መተ 30

1ራሄላ ያይቆባስ ናይታ የሎናይሳ በአዳ ባ ምችዉ ቃናታሱ። ሄሳ ግሾ፥ ያይቆባ፥ “ታዉ ናአ እማ፥ እፅኮ ታኒ ሀይቃና” ያጋሱ።

2ያይቆብ ራሄሎ ሀንቀትድ፥ “ታና ነዉ የሎ እማናዉ ዎይኮ ድጋናዉ ፆሰ ጋድዬ?” ያግስ።

3እያ፥ “ታ ጋንድዉ ባሎ ህኖ በአ። እያ ታ ግሾ የላና መላ ኔኒ ኢራ አቃ፥ ያንኮ፥ ታኒ እ ባጋራ ናአ ደማና” ያጋሱ። 4ባ ጋንድዉ ባሎ ማቾ ኦድ ኤካና መላ እያዉ እማሱ። 5ባላ ቃንታዳ አደ ናአ ያይቆባስ የላሱ። 6ያትን ራሄላ፥ “ፆሳይ ታዉ ፕርድስ፥ ታ ዎሳካ ስእድ ታዉ አደ ናአ እሚስ” ያጋዳ ሄ ናአ ዳነ1 ጋዳ ሱንሱ።

7ራሄል ጋንድያ ባላ ቃንታዳ ያይቆባስ ናምአን አደ ናአ የላሱ። 8ራሄላ፥ “ታኒ ታ ምቸራ ዎልቃማ ባፀ ባፀታዳ ፆናስ” ያጋዳ ሄ ናአ ንፍታለመ2 ጋዳ ሱንሱ።

9ልያ የሎ ኤቅዳይሳ በአዳ፥ ባ ጋንድያ ዛላፋ ያይቆባስ ማቾ ኦዳ እማሱ። 10ልያ ጋንድያ ዛላፋ አደ ናአ ያይቆባስ የላሱ። 11ልያ፥ “ላ ሀይስ አይብ ሎኦ ቃደ!” ያጋዳ፥ ሄ ናአ ጋደ3 ጋዳ ሱንሱ።

12ልያ ጋንድያ ዛላፋ ያይቆባስ ናምአን አደ ናአ የላሱ። 13ልያ፥ “ታና ዳሮ ኡፋይሴስ፤ ማጫስ ኡባይ ታና ኡፋይትያሮ ጋና” ጋዳ ሄ ናአ አሴራ4 ጋዳ ሱንሱ።

14ግስተ ጫክያ አጌናን ሮቤል ጋደ ብድ እንኮያ ም አይፈ ደምድ ባ አየ ልያስ ኤክድ ይስ። ራሄላ ልያኮ፥ “ነ ናአይ ኤህዳ እንኮያ ም አይፍያፐ ታዉ እማ” ያጋሱ።

15ሽን ልያ፥ “ታ አዝና ኔኒ ዎልቃን ኤክዳይስ ግዶና እፅን ሀእ ቃስ ታ ናአ እንኮያ ሚ አይፍያ ኤካኔ?” ያጋሱ።

ራሄላ፥ “ነ ናአ እንኮያ ታዉ እምኮ፥ ያይቆብ ሀች ቃማ ኔራ አቆ” ያጋሱ።

16ሄ ጋላስ ኦማርስ ያይቆብ ባዞፈ ያ ዎደ ልያ እያ ሞካናዉ ከያዳ፥ “ኔኒ ታራ አቃናዉ ኮሼስ፤ ታኒ ታ ናአ እንኮያ አይፈያን ነና ሻማስ” ያጋሱ። ሄሳ ግሾ፥ እ ሄ ቃማ ኢራ አቅስ።

17ፆሳይ ልያ ዎሳ ስእስ። እያ ቃንታዳ እቻሻን አደ ናአ ያይቆባስ የላሱ። 18ልያ፥ “ታኒ ታ አይልዉ ታ አዝናስ እምዳ ግሾ፥ ፆሳይ ሄሳ ታዉ ቃንፅስ” ያጋዳ ሄ ናአ ይሳኮራ5 ጋዳ ሱንሱ።

19ልያ ሀራ ቃንታዳ ኡሱፑን አደ ናአ ያይቆባስ የላሱ። 20ልያ፥ “ፆሲ ታዉ አልኦ እሞታ እሚስ። ታኒ ታ አዝናስ ኡሱፑን አደ ናይታ የልዳ ግሾ፥ ሀእ እ ታና ቦንቻና” ያጋዳ ሄ ናአ ዛብሎና6 ጋዳ ሱንሱ። 21ሄሳፈ ጉየ፥ እስ ማጫ ናአ የላሱ፥ እዮ ዲና ጋዳ ሱንሱ።

22ፆሳይ ራሄሎ ቆፕስ። እ ዎሳ ስእድ እ የሎ ኡሉዋ ዶይስ። 23እያ ቃንታዳ አደ ናአ የላሱ፤ “ፆሳይ ታ ዬላ ቃርስ። 24ጎዳይ ታዉ ሀራ አደ ናአካ ጉጆ” ያጋዳ ሄ ናአ ዮሰፋ7 ጋዳ ሱንሱ።

