ጌሻ ማፃፋ
መተ 29
ያይቆብ ላባ ሶ ጋከ
ሄሳፈ ጉየ፥ ያይቆብ ደንድድ፥ ብድ ዶሎሀ ባጋ አሳ ቢታ ጋክስ። ያንካ ደምባ በሳን ሃ ኦላ ደምስ። ሄ ዶርሳ ዉደት ሄ ሃ ኦላ ማታን ደኦሶና። ዉደ ኡባይ ሃ ኡየይ ሄ ኦላፈ። ሄ ሃ ኦላ ዶና ጎርድያ ሹቻይ ግታ። ዶርሳ ዉደ ኡባይ ያ ሺቅኮ፥ ዉድያ ሄመይሳት ሃ ኦላ ዶናፐ ሄ ሹቻ ጎንዶርስድ ዉድያ ሃ ኡሾሶና። ኡሽ ስሚድ ሄ ሹቻ ኦላ ዶናን ዛር ዎሶና።
ያይቆብ ኤንታኮ፥ “ህንተ አዉፐ ይደቲ?” ያግድ ኦይችስ።
ኤንትካ፥ “ኑኒ ካራነፐ ይዳ” ያግዶሶና።
እ፥ “ናኮራ ናአ ናኣ ላባ ኤሬቲ?” ያግድ ኦይችስ።
“ኤ፥ እያ ኤሮስ” ያግዶሶና።
ያይቆብ ኤንታ፥ “እ ሎኦ ደኢ?” ያግድ ኦይችስ።
“ኤ፥ ሎኦ፥ እያ ናእዉ ራሄሎ ዶርሳታ ላጋዳ ያሮ ህን በአ” ያግዶሶና።
ያይቆብ ኤንታኮ፥ “ሄኮ፥ ሀእ አው ቃን ደኤስ። ዉደ መሄይ ሶ ስምያ ዎደይ ቡሮ ጋክቤና፥ ዶርሳ ኡሽ ኤፍድ ሄምተ” ያግስ።
ሽን ኤንቲ፥ “ዉደ ኡባይ ሺቅን ሹቻ ሃ ኦላ ዶናፐ ጎንዶርሳና ጋካናስ ኑ ኡሻናዉ ዳንዳኦኮ። ሄሳፈ ጉየ፥ ሹቻ ጎንዶርስድ ዶርሳታ ኡሻና” ያግዶሶና።
እ ቡሮ ኦድሽን፥ ላባ ናእያ ራሄላ ዶርሳታ ሄምያ ግሾ፥ ባ አዋ ዶርሳታ ላጋ ኤካዳ ጋካሱ። ያይቆብ ባ አየ እሻ ላባ ናእዉ ራሄሎ ላባ ዶርሳታ ላጋዳ ያሮ በእዳ ዎደ ብድ ኦላ ዶናፐ ሹቻ ጎንዶርስድ ዶርሳታ ሃ ኡሽስ። ያይቆብ ራሄሎ ዬርድ፥ ኡፋይሳን ባ ቃላ ቁ ኦድ ዬክስ። ያይቆብ፥ “ታኒ ነ አዋ ምቸ እርብቃ ናአ” ያግድ እዉ ኦድስ። ሄሳ ግሾ፥ እያ ዎፃ ባዳ ባ አዋስ ኦዳሱ።
ላቢ ባ ምቸ ናአ ያይቆባ ዩሳ ስእዳ መላ ሞካናዉ ዎፅድ ብስ። እያ እድም ዬርድ ባ ሶ ኤፍስ። ያን ያይቆብ ሀንዳባ ኡባ ላባስ ኦድስ።
ያይቆብ ላባ ናይታ ማችስ
ላቢ እያ፥ “ኔኒ ቱማ ታ አሾነ ታ ሱ” ያግስ። ያይቆብ እያራ እስ አጌና ኩመ ኡትስ። ሄሳፈ ጉየ፥ ላቢ ያይቆባ፥ “ኔኒ ታዉ ዳቦ ግድዳ ግሾ፥ ታዉ መላ ጮ ኦነዬ? አነ ታ ነዉ አይ ቃንፃናዉ ኮሽያኮ ታዉ ኦዳ” ያግስ። ላባስ ናምኡ ማጫ ናይት ደኦሶና። ባይረ ሱንይ ልያ፥ ካልያ ቃስ ራሄሎ ጌተታዉሱ። ልያ አይፈራ ጩጫ፥ ሽን ራሄላ የገልስነ ማላ ሎኦ።
ያይቆብ ራሄሎ ዶስድ፥ “ታኒ ነ ካሎ ናኤ ራሄል ግሾ ነዉ ላፑን ላይ ኦና” ያግስ።
