2 ጰፅሮሳ 1

1የሱስ ክርስቶሳ ሀዋረይነ እያ አይለይ፥ ታኒ፥ ስሞን ጰፅሮስ፥ ኑ ፆሳነ ኑና አሽያ የሱስ ክርስቶሳ ፅሎተ ባጋራ ኑይሳ መላ አልኦ አማኖ ኤክዳይሳታስ ሀ ዳብዳብያ ፃፋስ።

2ፆሳነ ኑ ጎዳ የሱሳ ኤሮን አ ኬሀተይነ ሳሮይ ህንተዉ ኩሞ።

ፆሳ ፄሳነ ዶሩዋ

3ባ ቦንቾንነ ሎኦተን ኑና ፄግዳ እያ ኤሮን ደኦስነ ፆሳ ዳንድ ዳናዉ ኮሽያባ ኡባ ፆሳይ ባ ዎልቃን ኑስ እሚስ። 4ህንተ ኢታ አሞ ጋሶን መትያ ሀ አላምያን ደእያ ዮፐ ከስ ኤካናዳነ ፆሳ ፆሳተን ሻከታናዳ፥ ሀ እሞታታ ባጋራ ዳሮ አልኦነ ግታ ኡፋይሳ ኑስ እሚስ። 5ሄሳ ግሾ፥ ምንድ፥ ህንተ አማኑዋ ቦላ ሎኦተ፥ ሎኦተ ቦላ ኤራተ፥ 6ኤራተ ቦላ ባና ሃሮ፥ ባና ሃሮ ቦላ ገንጫ፥ ገንጫ ቦላ ፆሳ ዳኖ፥ 7ፆሳ ዳኖ ቦላ እሻተ ኬሀተ፥ እሻተ ኬሀተ ቦላ ሲቆ ጉጅተ። 8ሀይሳቲ ህንተዉ ዳርድ ደእያባ ግድኮ፥ ጎዳ የሱስ ክርስቶሳ ኤሮን ማድያ አስነ አይፈራ ደእያ አስ ኦና። 9ሽን ሄሳት ባይና ኦንካ ማታን ደእያባ ፃላላ በእያ ቆቀ። እ ባ ካሰ ናጋራፐ ጌይዳይሳ ዶግስ።

10ሄሳ ግሾ፥ ታ እሻቶ፥ ህንተ ፄሳነ ህንተ ዶሩዋ ምንናዉ ካሰይሳፈ አድ ምንተ። ህንተ ሄሳታ ኦያባ ግድኮ፥ በተከታ። 11ሄሳን ኑ ጎዳነ ኑና አሽያ የሱስ ክርስቶሳ መርና ካዎተ ገልያ ኩመ ማታይ ህንተዉ እመታና።

12ሄሳ ግሾ፥ ህንተ ሀይሳታ ኤርያባነ ሄ ኦይክዳ ቱማን ምንድ ደእያባ ግድኮካ፥ ታኒ ሀይሳታ ኡባ ዎደ ህንተና ሀሳይሶ አግከ። 13ታኒ ሸምፖራ ደእዳ ዎደ ኡባን ህንተና ሀሳይሳናይስ ኮሽያባ ጋዳ ቆፓይስ። 14ኑ ጎዳ የሱስ ክርስቶሲ ታዉ ቆንጭሳዳይሳዳ ታኒ ሀ ሀይቅያ አሳተ ጋምኦና ቃራ የጋዳ ባናይሳ ኤራይስ። 15ታኒ ህንተፈ ሻከትኮካ ህንተ ሀይሳታ ኡባ ዎደ አኬካና መላ ታዉ ዳንዳኤትያባ ኡባ ኦና።

16ኑኒ ጎዳ ክርስቶሳ ዎልቃነ እያ ዩሳባ ህንተዉ ኦደይ፥ እያ ግታ ቦንቹዋ በእድፐ አትሽን፥ መ ከስዳ ሀይሰ ግደና። 17ዳሮ ዎልቃማ ቦንቹዋፈ፥ “ታኒ ኡፋይትያ፥ ታ ዶስያ ናአይ ሀይሳ” ግያ ቃላይ ይዳ ዎደ፥ ፆሳ አዋፐ ቦንቾነ ጋላታ ኤክስ።1 18ኑኒ ጌሻ ዙማ ቦላ እያራ ደእያ ዎደ ሄ ቃላይ ሳሎፐ ይሽን ስእዳ።

19ኑስ ሄሳፈ አያ አማነትዳ ትንብተ ቃል ደኤስ። ሳእ ዎንታና ጋካናዉነ ባካል ህንተ ዎዛናን ዶላና ጋካናዉ፥ ማን ፖእያ ፖኦ አስ ናገይሳዳ፥ ህንተ ሄ ቃላ ናግኮ ሎኦ ኦታ። 20ኡባፈ ካሰትድ ሀይሳ ኤርተ። ጌሻ ማፃፋን ፃፈትዳ ትንብተ ቃላ ኦንካ ባ ዶስዳዳ ብርሻናዉ ዳንዳኤና። 21ትንብተ ኡባ፥ ፆሳይ ኪትዳ አሳት ጌሻ አያናይ ካለን፥ ኦድዶሶናፐ አትሽን፥ አሳ ሸነን ኦድቦኮና።