ዛረ 13

ሀራ ፆሳታ ጎይኖፋ

1ነ ግዶን ትንብተ ኦድያ ዎይኮ አሙሆ ብርሽያ አስ ደንድድ፥ ማላታነ ማላልስያባታ ኦኮ፥ 2እ ኦድዳ ማላታይ ዎይኮ ማላልስያባይ ቱማ ግድድ ፖለትን፥ እ ኔኮ፥ “አነ ካሰ ነ ኤሮና ሀራ ፆሳታ ጎይኖስ” ያግኮ፥ 3ነ እያ ኡባራካ ስኦፓ። ህንተ ኩመ ዎዛናፐነ ኩመ ሸምፑዋፈ ጎዳ ህንተ ፆሳ ዶስያኮነ ዶሶናኮ ፓጫናዉ ሄሳ ኦስ። 4ጎዳ ህንተ ፆሳ ካልተ፤ እያዉ ያይተ፤ እያ ኪታ ናግተ፤ እያ ቃላ ስእተ፤ እያዉ ጎይንተ፤ እያፐ ዱፆፍተ። 5ህንተና ግብፀ አይለተፈ ዎዝዳ ጎዳ፥ ህንተ ፆሳ ቦላ ህንተ ማካላና መላ ታማርስያ ናበ ዎይኮ አሙሆ ብርሽያ ኡራ ዎተ። ሄሳ መላ አስ ህንተ ጎዳ፥ ህንተ ፆሳ ኪታፐ ካረ ከያና መላ ኦያ ግሾ፥ እያ ዎተ፤ ኢታ ህንተ ግዶፈ ድግተ።

6ሀር አቶሽን፥ ነ እሻይ ዎይኮ ነ አደ ናአይ ዎይኮ ነ ማጫ ናእያ ዎይኮ ነ ዶስያ ማችያ ዎይኮ ነ ማታ ላገይ፥ “ካሰ ነነ ነ ማይዛት ጎይን ኤሮና ፆሳታ ጎይናናዉ የ። 7ቢታ ሀ ጋፃፐ ያ ጋፃ ጋካናዉ ደእያ፥ ነ ዩሾ ኡባን ማታንነ ሃሆን ደእያ አሳ ኡባይ ጎይንያ ፆሳታ ጎይናናዉ የ” ያግድ ባለኮ፥ 8እያዉ ኤሮ ጎፓ፤ እ ገይሳ ስኦፓ። እያዉ ቃታዳ እያ ሸምፑዋ አሾፋ፤ 9እያ ዎናዉ በሴስ። እያ ዎናዉ ኮይሮ ነ ዶማ፤ ሄሳፈ ጉየ፥ አሳ ኡባይ ካልድ ዎ። 10እ ሀይቃና ጋካናዉ ሹቻን ጫዳ፤ እ ነና ግብፀ ቢታፈ፥ አይለተ ኬፈ ከስዳ ጎዳ፥ ነ ፆሳፈ ነና ሻካናዉ ኮዬስ። 11እስራኤለ አሳይ ሄሳ ስእድ ያያና፤ ቃስ ሄሳ መላ ኢታባ ዛሪድ ህንተ ግዶን ኦንካ ኦና።

12ጎዳይ፥ ነ ፆሳይ ነ ዳና መላ እምዳ ካታማፐ እሱዋን ነ ደእያ ዎደ፥ 13ነ አሳ ግዶን ኢታት ደንድድ፥ አሳኮ፥ “ኑኒ ኤሮና ፆሳታ ጎይናናዉ ደንድተ” ያግድ ባለሽን ነ ስእኮ፥ 14ሄ ሀኖታ ኦይቻ፤ ምንዳ ፕልጋ። ሄ ነ ግዶን ኦሰትዳ ቱናባይ ቱማ ግደይሳ ሻካዳ ኤርኮ፥ 15ሄ ካታማን ደእያ አሳ ኡባ ማሻን ዉርሳ፤ ሄ ካታማነ እያን ደእያ መህያ አሾና ይሳ። 16ሄ ካታማፐ ነ ኤክዳ ድኦ ኡባ ካታማ ዳባባ ሺሻዳ፥ ሄ ካታማነ እያ ድኡዋ ኡባ ጎዳስ፥ ነ ፆሳስ፥ ፁሳ ያርሾ ኦዳ ዉርሳዳ ፁጋ። እ መርናዉ ዛሪድ ኬፀቶና ላለ ዶረ ግድድ አታና። 17ሀ ድገትዳ ሚሸታፐ አይብካ ነ ኩሸን በንቶፎ። ጎዳይ ባ ዎልቃማ ሀንቁዋፈ ስሚድ፥ ነና ማራና፤ እ ነዉ ቃታና። ካሰ ነ ማይዛታስ ጫቅዳ ጫቁዋዳ ነ ታይቡዋ ዳርሳና። 18ታኒ ሀች ነና ኪትያ ኪታ ኡባ ነ ናጋዳ፥ ጎዳ፥ ነ ፆሳስ ኪተትኮ፥ ጎዳ ነ ፆሳ ኡፋይስያባ ኦኮ፥ ሀ ግዳባይ ነዉ ፖለታና።