አሞፀ 6

እስራኤለ አየ!

1ህንተኖ፥ አሳይ ማዶ ኦይችያ ቦንቸትዳ እስራኤለ ሀላቃቶ፥ ህንተኖ፥ ፅዮነን እንጀን ደኤይሳቶ፥ ሳማረ ካታማን ህርግ ባይና ኡትዳይሳቶ፥ ህንተና አየ! 2አነ ካልነ ካታማ ብድ በእተ። ያፐ ግታ ሀማታ ካታማነ ፍልስፄመ ካታማ ጌተ ዎተ። ኤንቲ ህንተ ናምኡ ካዎተታፐ አና? ኤንታ ቢታይ ህንተ ቢታፈ ዳልጊ? 3ህንተ፥ “ኢታ ጋላስ ኤለ ዬና” ግድ፥ ኢታ ኦሶ ኦይሳቶ፥ 4ዛለፐ ኦሰትዳ አርሳን ዝንኤይሳቶ፥ እንጀን ኡትዳይሳቶ፥ ዶርሳ ዉድያፐ አንቃራታነ ሚዛ ዎድያፐ ጋታርመንዋ መይሳቶ፥ 5ዳዊቲዳ የ ሚሸ ህንተዉ ጊግስድ፥ ዱማ ዱማ የ የፀይሳቶ፥ 6ዎይነይ ኡሻ ከረራ ጋነይሳቶ፥ አልኦ ሽቶን ትየተይሳቶ፥ ዮሰፋ ኮቻታ ዩዋን አዛኖናይሳቶ፥ ህንተና አየ! 7ሄሳ ግሾ፥ ኮይሮ ድኤታናይ ህንተና፤ ሄ ዎደ ህንተ እንጀ ዱሳይ አታና።

8ጎዳይ፥ ኡባፈ ዎልቃማ ፆሳይ ሀይሳዳ ያግድ፥ ባናን ጫቅስ፦ “ታኒ ያይቆባ ኦቶሩዋ እፃስ፤ ኤንታ ሚፃካ ሻተታስ፤ ታኒ ካታማነ ካታማን ደእያ ኡባ ኤንታ ሞርከታስ አዳ እማና” ያጌስ።

9እስ ኬን ታሙ አስ አትኮ፥ ኤንትካ ሀይቃና። 10ሀይቅዳይሳታ ዳቦታፐ እሶይ አሀ ሞጋናዉ ሶፐ ከስ ኤፍሸ፥ ሄ ኬን ቆሰትዳ ኡራኮ፥ “ኔራ አትዳ ሀራ አስ ደኢ?” ያግድ ኦይቻና። እ ዛሪድ፥ “ባዋ” ያጋና። ኦይቸይስ ዛሪድ፥ “ሀይዛ፥ ሀይዛ! ጎዳ ሱን ኑኒ ፄጋናዉ ኮሸና” ያጋና።

11ጎዳ ኪታን፥ ግታ ኬት ላለታና፤ ላፋ ኬት መቀረታና። 12ፓራት ዛላ ቦላ ጋላባናዉ ዳንዳኦና? ዎይኮ ጎሻንቾይ ቦር ዋፅድ፥ አባ ጎያናዉ ዳንዳኢ? ሽን ህንተ ሱረ ፕርዳ ጪየ፥ ፅሎተ ጫሞ ኦደታ። 13ህንተ ሎዶባራ ካታማ ፆንዳ ግሾ ኡፋይተታ፤ ህንተ፥ “ኑኒ ቃርናይማ ካታማ ኑ ምኖተን ኦይክዳ” ግድ ጬቀተታ።

14“ህንተኖ፥ እስራኤለ አሳዉ፥ ታኒ ህንተ ቦላ ሀራ ካዎተ ደንና፤ ኤንቲ ህንተና ሀማታ ፕኑዋፐ ዶምድ፥ አራባ ዛንጋራ ጋካናዉ ኡንኤና” ያጌስ ጎዳይ፥ ኡባፈ ዎልቃማ ፆሳይ።