ጌሻ ማፃፋ
ዛረ 12
ጎዳይ ዶርዳ ጎይኖ በሳ
ህንተ ላታና መላ ጎዳይ፥ ህንተ አዋታ ፆሳይ ህንተዉ እምዳ ቢታን ህንተ ደእዳ ዎደ ኡባን ህንተ ኦናዉ በሲያ አዋጆትነ ህገት ሀይሳታ። ህንተ ላትያ ቢታን ደእያ ካዎተታስ ደርያ ቦላ፥ ዙማ ቦላነ እስ እስ ም ጋርሳን ደእያ ጎይኖ በሳታ ይስተ። ኤንታ ያርሾ በሳታ ላልተ፤ ኤንታ ጎይኖ ሹቻ ቱሳታ መንረተ። አሼራ ጌተትያ ኤንታ ኤቃ ምስልያ ታማን ፁግተ፤ ኩሸን ኦሰትዳ ኤንታ ፆሳታ ምስለታ ይስተ፤ ኤንታ ሱንታ ሄ በሳፈ ቁችተ።
ጎዳ፥ ህንተ ፆሳ ኤንቲ ባንታ ፆሳ ጎይንያ ኦገን ጎይኖፍተ። ጎዳይ፥ ህንተ ፆሳይ ህንተ ኮቸ ኡባ ግዶፈ ባ ሱንይ ያን ፄገታና መላ ዶርዳ በሳ ኮይተ። ሄ በሳ ህንተ ባናዉ ኮሼስ። ህንተ ፁሳ ያርሹዋ፥ ሀራ ያርሹዋ፥ ህንተ አስራታ፥ ህንተ እሙዋ፥ ህንተ ቃንገ፥ ህንተ ዶስድ እምያ እሙዋ፥ ህንተ መህያፐነ ዶርሳፈ ባይራ ሄ በሳ ኤህተ። ጎዳይ፥ ህንተ ፆሳይ ህንተና አንጅዳ ግሾ፥ ሄሳን፥ ጎዳይ፥ ህንተ ፆሳይ ደእያ በሳን፥ ህንተነ ህንተ ሶ አሳይ ማና፤ ህንተ ኩሸይ ኦዳባ ኡባን ህንተ ኡፋይታና።
ሀች ሀይሳን ህንተ እሶይ እሶይ፥ ዶስዳባ ኦይሳዳ ሄ ዎደ ኦከታ። ጎዳይ፥ ህንተ ፆሳይ ህንተዉ እምያ ሸምፖ ቢታ ቡሮ ጋክበከታ። ሽን ህንተ ዮርዳኖሰ ፕንድ፥ ጎዳይ ህንተ ፆሳይ እምያ ሄ ቢታ ላትድ ያን ኡታና። ህንተና ተቅዳ ሞርከታፐ እ ህንተና ሸምፕስያ ግሾ ያን ዎፑ ግድ ህንተ ዳና። ሄ ዎደ ጎዳይ፥ ህንተ ፆሳይ ባ ሱንይ ሄሳን ፄገታናዉ ዶርዳ ሄ በሳን፥ ታ ህንተና ኪትያባ ኡባ፥ ፁሳ ያርሹዋ፥ ሀራ ያርሹዋ፥ ህንተ አስራታ፥ ህንተ እሙዋነ ህንተ ቃንገ ኡባ ያ ኤሄታ። ህንተ፥ ህንተ አደ ናይትነ ህንተ ማጫ ናይት፥ ህንተ አደ አይለትነ ማጫ አይለት ህንተራ ላታ ኤክቦና ህንተ ካታማን ደእያ ሌወታራ እስፈ ያን ጎዳ፥ ህንተ ፆሳ ስንን ኡፋይታና። ኔኒ ፁሳ ያርሹዋ ነ ኮይዳ በሳን ጮ ያርሾና መላ ናገታ። ኔኒ፥ ነ ኮቻፈ እሱዋን፥ ጎዳይ ዶርዳ በሳን፥ ነ ፁሳ ያርሹዋ ያርሻ፤ ታ ነና ኪትዳ ኡባ ያን ኦ።
