ከሳ 18

ዮቶር ሙሰ ፆሞሱዋ

1ምድያመ ቢታ ካህነይ፥ ሙሰ ቦሎይ ዮቶር፥ ጎዳይ ሙሰስነ ባ አሳ እስራኤለታስ ኦዳባነ ኤንታና ግብፀፈ ከስዳባ ስእስ።

2ሄ ዎደ ሙሰ ቦሎይ ዮቶር፥ እያ ማታን ሙሰይ አግድ ብዳ እያ ማችዉ ስፖሮነ፥ 3እ ናምኡ ናይታ ኤክድ ይስ። ሙሰይ፥ “ታኒ አላጋ ቢታን በተ አስ ግዳስ” ግድ ባይራ ናኣ ገርሳማ ግድ ሱንስ። 4ካሉዋ ቃስ፥ “ታ አዋ ፆሳይ፥ ታና ግብፀ ካዉዋ ማሻፈ አሽስ” ግድ አላዛራ ግድ ሱንስ።

5ሙሰ ቦሎይ ዮቶር፥ እያ ማችዉነ እ አደ ናይታ ባራ ኤክድ፥ መላ ቢታን፥ ፆሳ ዙማ ማታን ደእያ ሙሰኮ ይስ። 6እ ባንታ ዩሳ ኤርሳናዉ ሙሰኮ ኪትስ።

7ሄሳ ግሾ፥ ሙሰይ ባ ቦሉዋ ሞካናዉ ከይድ፥ እያ ዝግ ሳሮድ እያ ዬርስ። ኤንቲ እሶይ እሱዋ ሳሮ ስሚድ ሙሰ ዱንካንያ ግዶ ገልዶሶና። 8ጎዳይ እስራኤለታ አሻናዉ ግብፀ አሳ ቦላነ ኤንታ ካዉዋ ቦላ ኦዳባ ኡባነ ኦገን ኤንታ ጋክዳ መቱዋ ኡባን ጎዳይ ዋት ማድዳኮ ሙሰይ ባ ቦሉዋስ ኦድስ።

9ዮቶር ጎዳይ እስራኤለ አሳ ግብፀታ ኩሸፐ አሻናዉ ኦዳ ሎኦ ኦሶታባ ስእድ ኡፋይትስ። 10እ፥ “ህንተና ግብፀታፐ ኤንታ ካዉዋ ኩሽያፐ አሽድ፥ ግብፀ አይለተፈ ከስዳ ጎዳይ፥ እ ጋላተቶ። 11ኦቶሮን ኤንታ ቦላ ኢታባ ኦዳ ግብፀታፐ እስራኤለታ አሻናዉ ሄሳ ኦዳ ግሾ፥ ጎዳይ ፆሳታ ኡባፈ ግታ ግደይሳ ታኒ ሀእ ኤራስ” ያግስ። 12ሄሳፈ ጉየ ዮቶር፥ ሙሰ ቦሎይ፥ ፁሳ ያርሾነ ሀራ ያርሾ ፆሳስ ያርሽስ። አሮንነ እስራኤለ ጭማት ኡባይ ፆሳ ስንን እያራ ጌሻ ካ ማናዉ ይዶሶና።

13ዎንተ ጋላስ ሙሰይ አሳስ ፕርዳናዉ ኡትስ። አሳይ ሙሰ ዩሹዋን ዎንታፈ ኦማርስ ጋካናዉ ኤቅድ ደኤስ። 14ሙሰ ቦሎይ ሙሰይ አሳስ ኦይሳ ኡባ በእድ፥ “ኔኒ ነ ፃላላ ሀይሳ አይስ ኦይ? አሳይ ዎንታፈ ኦማርስ ጋካናዉ ነ ዩሹዋን ኤሳዳ አይስ ነርካ ኦይ?” ያግስ።

15ሙሰይ ባ ቦሉዋኮ፥ “አሳይ ፆሳ ሸንያ ኦይቻናዉ ኮይድ ታኮ ይያ ግሾሳ። 16ኤንታ ግዶን ኦድ ደእኮ ታኮ ዮሶና። ታ ኤንታ ግዶን ባልነ ቱም ኦነኮ ሻካይስ፤ ፆሳ ኪታነ ህግያ ኤንታዉ ኦዳይስ” ያግስ።

17ሙሰ ቦሎይ፥ “ሀይስ ነ ኦይስ ሎኦ ግደና። 18ነካ ኔኮ ይያ አሳ ኡባይ ዳቡረታ። ሀ ኦሶይ እስ አሳፐ ዳሮ ግድያ ግሾ፥ ኔኒ ነርካ ኦናዉ ዳንዳአካ። 19ሀእ ታኒ ነና ዞረይሳ ስአ፤ ፆሳይ ኔራ ግዳና። ኔኒ ሀ አሳ በሳን ግዳዳ ኤንታባ ፆሳስ ኦዳ። 20ፆሳ ኪታነ ህግያ ኤንታ ታማርሳ። ኤንቲ ዋን ዳነኮነ አይ ኦነኮ ኤንታ በሳ። 21ቃስ አሳ ግዶን ኦዳ ሻክድ ኤርያ አሳታ፥ ፆሳ ያየይሳታ፥ አማንይሳታነ ዎፈ ኤኮናይሳት ዶራ። ኤንታና አሳ ቦላ ሻላቃታ፥ ማቶ ሀላቃታ፥ ሀምሳላቃታነ አስራላቃታ ኦዳ ሹማ። 22ኤንቲ ኡባ ዎደ ካዉሻ ኦዳታ ባንታዉ ፕርዶ፥ ሽን ዴፆ ኦዳታ ኔኮ ኤሆ። ሄሳዳ ነ ኦኮ ቶሆይ ነዉ ካዉያና። 23ነ ኦና መላ ፆሲ ኮየይ ሄሳ። ቃስ ነ ዳቡራካ ሀ አሳ ኡባይ ባ አላለይ ፖለትን ባ ሶ ባ ሶ ስማና” ያግስ።

24ሙሰይ ዮቶራ ዞርያ ስእስ፤ እ ግዳባ ኡባ ኦስ። 25ሙሰይ እስራኤለታ ግዶፈ ኦዳ ሻክ ኤርያ አሳታ ዶርስ። ኤንታና አሳ ቦላ ሻላቃታ፥ ማቶ ሀላቃታ፥ ሀምሳላቃታነ አስራላቃታ ኦድ ሹምስ። 26ሹማት ካዉሻ ኦዳታ ባንታዉ ፕርድዶሶና፥ ሽን ዴፆ ኦዳታ ሙሰኮ ኤሆሶና።

27ሄሳፈ ጉየ ሙሰይ ባ ቦሉዋ ሞይዝን፥ እ ባ ቢታ ስምስ።