2 ጰፅሮሳ 2

ዎርዶ አስታማረታ

1ሽን ዎርዶ ናበት ካሰ አሳ ግዶን ደኤይሳ መላ ሀእካ ዎርዶ አስታማረት ህንተ ግዶን ደንዳና። ኤንቲ ባንታና ዎዝዳ፥ ጎዳ ካድድ፥ ይስያ ዎርዶ ትምርትያ ኤሀና። ሄሳን ኤንቲ ባንታ ቦላ ኤለስድ ዮ ኤሆሶና። 2ዳሮ አሳይ ዬላይያ ኤንታ ኢታ ኦግያ ካላና፤ ኤንታ ጋሶን ቱማ ኦገይ ጫየታና። 3ዎርዶ አስታማረት ሚሸ ያርድ ባንታዉ መ ከስዳ ሀይሰን ህንተና ቦንቃና። በንፐ ዶምድ ኤንታ ፕርዳይ ጊግድ ኡትስ፤ ኤንታ ዮይካ ኤንታና ናግድ ኡትስ።

4ናጋራ ኦዳ ኪታንቾታስ ፆሳይ ቃቶና፥ ፕርዳ ጋላስ ጋካናዉ ጋናመ ማ ኦላን ኤንታ ቃች የግስ። 5ሄሳዳካ፥ ፆሳይ ፅሎተባ ኦድያ ኖሄነ ሀራ ላፑን አሳታ አሽድ፥ ፆሳ ጎይኖና አሳይ ደእያ በን አላምያ ቃቶና ዮ ሃን ይስስ።1 6ጌላታስ ሌምሶ ግዳና መላ ፆሳይ ሶዶመነ ጋሞራ ካታማታ ብዶ ኦድ ፁግድ ይስስ።2 7ህገስ ኪተቶና ላይማትያ አሳታ ግዶን ዋየትሸ ደእዳ ፅሎ ሎፀ ፆሳይ አሽስ።3 8ሄ ፅሎ አደይ ኤንታ ግዶን ደእሸ፥ ኤንቲ ኦያ ኢታ ኦሱዋ ጋላስ ጋላስ በእዳ ዎደነ ስእዳ ዎደ እያ ሎኦ ዎዛናይ ኡንኤቴስ። 9ሄሳ ግድኮ፥ ጎዳይ፥ ባና ጎይንያ አሳታ ፓጨፐ ዋት አሻነኮ፥ ቃስ ናጋራንቾታ ፕርዳ ጋላሳስ ጋካናዉ ዋትድ ሴርሸ ናግሳኔኮ ኤሬስ። 10ኡባፈ አድ ቱና አሞን አሾ ቆፋ ካለይሳታነ ማታ አዋታ ካይሳታ፥ ፕርዳ ጋላስ ጋካናዉ ጎዳይ ናግስስ።

ሄ አሳት ጋንጀ ምኖነ ኦቶራንቾ ግድያ ግሾ፥ ሳሎ መተታ ጫይሸ ያዮኮና። 11ሽን ኪታንቾት ዎርዶ አስታማረታፐ ዎልቃንነ ምኖተን ዳሮ አሶናሽን ጎዳ ስንን ሳሎ መተታ ጫዮኮና። 12ሽን ሄ አሳት ባንታ ኤሮናባን ገልድ ጫዮሶና። ኤንቲ ኦይከታናዉነ ሀይቃናዉ የለትዳ፥ ዎዛን ባይና ዶአ መላ ሀኖሶና፤ ኤንትካ ዎራ ዶአዳ ጮ ያና።

13ኤንቲ ጋዳ መቱዋዳ ዛር መቶታና። ሴታ ጋላስ የፅሸ ጉፐይሳ ኡፋይስያባ ግድ ቆፖሶና። ኤንቲ ካዉሻታነ ቱናታ ግድ ደእሸ ህንተራ ሻከትያ ሲቆ እማቱዋን ኡፋይቶሶና። 14ላይማትያ ማጫስ ፄልድ አጎና አይፈይ ኤንታዉ ደኤስ፤ ቃስ ናጋራ ኦይሳ አጎኮና። አማኖን ምንቦና አሳ ጭሞሶና። ኤንታዉ ኡባ ዎደ አሞትያ ዎዛን ደኤስ፤ ኤንቲ ባደትዳይሳታ። 15ኤንቲ ሱረ ኦገ አግድ፥ ማካላ ሚሸ ሲቅድ ባልዳ፥ ብኦራ ናኣ ባላማ ኦግያ ካልዶሶና።4 16እ ባ ናጋራ ጋሶን ሀንቀትስ፤ ዶን ባይና ሀረይ አሳዳ ሃሳይድ ናብያ ጎሻተ ተቅስ።

17ሄ አሳት መልዳ ፑልቶታ መላነ ጫርኮይ ቶክድ ኤፍያ ሻራ መላ፤ ኤንታ ናገይ ሳካና ማ። 18ኤንቲ ሀዳነ ኦቶሮ ኦዳ ኦደትሸ ባላን ደእያ አሳ ግዶፈ ከስ ኤክድ ቡሮ ምንቦና አሳታ ላይማተ አሾ አሞን ጭምድ ባለሶና። 19ኤንቲ ባንታዉ ዮ አይለተን ደእሸ ሀራታኮ፥ “ህንተ አይለተፈ ከያና” ያጎሶና። አይስ ጊኮ፥ አስ ባ ፆነትዳባ ኡባስ አይለ። 20ኤንቲ አሽያ ኑ ጎዳ የሱስ ክርስቶሳ ኤርድ ሀ አላምያ ቱናተፈ ከስ ኤክዳፐ ጉየ፥ ዛር ቃፀትድ ፆነትኮ ካሰ ደእያ ደኡዋፐ ጉየይስ ኤንታዉ ኢታ ግዳና። 21ኤንቲ ፅሎተ ኦግያ ኤር ስሚድ አገይሳፈ ኮይሮትድ ጌሻ ኪታ ኤሮናኮ ኤንታዉ ሎኦሽን። 22“ካን ባ ጮሻኮ ጉየ ስሜስ” ቃስ፥ “ሜጨትዳ ጉዱንይ ጉየ ስሚድ ኡርቃን ጎንዶረቴስ” ግያ ሌምሶይ ቱማ ግደይስ ኤንታ ቦላ ኦስ።5