቢታ ሞዋ ህንተ ካሻና። ቃስካ፥ ባንታ ናይታ፥ ባንታ ማቸታነ ባንታ አዋ ኤሀናዉ ግብፀፈ ግታ ፓራ ጋረ ኤክ ባና መላ ኤንታ ኪታ። ግብፀ ቢታን ደእያ ኡባፈ አድ ሎእያባይ ኤንታሳ ግድያ ግሾ፥ ባንታ አግድ ያ አቁዋስ ቆፖና መላ ኤንታዉ ኦዳ” ያግስ።
ያትን እስራኤለ አደ ናይት ካዎይ ግዳይሳዳ ኦዶሶና። ዮሰፍ ካዎይ ኪትዳይሳዳ ግታ ፓራ ጋረታነ ኦገስ ሽንቀካ ኤንታዉ እሚስ። ኤንታ ኡባስ ሁጰን ሁጰን ኦራ ማኦ እሚስ። ሽን ብንያመስ ታማነ ኡሱፑን ክሎ ግራመ ዴፅያ ብራነ እቻሹ ኩመ ማኦ እሚስ። እ ባ አዋስ ግብፀን ደእያባፐ ሎእያባ ኡባ ታሙ አደ ሀረን ጫንድ፥ ቃስ ኦገስ ካ፥ ኡይነ ሀራ ካ ታሙ ማጫ ሀረታን ጫንድ የድስ። ያትድ፥ ዮሰፍ ባ እሻታ ሞይዝሸ፥ ኤንታኮ፥ “ኦግያን ብሸ ኦየቶፍተ” ያግስ።
ኤንቲ ግብፀፈ ደንድድ፥ ካናነ ቢታን ደእያ ባንታ አዋ ያይቆባኮ ስምዶሶና። ኤንቲ ያይቆባኮ፥ “ዮሰፍ ፓፃ ደኤስ። እ ሄሳፈ አድ ግብፀ ቢታ ኡባ ሃሬስ” ያግዶሶና። ያይቆብ ዳጋምድ፥ ዎዛና ይዳ ግሾ፥ ኤንቲ ግያባ አማንበና። ሽን ኤንቲ ዮሰፍ ኤንታዉ ኦድዳባ ኡባ እያዉ ኦድን፥ ቃስካ እያ ኤክ ያና መላ እ የድዳ ግታ ፓራ ጋረታ እ በእን እያዉ ሸምፖይ ስምስ። እስራኤለይ፥ “ህዛ ታ አማነታስ። ታ ናኣ ዮሰፍ ሀኖ ጋካናስ ፓፃ ደኤስ። ታ ሀይቃናፐ ስን ባዳ እያ በአና” ያግስ።
ጌሻ ማፃፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.