ጌሻ ማፃፋ
መተ 40
ዮሰፍ አሙሆ ብለ
ጉ ዎደፐ ጉየ፥ ግብፀ ካዋ ኡሻ ካፖይነ ካ ካፖይ ባንታ ጎዳ፥ ግብፀ ካዋ ናቅዶሶና። ካዎይ ሄ ናምኡ ካፖታ ቦላ ዳሮ ይሎትድ፥ ዮሰፍ ቃሸትዳ፥ ቃሾ ኬ ናገይሳታ ካፑዋ ሶን ኤንታ ቃችስ። ናገይሰታ ሀላቃይ ኤንታ ዮሰፋስ ሼስ፥ እካ ኤንታዉ ኪተቴስ። ኤንቲ ቃሾ ኬን ዳሮ ዎደ ኡትዶሶና።
ግብፀ ካዋ ኡሻ ካፖይነ ካ ካፖይ፥ ቃሾ ኬን ደእሸ ናምአይካ እስ ቃማ ዱማ ዱማ አሙሆ አሙህዶሶና። ሄ አሙሆታስ ዱማ ዱማ ብርሸይ ደኤስ። ዮሰፍ ዎንታ ኤንታኮ ገልያ ዎደ ኤንቲ አዛንድ ኡትዳሽን በእስ። እ ኤንታና፥ “ሀች ህንተ ሶምኦይ አይስ ምዴ?” ያግድ ኦይችስ።
ኤንቲ፥ “ኑ ናምአይካ አሙሆ አሙህዳ፥ ሽን ኑስ ብርሽያ አስ ይስ” ያግዶሶና።
ዮሰፍ ኤንታኮ፥ “አሙሆ ብርሽያ ኤራተይ ፆሳባ ግደነዬ? አነ ህንተ አሙሁዋ ታዉ ኦድተ” ያግስ።
ያትን ኡሻ ካፖይ ባ አሙሁዋ ዮሰፋስ ኦድስ፤ “ታኒ ታ አሙሆን እስ ዎይነ ታ ስንን በአስ። ሄ ዎይንያስ ሄ ታሸት ደኦሶና። እ ሀይፅድ፥ ጪይ ስሚድ ቴርስ። ካዎ ዋንጭ ታ ኩሸን ደኤስ። ታኒ ዎይነ ቴራ ኤካዳ እያን ጉምአዳ፥ ሄ ዋንጫ ካዋ ኩሸን ዎስ” ያግስ።
ዮሰፍ፥ “ሀ አሙሁዋ ብርሸይ ሀይሳ፤ ሄ ታሸት ሄ ጋላሳታ። ሄ ጋላሳታ ግዶን ካዎይ ነና ቃሾፐ ብላና። እ ነና ካሰ ሹማተኮ ዛራና። ካሰ ኔኒ ኡሻ ካፖ ግዳዳ ኦይሳዳ ኔኒ ካዋ ዋንጫ እያ ኩሽያን ዎና። ሽን ነዉ ሳእ ሎእዳ ዎደ ታና ዶጎፓ፤ ታዉ ኬሀ። ታባ ካዋስ ኦዳዳ፥ ሀ ቃሾ ኬፈ ታና ከስሳ። ታና እብራወ ቢታፈ ዎልቃን ኤህዶሶና። ሀር አቶሽን፥ ሀይሳን ታና ቃሾስ ጋያባ አይብባካ ኦብከ” ያግስ።
ካ ካፖይ ዮሰፍ አሙሁዋ ሎይድ ብርሽዳይሳ በእዳ ዎደ ዮሰፋኮ፥ “ታኒ አሙህዳ አሙሆይ ሀይሳ፤ ታ ሁጰን ሄ ጋባተ ኡይ ደኤስ፤ ቦላ ባጋ ጋባትያን ግብፀ ካዋስ ዱማ ዱማ ካ ቆሞፈ ኡከትዳ ኡይይ ደኤስ። ሽን ካፎት ሄ ታ ሁጰን ደእያ ጋባትያፐ ሞሶና” ያግስ።
ዮሰፍ፥ “ሄ አሙሁዋ ብርሸይ ሀይሳ፤ ሄ ጋባተት ሄ ጋላሳታ። ሄ ጋላሳ ግዶን ካዎይ ነና ቃሾፐ ብላና። ነ ቆያ ቃንፅስድ ምን ካቅሳና፤ ነ አሹዋካ ካፎይ ማና” ያግስ።
ሄን ጋላሳን ግብፀ ካዎይ ባ የለትዳ ጋላሳን ባ ሞርናታ ኡባስ ግብራ ጊግስስ። ኡሻ ካፑዋነ ካ ካፑዋ ብል ኤህድ ባ አሳ ስንን ኤስስ። ኡሻ ካፑዋ እያ ሹማተኮ ዛርን፥ እ ካዋ ኩሽያን ዋንጫ ዎስ። ሽን ካዎይ ካ ካፑዋ ካቅስስ። ኡባይካ ዮሰፍ ኤንታ አሙሁዋ ብርሽዳይሳዳ ሀንስ። ሽን ኡሻ ካፖይ ዮሰፋ ሀሳዮና ዶግ አግስ።
ጌሻ ማፃፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.