ላቢ፥ “እዮ ሀራ አሳስ እማናፐ ነዉ እሞይ ሎኦ፥ ነ ታራ ሀይሳን ደአ” ያግስ። ሄሳ ግሾ፥ ያይቆብ ራሄሎ ኤካናዉ ላፑን ላይ ኦስ። ሽን እ እዮ ዳሮ ዶስያ ግሾ፥ እያዉ ጉ ጋላስ ዳንስ።
ሄሳፈ ጉየ፥ ያይቆብ፥ “ታ ማችዉ ታዉ እማ፥ ታ ላይይ ዉርስ ታኒ እዮ ኤካናዉ ኮያይስ” ያግስ። ሄሳ ግሾ፥ ላቢ አሳ ኡባ ፄግድ ያጋኖ ከስስ። ሽን ሳእ ቃምን ላቢ ባ ናእዉ ልያ ኤፍድ ያይቆባስ እሚስ። ያይቆብ እዮ ኤክስ። ቃስ ላቢ ባ አይልዉ ዛላፋ ባ ናኤ ልያስ አይለ ኦድ እሚስ።
ሳእ ዎንትን እ ፄልያ ዎደ ሄኮ ልያ። ያይቆብ፥ “ሀይስ ኔኒ ታ ቦላ ኦዳይስ አይቤ? ታኒ ነዉ ኦዳይ ራሄል ግሾሳ ግደነዬ? ታና አይስ ጭማድ” ያግስ።
ላቢ እያኮ፥ “ኑ ቢታን ባይሪያ ደእሽን ካልዉ አዝናስ እመይስ ዎጋ ግደና። ምሽራተን ኢራ ሳምንታ ኦንግኮ፥ ቃስ ካልውካ ታኒ ነዉ እማና። ሄሳፈ ጉየ፥ ሀራ ላፑን ላይ ታዉ ኦሳ” ያግስ።
ያይቆብ ኦዳ ማእድ ሳምንታ ኢራ ኦንግስ። ሄሳፈ ጉየ፥ ላቢ ባ ናእዉ ራሄሎ እያዉ እሚስ። ቃስ ላቢ ባ አይልዉ ባሎ ባ ናኤ ራሄልስ አይለ ኦድ እሚስ። ያይቆብ ራሄሎካ ኤክስ። ራሄሎ ልያፐ አድ ዶስስ። ሀራ ላፑን ላይ ላባስ ኦስ።
ያይቆባነ እያ ናይታ
ጎዳይ ልያ ራሄል ዶሰታቦናሮ በእድ፥ እዉ የሎ ኡሉዋ ዶይስ። ሽን ራሄላ ናአ የሎና ጋምአሱ። ልያ ቃንታዳ አደ ናአ የላሱ። እያ፥ “ጎዳይ ታ መቱዋ በእስ፥ ሀእ ታና ታ አዝናይ ዶሳና” ጋዳ ሄ ናአ ሮቤላ1 ጋዳ ሱንሱ።
እያ ናምአን ቃንታዳ አደ ናአ የላሱ። እያ፥ “ጎዳይ ታኒ ዶሰታቦናይሳ በእዳ ግሾ፥ ታዉ ሀይሳካ ጉጅስ” ጋዳ ስሞና2 ጋዳ ሱንሱ።
እያ ሄን ቃንታዳ አደ ናአ የላሱ። እያ፥ “ታኒ እያዉ ሄ አደ ናይታ የልዳ ግሾ፥ ታ አዝናይ ሀእ ታራ ሲቆን ዋፀታና” ጋዳ እያ ሌወ3 ጋዳ ሱንሱ።
እያ ሀራ ቃንታዳ አደ ናአ የላሱ። እያ፥ “ሀእ ታኒ ጎዳ ጋላታና” ጋዳ እያ ሱን ይሁዳ4 ጋዳ ሱንሱ። ሄሳፈ ጉየ፥ የሎ ኤቃሱ።
Source notes (4)
- Footnote ሮቤላ፦ እብራወ ዶናን ሀ ሱን ብርሸይ “ሀሹ፥ አደ ናአ” ዎይኮ “ታ መቱዋ በእስ” ጉሱ።
- Footnote ስሞና፦ ሀ ሱን ብርሸይ እብራወ ዶናን “ስእስ” ጉሱ።
- Footnote ሌወ፦ ሀ ሱን ብርሸይ “ዋፀታና” ጉሱ።
- Footnote ይሁዳ፦ እብራወ ዶናን ሀ ሱንይ “ጋላታ” ጉሱ።
ጌሻ ማፃፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.