ኤራታ 5

ፆሰ ያያ

1ፆሳ ኬ ገልያ ዎደ አኬካዳ ታንጋ። ኤንቲ ባንታ ኢታ ኦሱዋ ኤሮና ግሾ፥ ስአናዉ ሺቆይ ኤያታ ያርሹዋፈ አስ። 2ኦደታናዉ ኤሶቶፓ፤ ፆሳ ስንን ኦደታናዉ ነ ዎዛናን ድርጎፋ። ፆሳይ ሳሎና፥ ኔኒ ሳአና፤ ሄሳ ግሾ፥ ነ ቃላይ ጉ ግዶ። 3ቆፍ ዳርያ ዎደ አሙሆይ ዳሬስ፤ ኦዳ ዳሮይ ኤያተ ቆንጭሴስ። 4ፆሳስ ገፕዳባ ፖላናዉ ጋምኦፋ፤ ኤያታን ፆሳይ ኡፋይተና። ሄሳ ግሾ፥ ኔኒ ገፕዳባ ኡባ ፖላ። 5እስባ ገፕድ ፖሎና አጋናፐ ኮይሮ ገፖና አጎይ ሎኦ። 6ናጋራን ነና ገልሶና መላ ነ እንፃርሳ የዳ ኦፋ። ፆሳ ኬን ኦይሳኮ፥ “ኮይሮ ሀይሳ ታኒ አኬኮና ገፓስ” ጎፓ። ሄስ ፆሳ ዳሮ ሀንቀያ ግሾ፥ ነ ኩሸ ኦሶ ኡባ እ ባ ሀንቁዋን ይሳናዉ ዳንዳኤስ። 7ዳሮ አሙሆይነ ዳሮ ኦድ ሀዳ። ሄሳ ግሾ፥ ፆሳ ያያ።

ዱረተ ሀዳ

8እስ ቢታን ማንቆት ናቀትሽን፥ ፕርድ ጌላትሽን ኔኒ በእኮ ማላለቶፋ። እስ እስ ሀላቃስ እያፐ ቦላራ ሹመትድ እያ ፄልያ ሀራ ሀላቅ ደኤስ። ቃስ ኤንታፈ ቦላራ ሹመትድ ኤንታ ፄልያ ሀራ ሀላቃት ደኦሶና። 9ቢታፈ በንትያ ዎይ ኡባሳ፤ ሀር አቶሽን፥ ካዎይካ ጎሻፈ ጎኤቴስ።

10ብራ ዶስያ ኡራስ ብር ግድ ኤረና፤ ዱረተ ሲቅያ ኡራይ ሚሸ ካል ኤረና፤ ሄ ኡባይ ሀዳ። 11ዱረተ ዳርያ ዎደ ምያ አስ ዳሬስ። ባ ሻሉዋ ጮ አይፈን ፄልድ፥ “ታኒ ዱረ” ጋናፐ ሀራባ አይ ማዲ?

12ኦሶ ኦያ አስ ጉ ምን ዳሮ ምን፥ ሳሮ ስኮ ስኬስ፤ ሽን ዱረይ ባ ዱረተስ ኡባ ዎደ ኡንኤትያ ግሾ ስኮ ይድ ደኤስ።

13ሳሎፐ ጋርሳን ዳሮ አዛንያባ ሀራባ ታኒ በአስ። ሄስካ ኢታ ዎደ ባና አሾ ግድ ምንጅዳ ሻሎ፥ 14ዎይኮ እስ ኢታባይ ጋክን ይዳ ዱረተ። እ ናአ የልዳባ ግድኮካ ናኣ ላትስያባ ይድ መላ አቴስ። 15አስ ኡባይ ካሎ የለትዳይሳዳ መላ ኩሸ ስሚድ ባና። አይ መላ እ ዳቡርድ ኦኮካ ኤክድ ብያባይ ባዋ።

16አስ ካሎ የለትድ ካሎ ጉየ ስመይስ ዳሮ አዛንያ ኢታባ። እያ ዳቡራ ኡባይ ጫርኮ ኦይክያባዳ ሀዳ ግድኮ እያ አይ ማዲ? 17እ ባ ላይ ኡባ ማ ደኦን፥ አዛኖን፥ ዬላን፥ ሀርገንነ ይሎን ዉርሴስ።

18ህዛ፥ ታኒ አኬክዳ እስ ሎኦባይ፥ ሳሎፐ ጋርሳን ፆሲ አሳስ እምዳ ቃን ላይን፥ አስ ባ ዳቡራፐ ምድ ኡይድ ኡፋይተይስ ሎኦነ በሲያባ፤ እያ ቃዳይ ሄሳ። 19ፆሲ አሳስ ዱረተነ ሻሎ እመይ፥ ባ ዳቡራ ጋትያ ደምድ፥ ምድ ኡይድ ኡፋይታና መላሳ፤ ሄስካ ፆሳፈ እያዉ እመትዳ እሞታ። 20ፆሲ እያ ዎዛናን ኡባ ዎደ ኡፋይስ ኩንያ ግሾ እ ባ ደኦ ላይባ ዳሮ ቆፐና።