ግዶሽን ነ ደእያ በሳን አዉንካ ነ መህያፐ ጎዳይ ነና አንጅዳይሳዳ ሹካዳ ማ። ዎጋዳ ቱና ግድን ዎይኮ ቱና ግዶና አስ ኦንካ ጋራነ ገንኤ መይሳዳ ነ መህያፐ ሹካዳ ማ። ሽን ሱ ሃዳ ሳአን ጉሳፈ አትሽን፥ ሞፓ። ነ ካፈ፥ ዎይንያፐነ ዛይትያፐ እምያ አስራታ፥ ነ መህያፐነ ዶርሳ ዉድያፐ እምያ ባይራ፥ ጎዳስ ቃንግዳባ ኡባነ ነ ዶሳን እምያ እሙዋ ኡባ ነ ደእያ ሄራን ሞፓ። ሽን ነኒ፥ ነ አደ ናይትነ ነ ማጫ ናይት፥ ነ አደ አይለትነ ማጫ አይለት ኔራ ላታ ኤክቦና ነ ካታማን ደእያ ሌወታራ እስፈ ጎዳይ፥ ነ ፆሳይ ዶርዳ በሳን፥ ጎዳ፥ ነ ፆሳ ስንን፥ ሀ ያርሾ ኡባ ማ። ነ ዳቡራዳ ሺሽዳባን ጎዳ፥ ነ ፆሳ ስንን ኡፋይታ። ነ ደኦ ላይ ኡባን ሌወታ ቀል ጎና መላ ናገታ።
እ ነዉ ገልዳ ቃላዳ ጎዳይ ነ ፆሳይ ነ ዛዋ ዳልግስያ ዎደ ነና አሾ ማናዉ ኮሽያ ዎደ ነ ኮይዳ መላ ማ። ሽን ጎዳይ፥ ነ ፆሳይ ባ ሱንይ ያን ፄገታና መላ ዶርዳ በሳይ ነዉ ሃክኮ፥ ጎዳይ ነዉ እምዳ ነ መሄ ዎይኮ ዶርሳ ዉድያፐ ታ ነና ኪትዳይሳዳ፥ ነ ኮይዳ መላ ነ ካታማን ሹካዳ ማ። ዎጋዳ ቱና ግድን ዎይኮ ቱና ግዶና አስ ኦንካ ጋራ ዎይኮ ገንኤ መይሳዳ ሞ። ደኦይ ሱን ደእያ ግሾ፥ ሱ ደእያ አሾ ሞና መላ ናገታ፤ ሄሳ ግሾ፥ ደኦ አሾራ ጋዳ ሞፓ። ሱ ሃዳ ቢታን ጉሳፈ አትሽን፥ ሞፓ። ነዉነ ኔፐ ጉየራ ያና ነ ናይታስ እንጀታና መላ ሱ ሞፓ። ሄሳ ነ ኦኮ ጎዳ ኡፋይሳሳ።
ሽን ነ ጎዳስ ዱማይዳባነ እያዉ ቃንግዳባ ኤካዳ፥ ጎዳይ ዶርዳ በሳ ባ። ፁሳ ያርሾ አሹዋነ ሱ ጎዳ፥ ነ ፆሳ ያርሾ በሳን ያርሻ። ሀራ ያርሾ ሱ ጎዳ፥ ነ ፆሳ ያርሾ በሳ ማታን ጉሳዳ አሹዋ ማ። ነዉነ ነ ናይታስ እንጀታና መላ ታ ነና ኪትያ ኪታ ምንዳ ናጋ። ሄሳ ነ ኦኮ፥ ጎዳ ነ ፆሳ ኡፋይስያባነ ሱረባ ኦሳ።
ነ ላታናዉ ብያ ካዎተ፥ ጎዳይ ነ ፆሳይ ነ ስንፈ ይስያ ዎደነ ነ ኤንታ ቢታ ላትያ ዎደ፥ ኤንቲ ነ ስንፈ ይዳፐ ጉየ፥ ነ ኤንታ ፆሳታ ጎይናዳ፥ ፅሄን ኦይከቶና መላ ናገታ። ኔኒ፥ “ሀ ካዎተት ባንታ ፆሳታ ዋትድ ጎይኖና?” ያጋዳ ካላዳ ኦይቾና መላ ናገታ። ኤንቲ ባንታ ፆሳታ ጎይንያ ዎደ ጎዳይ እፅያ ኡባ ኦያ ግሾ፥ ጎዳ ነ ፆሳ ነ ሄሳዳ ጎይናናዉ በሰና። ኤንቲ ሀር አቶሽን፥ ባንታ አደ ናይታነ ማጫ ናይታ ባንታ ፆሳታስ ያርሾ ኦድ ታማን ፁጎሶና።
ህዛ ታ ነና ኪትዳባ ኡባ ኦ፤ እያ ቦላ ጉጆፋ፤ እያፐ ፓጭሶፓ።
ጌሻ ማፃፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.