ያይቆባነ ላባ

25ራሄላ ዮሰፋ የልዳፐ ጉየ፥ ያይቆብ፥ “ታኒ ታ አዋ ቢታ ስማዳ ባና ታና ሞይዛ። 26ታኒ ኤንታ ግሾ ነዉ ኦዳ ታ ማቸታነ ታ ናይታ እማ። ታኒ ባና፥ ታኒ ነዉ አይ መላ ኦሶ ኦዳኮ ኔኒ ኤራሳ” ያግስ።

27ሽን ላቢ እያኮ፥ “ታኒ ነዉ እስባ ኦዳይስ፥ ጎዳይ ነ ጋሶን ታና አንጅዳይሳ ታኒ ታ ፆሳፈ ኤራስ። 28ነ ዳሞዝያ ታዉ ኦዳ፥ ታኒ ነዉ ቃንፃና” ያግስ።

29ያይቆብ፥ “ታኒ ነዉ ዋታ ኦዳኮ፥ ነ መሄትካ ዋን የለትዳኮ ኔኒ ኤራሳ። 30ታኒ ያናፐ ካሰ ነዉ ደእያ ጉይ ሀእ ሎይ ዳርስ። ጎዳይ ነና ታኒ አዳ በሳ ኡባን አንጅስ። ሽን ሀእ፥ ታኒ ታ ሶ አሳስ ኦና ዎደ” ያግስ።

31ላቢ፥ “ያትን ታኒ ነዉ አይ እሞ?” ያግድ እያ ኦይችስ።

ያይቆብ፥ “ታዉ አይኮካ እሞፋ፥ ኔኒ ታዉ እስባ ኦና ግድኮ፥ ታኒ ነ ዉድያ ሀእካ ሄማናነ ናጋና። 32ታኒ ሀች ነ ዉደ ኡባ ግዶራ አና። ሄሳን ነ ዶርሳታፐ ዋንጩዋ ዎይኮ ጋዛ፥ ካሬ ማራዘታ ኡባ፥ ዴሻፐ ጋዛነ ዋንጮ ኡባ ታኒ ሻካና፥ ኤንቲ ታ ዳሞዘ ግዶ። 33ሄሳ ግሾ፥ ታ ፅሎተይ ነ ታዉ ቃንፅዳ ዳሞዝያ በአናዉ ያ ዎደ ታዉ ማርካታና። ታ ዴሻፐ ጋዛ ዎይኮ ፑንጫረ ግዶናባይ ዎይኮ ካሬ ግዶና አይ ዶርሳት ታ ማታን በንትኮ፥ ካይሶተትዳዳ ታይባ” ያግስ።

34ላቢ፥ “ኤሮ፥ ኔኒ ግዳይሳዳ ግዶ” ያግስ። 35ሽን ሄ ጋላሳን ላቢ ካላደ ዎይኮ ጋዛ ግድዳ ኮሌ ኡባ፥ ዋንጮ ዎይኮ ጋዛ ግድዳ ማጫ ዴሻ ኡባ፥ ቦ ዋንጮ ዴሻታነ ካሬ ዋንጮ ዶርሳታ ኡባ ከስድ ባ አደ ናይታ ሄንስ። 36ያትድ ሄ ዉድያ ሄ ጋላሳ ኦግያ ያይቆባፐ ሃስድ ኤፍስ። ሽን ያይቆብ አትዳ ላባ ዉድያ ሄምስ።

37ያይቆብ ኦንጋፍረፐ፥ ባርኤፈኔ ላዉዘ ምፈ ፃምአ ከስድ፥ ፖቁዋ ፖቅድ ግዶ ቦ ባጋ ቃርድ ሽሎይስ። 38ዉደይ ሃ ኡያናዉ ያ ዎደ ጎንገን ዉድያ ስንን ፖቅዳ ፃምአ ዎስ። ብራይስ ከይዳይሳት ሃ ኡያናዉ ይድ፥ 39ሄ ፃምአታ ስንን ብራይሰቶሶና። ሄ ብራይስዳይሳት ካላደ፥ ዋንጮነ ጋዛ ማራታ የልዶሶና። 40ያይቆብ ዴሻ ማራታነ ዶርሳ ዉድያፐ ሻክድ ዱማ ዎስ። አትዳ ዉድያ ካላደነ ካሬ ግድያ ላባ መህያኮ ዛሪድ ኤስስ። ያትድ ላባ ዉድያራ ጋና ባ ዉድያ ዱማይድ ዳርስስ።

41ዉድያፐ ጎባ ማጫት ብራይሳስ ከይያ ዎደ ሄ ፃምአታ ማታን ብራይሰታና መላ ያይቆብ ሄ ፃምአታ ሃ ጎንገን መሄታ ስንን ዎስ። 42ሽን መሄት ላፋ ግድኮ ኤንታ ስንን ፃምአ ዎና። ሄሳ ግሾ፥ ላፋ መሄት ላባባ ግድን ጎባት ያይቆባባ ግድዶሶና። 43ሄሳዳ ኦድ ያይቆብ ዳሮ ዱረትድ፥ ዳሮ ዉድያ፥ ማጫ አይለታነ አደ አይለታ፥ ዳሮ ግማለታነ ሀረታ ሃርስ።