እዝራ 5

ታንታን ዳርዮሳስ ፃፍዳ ዳብዳበ

1ሄ ዎደ ናምኡ ናበት ሀገይነ ዛካርያስ ይሁዳንነ የሩሳላመን ደእያ አይሁደ አሳስ እስራኤለ ፆሳ ሱንን ትንብተ ኦድዶሶና። 2ሳላትያላ ናአይ ዛሩባበልነ እዮሳደቃ ናአይ እያሱይ ደንድድ፥ የሩሳላመን ደእያ ጎዳ ኬ ዛሪድ ኬፃናዉ ዶምዶሶና። ፆሳ ናበትካ ኤንታ ማድሸ ኤንታራ ደእዶሶና።

3ሄ ዎደ ኤፍራፂሳ ሻፋፐ ሄፍንን ደእያ ቢታ አይስያ ታንታን፥ ሳታርቡዛንነ ኤንታራ ደኤይሳት የሩሳላመ ይድ፥ “ሀ ኬ ህንተ ኬፃና ማላ ህንተዉ ማታ እምዳይ ኦኔ?” ያግድ ኦይችዶሶና። 4ቃስ፥ “ሀ ኬ ኬፅያ አሳታ ሱንይ ኦኔ?” ያግድ ኦይችዶሶና። 5ሽን ፆሳ አይፈይ ይሁዳ ጭማታ ቦላ ደእያ ግሾ፥ ሀ ኦዳይ ዳርዮሳኮ ጋክን፥ ዳብዳበይ ያና ጋካናዉ ኤንታ ኦንካ ኦሶ ድግበና።

6ኤፍራፂሳ ሻፋፐ ሄፍን ቢታ አይስያ ታንታናያ፥ ሳታርቡዛንነ ኤንታራ ኦያ ካዋ ዳርዮሳስ ፃፍዳ ዳብዳበይ ሀይሳ። 7ኤንቲ እያዉ የድዳ ዳብዳበይ ሀይሳዳ ያግድ ናባበቴስ።

ካዋ ዳርዮሳ፥ ሳሮይ ነዉ ግዶ።

8ኑኒ ይሁዳ ቢታን ደእያ ግታ ፆሳ ኬ ብድ በእዳይሳ ካዎይ ኤሮ። ሄ ፆሳ ኬይ ግታ ሹቻን ኬፀትስ፤ ግምበ ቱሳት ከይዶሶና፤ ኦሶይካ ግታ አኬካንነ ኤሶን ኦሰትሸ ደኤስ።

9“ኑኒ፥ ሀ ኬ ኬፃና ማላ ህንተዉ ማታ እምዳይ ኦኔ?” ያግድ ጭማታ ኦይችዳ። 10ቃስ ኤንታና ካለያ አሳታ ሱንይ ኦነኮ ፃፍድ ነና ኤርሳናዉ ኤንታ ኦይችዳ።

11ኤንቲ ሀይሳዳ ያግድ ዛርዶሶና፦

“ኑኒ ሳሎነ ሳአ ፆሳ አይለታ፤ ኑኒ ዳሮ ላይፈ ካሰ ግታ እስራኤለ ካዎይ ኬፅድ ፖልዳ ኬ ዛሪድ ኬፆስ። 12ኑ አዋት ሳሎ ፆሳ ሀንቀዳ ግሾ፥ እ ኤንታ ባብሎነ ካዋ ናቡካዳናፆራ ኩሸን አድ እሚስ። እ ሀ ኬ ላልስ፤ አሳ ድእድ ባብሎነ ቢታ ኤፍስ።”

13“ሽን ባብሎነ ካዎይ ቅሮስ ባ ካዎትዳ ኮይሮ ላይን፥ ፆሳ ኬ ዛር ኬፃና መላ አዋጆ ከስስ። 14ናቡካዳናፆር የሩሳላመን ደእያ ፆሳ ኬፈ ኤክ ኤፍድ፥ ባብሎነ ቢታን ደእያ ባ ካዎ ጋን ዎዳ ዎርቃነ ብራ ሚሸታካ ቅሮስ ዛሪድ የድስ። ሄ ሚሸት ካዎይ ቅሮስ ይሁዳ ቢታ አይሳና መላ ዶርዳ ሰሳብሳራ ኩሸን እመትስ። 15ካዎይ፥ ‘ሀ ሚሸታ ኤካ ኤፋዳ የሩሳላመን ደእያ ፆሳ ኬን ዎ፤ ፆሳ ኬይካ ካሰ ደእያ በሳን ኬፀቶ’ ያግን፥ 16ሰሳብሳር ይድ፥ ‘ፆሳ ኬ ኬፅያ በሳን የሩሳላመን ባስስ። እ ሀእ ጋካናዉ ዉርቤና፤ ሄ ዎደፐ ዶምድ፥ ኬፀትሸ ደኤስ’ ” ያግዶሶና።

17“ህዛ ሀ ኦዳይ ካዋ ኡፋይስያባ ግድኮ፥ አነ ካዎይ ቅሮስ ሀ ፆሳ ኬ የሩሳላመን ኬፃና መላ፥ ቱማካ አዋጁዋ ከስዳኮ ኤራናዉ ካሰ አዳ ባብሎነ ካዎታ ታርከ ማዝጋበይ ኮየትድ ፄለቶ። ሄሳፈ ጉየ፥ ካዎይ ሀ ኦዳ ዋታናዉ ቆፕዳኮ ኑና ኤርሶ” ያግድ ፃፍዶሶና።