ዛረ 10

ናምአን ታሙ ኪታታ

(ከሳ 34:1-10)

1ሄ ዎደ ጎዳይ ታኮ፥ “ኮይሮይሳ መላ ናምኡ ሎቸ ሹቻታ ጊግሳዳ ታኮ ዙማ ቦላ ከያ። ቃስ እያ ዎናዉ ምፈ ታቦተ ኦ። 2ታኒ ካሰ ነ መንዳ ሹቻታ ቦላ ደእያ ቃላታ ሀ ሹቻታ ቦላ ፃፋና፤ ነ ኤንታ ታቦትያ ግዶን ዎ” ያግስ።

3ታኒ ሶቃላ ምፈ ታቦተ ኦስ። ካሰይሳ መላ ናምኡ ሎቸ ሹቻታ ጊግሳስ፤ ሄ ሹቻታ ታ ኩሸን ኦይካዳ ዙማ ቦላ ከያስ። 4ህንተ ዙማ ፃጶን ሺቅዳ ጋላስ፥ ታማ ግዶፈ ጎዳይ ህንተዉ ኦድዳ ቃላታ፥ ሄስካ ታሙ ኪታታ፥ ካሰ ፃፍዳይሳታ ሄ ሹቻታ ቦላ ጎዳይ ፃፍድ ኤንታ ታዉ እሚስ። 5ሄሳፈ ጉየ፥ ታኒ ዙማ ቦላፈ ዎዳ፥ ጎዳይ ታና ኪትዳይሳዳ፥ ሄ ሹቻታ ታ ኦዳ ታቦትያ ግዶን ዎስ፤ ሀእካ ኤንቲ ያን ደኦሶና።

6እስራኤለ አሳይ ባኣሮታ በንያቃናፐ ደንድድ፥ ሙሰራ ብዶሶና። አሮን ያን ሀይቅድ ሞገትስ፤ እያ ናአይ አላዛር እያ ላትድ፥ እያ በሳን ካህነ ሀላቃ ግድስ። 7ኤንቲ ያፐ ጉድጎዳ ጌተትያ በሳ ብዶሶና፤ ያፐ ቃስ ጎግያ ሃት ደእያ ዮፅባታ ጌተትያ በሳ ብዶሶና። 8ሄ ዎደ ጎዳ ጫቆ ታቦትያ ቶካና መላ፥ ጎዳ ስንን ኤቅድ እያ ሀጋዛና መላነ ሀች ጋካናዉ ኤንቲ ኦይሳ መላ ጎዳ ሱንን አንጃና መላ ሌወ ኮቻ ጎዳይ ባዉ ዱማይስ። 9ሄሳ ግሾ፥ ሌወ ኮቻስ ኤንታ እሻታ ግዶን ግሾይ ዎይኮ ላት ባዋ፤ ጎዳይ፥ ህንተ ፆሳይ ኤንታዉ ግዳይሳዳ ኤንታ ላታይ ጎዳ።

10ታኒ ካሰይሳዳ ኦይታሙ ጋላስነ ኦይታሙ ቃማ ዙማ ቦላ ጋምአስ። ጎዳይ ዛሪድ ታ ዎሳ ስእድ ህንተና ይሳናዉ ኮይቤና። 11ጎዳይ ታኮ፥ “ታኒ ኤንታ አዋታስ እማና ጋዳ ጫቅዳ ቢታ ኤንቲ ገላና መላነ ላታና መላ ሀ አሳ ካለ” ያግስ።

ፆሳስ ኪተተ

12ነኖ፥ እስራኤለ፥ ጎዳይ ኔፐ ኮየይ ሀይሳ፤ ጎዳ፥ ነ ፆሳ ያያ፤ እያ ኦግያ ኡባን ባ፤ እያ ዶሳ፤ ነ ኩመ ዎዛናፐነ ነ ኩመ ሸምፑዋፈ ጎዳ ነ ፆሳስ ኦ። 13ነዉ እንጀታና መላ ታ ሀች ነዉ እምያ ጎዳ ኪታታነ አዋጆታ ናጋ።

14ሳሎይነ ሳሎፐ ቦላራ ደእያ ሳሎት፥ ቃስ ሳእነ ሳአን ደእያ ኡባይ ጎዳ፥ ነ ፆሳባ ግደይስ ቱማ። 15ግዶሽን፥ ጎዳይ ህንተ ማይዛታን ኡፋይትድ፥ ኤንታ ሲቅስ፤ ሀች ህንተ በኤይሳዳ ኤንታፈ ጉየን ኤንታ ሼሽ ግድዳ ህንተና ካዎተታ ኡባፈ አድ ዶርስ። 16ሄሳ ግሾ፥ ህንተ ዎዛና ቃፃርተ፤ ህዛፐ ህንተ ዎዛና ምንፍተ። 17ጎዳይ፥ ህንተ ፆሳይ ፆሳታ ፆስነ ጎዳታ ጎዳ። እ ግታ ፆሲ፤ እ ዎልቃማነ ያሽያ ፆሲ። እ ሶምኦ በእድ ፕርደና፤ ዎፈ ኤከና። 18እ ይኦታስነ አምኤታስ ሱረ ፕርዴስ፤ በታንቹዋ ሲቅድ፥ እያዉ ካነ ማኦ እሜስ። 19ህንተካ በታንቾታ ሲቅተ፤ ህንተ ህንተ ሁጰን በተ አስ ግድድ ግብፀን ደእደታ። 20ጎዳ፥ ነ ፆሳ ያያ፤ እያዉ ኦ፤ እያራ ኦይከታ፤ እያ ሱንን ጫቃ። 21ኔኒ ነ አይፈን በእዳ ግታነ ያሽያ ማላልስያባታ ነዉ ኦዳይ፥ እ ነ ጋላታ፤ ነ ፆሳ። 22ግብፀ ቢታ ዎዳ ህንተ ማይዛት ኩመ ላፑን ታማ፤ ሀእ ጎዳይ፥ ህንተ ፆሳይ ህንተና ሳሎ ፆልንቶታዳ ዳርስስ።