ዛረ 21

ዎዳ ኡራይ ኤረቶና ሀይቆ

1ነ ላታና መላ ጎዳይ፥ ነ ፆሳይ ነዉ እምያ ቢታን፥ ኦን ዎዳኮ ኤረቶና አህ ኩንድድ በንትኮ፥ 2ህንተ ዳይናትነ ጭማት ብድ፥ አሀይ ኩንድዳ በሳፈ ማታ ካታማታ ጋካናዉ ደእያ ሃሆተ ዋ። 3ሄሳፈ ጉየ፥ አሀይ ኩንድዳ በሳስ ማትያ ካታማ ጭማት፥ ዋታቦናነ ሞርገን ቃምባር ዎቦና ኡስ ኤኮ። 4እዮ ጎግያ ሃ ደእያ ጎየትድ ኤሮናነ ዘረትድ ኤሮና ዛንጋራ ኤፍድ፥ ሄ ኡሴ ቆያ ምርቅድ መን። 5ሄሳ መላ ቆሁዋነ ኦሻ ሻክድ ፕርዳናዉ ጎዳይ፥ ህንተ ፆሳይ ባ ስንን ኦና መላነ ባ ሱንን አንጃና መላ ኤንታ ዶርዳ ግሾ፥ ሌወ ኮቸ ግድዳ ካህነት ሄ በሳ ቦ። 6ሄሳፈ ጉየ፥ አሀይ ኩንድዳ በሳስ ማትያ ካታማ ጭማት ዛንጋራን ቆ ምርቅድ ዎዳ ኡሴ ቦላ ባንታ ኩሽያ ሜጨትድ፥ 7“ኑ ኩሸይ ሀ ሱ ጉስቤና፤ ኑ አይፈይ ሄሳ በእቤና። 8አቤት ጎዳዉ፥ ኔኒ ዎዝዳ ነ አሳ፥ እስራኤለ ማራ፤ ሀ ፅሎ ሱ ነ አሳ ቦላ ናቆ ኦዳ ታይቦፓ። ሀ ፅሎ ሱ ግሾ ኑ ናጋራይ አቶ ጋ” ያጎ። 9ነኒ ጎዳ አይፍያ ስንን ሄሳዳ ኦዳ፥ ፅሎ ሱይ ጉክዳ ናጋራ ነ ግዶፈ ድጋ።

ኦላን ድኤትዳ ማጫሳታባ

10ነ ሞርከታራ ነ ኦለታናዉ ከይን፥ ጎዳይ፥ ነ ፆሳይ ኤንታ ነ ኩሸን አድ እምን፥ ኤንታ ድእያ ዎደ፥ 11ድኤትዳ አሳ ግዶን እስ ማላ ሎኦ ማጫስ በአዳ፥ እዉ ምሸታዳ ማቻናዉ ኮይኮ፥ 12እዮ ነ ሶ ኤሀ። እ ሁጵያ ሜዳ፤ እ ፁጉን ጭጋ፤ 13ድኤትያ ዎደ ደእያ ማኡዋ ላማዳ፥ እስ አጌና ነ ሶን ኡታዳ፥ ባ አዋስነ ባ አየስ ካዮቶ። ሄሳፈ ጉየ፥ እዮ ማቻ። 14ያታ ስማዳ፥ ኢራ ዱሳይ ነና ኡፋይሶና እፅኮ፥ እያ ባ ኮይዳ ሶ ባና መላ እዮ የዳ። ኔኒ እዮ ማቾ ኦዳ ኢራ እስፈ አቅዳ ግሾ፥ እዮ ሚሸን ባይዛናዉ ዎይኮ አይለ ኦናዉ በሰና።

ባይራ ናአ ላታ ማታ

15እስ አሳስ እ ዶስያነ ዶሶና ናምኡ ማቸት ደእኮ፥ ሄ ናምአይካ እያዉ አደ ናአ የልኮ፥ ባይራይ እ ዶሶና ማቸፔ የለትዳባ ግድኮ፥ 16እ ባ ናይታ ባ ሻሉዋ ላትስያ ዎደ፥ እ ዶሶናርፐ የለትዳ ባይራይ ደእሽን፥ እ ዶስያርፐ የለትዳ ካሉዋ ባይራያናዉ በሰና። 17ሀራ ናይታስ እመይሳፈ እያዉ ናምኡ ኩሸ አድ እምድ እ ዶሶናር ናአይ ባይራ ግደይሳ ኤርሳናዉ በሴስ። ሄ ናአይ እያዉ ኩሸ ቶሆ ጳልቅዳ ባይራ ግድያ ግሾ፥ ባይራተ እ ኤካናዉ በሴስ።

ዱማ ዱማ ህገታ

18አዋስነ አየስ ኪተቶና እፅዳ፥ ኤንቲ ሴርንካ ስሞና፥ ዎዛና ሙመነ ማካላንቾ ግድዳ ናእ ደእኮ፥ 19አዋይነ አይያ ሄ ካታማ ፐንገን ደእያ ጭማታኮ እያ ኤሆ። 20ኤንቲ ጭማታኮ፥ “ሀይስ ኑ ናአይ ዎዛና ሙመነ ማካላንቾ፤ እ ኑስ ኪተተና፤ እ ያራምባነ ኡሻንቾ” ያግድ ኦዶ። 21ሄሳፈ ጉየ፥ ሄ ካታማን ደእያ አደ ኡባይ እያ ሹቻን ጫድድ ዎ። ሄሳዳ ኦድ ህንተ ግዶፈ ኢታ ኡራ ይስተ፤ እስራኤለ ኡባይ ሄሳ ስእድ ያያና።

22እስ አስ ሀይቆ ፕርድስያ ባላ ኦኮ፥ ነ እያ ም ቦላ ካቃዳ ዎኮ፥ 23ሄ ም ቦላ እያ አሀይ አቆፖ፤ እያ ሄ ጋላስ ሞጋ። ም ቦላ ካቀትድ ሀይቅያ ኦንካ ፆሳን ባደትዳይሳ። ጎዳይ፥ ነ ፆሳይ ነዉ ላታ ኦድ እምያ ነ ቢታ ቱንሶፓ።