መተ 39

ዮሰፋነ ጶፅፋራ ማችዉ

1እስማኤላ አሳት ዮሰፋ ግብፀ ቢታ ኤፍዶሶና። ግብፀ ካዋ ሞርናታፐ እሱዋስ፥ ካዋ ናገይሳታ ሀላቃስ ዮሰፋ ባይዝዶሶና።

2ጎዳይ ዮሰፋራ ደእያ ግሾ፥ እ ኦያባ ኡባ እያዉ እንጀይስ። ያትን፥ ባ ግብፀ ጎዳ ሶን ደእስ። 3ጎዳይ እያራ ደኤይሳነ እ ኦያባ ኡባ እያዉ እንጀይዳይሳ ጶፅፋር በእዳ ዎደ፥ 4ዮሰፋ ዶስስ፥ ባዉ ማታ ኦሳንቾ ኦስ። ጶፅፋር እያ ባ ኬ ቦላነ ባዉ ደእያባ ኡባ ቦላ ሹምስ። 5ሄ ዎደፐ ዶምድ፥ ጎዳይ ግብፀ ኡራ ኬ ዮሰፋ ግሾ አንጅስ። ጎዳ አንጆይ ጶፅፋራ ሶንነ እያ ጋደን ደእያባ ኡባ ቦላ ዎስ። 6ሄሳ ግሾ፥ እ ምያ ካፈ አትሽን፥ ባዉ ደእያ ሀራባ ኡባ ዮሰፋ ኩሸን ሼስ።

ዮሰፍ የገልስነ ማላ ሎኦ አስ። 7ጉ ዎደፐ ጉየ፥ እያ ጎዳ ማችያ ዮሰፋ በአዳ፥ “ሃያ፥ ታራ ዝንአ” ያጋሱ።

8ሽን እ እፅድ፥ ኢኮ፥ “በአ፥ ታ ጎዳይ፥ ባዉ ደእያባ ኡባ ታ ኩሸን የግዳ ግሾ፥ ባ ሶን ደእያባስ አይኮካ ህርገና። 9ሀ ሶን ታፐ አይ ኦንካ ባዋ። ኔኒ እያ ማቾ ግድያ ግሾ፥ ኔፐ አትሽን፥ ሀራ፥ እ ታዉ እሞናባይ ባዋ። ያትን፥ ታኒ ዋታዳ ሀይሳ መላ ዳሮ ኢታባ ሀናዳ ፆሳ ቦላ ናጋራ ኦ?” ያግስ። 10እያ ሄ ኦዳ ዎንታ ዎንታ ዮሰፋስ ኦድንካ፥ እ ኢራ አቆና ይኮ እ ማታ ሺቆና እፅስ።

11ሽን እስ ጋላስ እ ባ ኦሶ ኦናዉ ሶ ገልያ ዎደ፥ ሶ አይለታፐ ኦንካ ሶን ባዋ። 12እያ ዮሰፋ አፍላ ኦይካዳ፥ “ታራ ዝንአ” ያጋሱ። ሽን እ ባ አፍላ እ ኩሽያን የግ አግድ፥ ሶፐ ካረ ዎፅ ከይስ።

13ዮሰፍ ባ አፍላ እ ኩሽያን የግ አግድ፥ ሶፐ ካረ ዎፅ ከይዳይሳ እያ በእዳ ዎደ፥ 14ባ ሶ አይለታ ፄጋዳ፥ “ሄኮ፥ ታ አዝናይ ኤህዳ ሀ እብራወ ኡራይ ታና ካዉሻናዉ ኦይክስ። እ ታና ኢሳናዉ ታ ደእያሱዋ ገልስ፥ ሽን ታኒ ዋሳስ። 15ያትን፥ እ ባ አፍላ ታ ማታን የግ አግድ፥ ሶፐ ካረ ዎፅድ ከይስ” ያጋሱ።

16እ አዝናይ ሶ ያና ጋካናስ እያ ዮሰፋ አፍላ ባ ማታን ዎሱ። 17እ ይን፥ እያዉ ሀይሳዳ ጋዳ ኦዳሱ፤ “ሀይስ ነ ኤህዳ እብራወ አይለይ ታና ኢሳናዉ ታኮ ገልስ። 18ሽን ታኒ ዋስን፥ ባ አፍላ ታ ማታን የግ አግድ፥ ሶፐ ካረ ዎፅ ከይስ” ያጋሱ።

19እያ ጎዳይ ሀንዳባ ስእዳ ዎደ ዳሮ ይሎትስ። 20እያ ጎዳይ ዮሰፋ ኤፍድ፥ ካዋ ቃሾ አሳይ ደእያ ቃሾ ኬን የግስ።

21ሽን ዮሰፍ ቃሾ ኬን ደእያ ዎደ፥ ጎዳይ እያራ ደኤስ። ባ ኬሀተ እያዉ ዳርስድ፥ ቃሾ ኬ ካፑዋ ስንን እያዉ ሳባ እሚስ። 22ያንን፥ ቃሾ ኬ ካፖይ ቃሾ አሳ ኡባ ዮሰፋ ኩሸን የግስ። ያን ኦሰትያባ ኡባስ አዋተ እሚስ። 23ጎዳይ ዮሰፋራ ግድድ፥ እ ኦያባ ኡባ እያዉ እንጀይዳ ግሾ፥ ቃሾ ኬ ካፖይ ዮሰፋ ኩሸን ደእያባስ አይኮካ ህርገና።