አሞፀ 7

ቦለ፥ ታማነ የገ ዎዶሮ

1ኡባ ሃርያ ጎዳይ ታና ቆንጨ በስስ። ሄ ቆንጨን ታኒ ካዋ ጋክያ ካይ ጫከትዳፐ ጉየ፥ ናምአን ጫርዳ ዶላ ቦላ ፆሳይ ቦለ ዉደ መሽን በአስ። 2ኤንቲ እርፃባ ኡባ ምድ ዉርስዳ ዎደ ታኒ፥ “አቤት፥ ኡባ ሃርያ ጎዳዉ፥ ሀያና ነ ደርያ ማራርክ! ያይቆባ ዛረት ዋንድ አታናዉ ዳንዳኦና? ኤንቲ ኡባ ጉ!” ያጋስ።

3ሄሳ ግሾ፥ ጎዳይ ኤንታዉ ቃትድ፥ “ሀ ኔኒ በእዳባይ ፖለተና” ያግስ።

4ኡባ ሃርያ ጎዳይ ታና ሀራ ቆንጨ በስስ። ኡባ ሃርያ ጎዳይ ባ አሳ ፕርዳናዉ ታማ ፄግስ፤ ሄ ታማይ ግታ ጪሞ አባ ም ድግድ፥ ቢታ ማናዉ ዶምስ። 5ታኒ፥ “አቤት፥ ኡባ ሃርያ ጎዳዉ፥ ሀያና ሀ ታማ ቶይሳርክ! ያይቆባ ዛረት ዋንድ አታናዉ ዳንዳኦና? ኤንቲ ኡባ ጉ!” ያጋስ።

6ሄሳ ግሾ፥ ጎዳይ ቃትድ፥ “ሀይስ ፖለተና” ያጌስ ኡባ ሃርያ ጎዳይ።

7ቃስ ፆሳይ ታና ሀራ ቆንጨ በስስ። ታኒ ሄ ቆንጨን በእያ ዎደ፥ ጎዳይ ቱምበ ኦይክድ፥ ቱምበን ልከትድ ግምበትዳ ግምብያ ማታን ኤቅስ። 8ጎዳይ ታኮ፥ “አሞፀ፥ ኔኒ አይ ፄላይ?” ያግድ ኦይችስ።

ታኒ፥ “ቱምበ ፄላይስ” ያጋስ።

ጎዳይ ታኮ፥ “ሄኮ፥ ታኒ ታ አሰ ግድዳ እስራኤለ ግዶን ቱምበ የጋይስ፤ ታኒ ኤንታ ሴሮና አግከ። 9ይሳቃ ኮቻት ጎይንያ ቃ በሳት ላለታና፤ እስራኤለ ጌሻ በሳት ያና፤ እዮርባማ ካዎተ ቦላ ታኒ ማሻራ ደንዳና” ያግስ።

አሞፀነ አማስያሳ

10ቤተለ ካታማን ካህነ ግድድ ደእያ አማስያስ እስራኤለ ካዋ እዮርባማኮ ሀይሳዳ ያግድ ኪትስ፦ “አሞፀይ እስራኤለ አሳ ግዶን ደእሸ፥ ነ ቦላ ማቀቴስ፤ እ ባ ኦዳን ቢታ ይሴስ። 11እ፥ ‘እዮርባም ማሻን ሀይቃና፤ እስራኤለ አሳይ ባንታ ቢታፈ ድኤትድ ባና’ ያጌስ” ያግስ።

12አማስያስ አሞፀኮ፥ “ነኖ ትንብተ ኦደይሶ፥ ባ፤ ይሁዳ ቢታ ባዳ፥ ያን ኦዳ አቃ፤ ያን ትንብተ ኦዳ። 13ሽን ቤተለይ ካዎይ ጎይንያ በስነ ካዎተ ኬ ግድያ ግሾ፥ ናምአን ሀ በሳን ትንብተ ኦዶፓ” ያግስ።

14አሞፀይ ዛሪድ፥ “ታኒ መህያ ሄምያነ ቦባ አይፈ ማፅያ አሰፐ አትሽን፥ ናበ ዎይኮ ናበ ናአ ግድከ። 15ሽን ጎዳይ ታና ዶርሳ ዉደ ሄምያ በሳፈ ኤክድ፥ ‘ባዳ ታ አሳ እስራኤለስ ትንብተ ኦዳ’ ያግስ። 16ሀእ ህዛ ጎዳይ ግያባ ስአ! ኔኒ፥ ‘እስራኤለ ቦላ ትንብተ ኦዶፓ፤ ይሳቃ ኮቻታ ሳባኮፓ’ ያጋዳሳ። 17ሄሳ ግሾ፥ ጎዳይ፥ ‘ነ ማችያ ካታማ ግዶን ላይማ ግዳና፤ ነ አደ ናይትነ ነ ማጫ ናይት ማሻን ሀይቃና። ነ ቢታይ ዎዶሮን ሻከታና፤ ቃስ ኔኒ ነ ሁጰን አላጋ ቢታን ሀይቃና። ስይ ባይና እስራኤለ አሳይ ባንታ ቢታፈ ድኤትድ ባና’ ያጌስ” ያግስ።