1 ፅሞትዮሳ 2

ኡባስ ዎስተ

1ኡባፈ ስንታዳ፥ አሳ ኡባስ ፆሳ ኦይቻናዉ፥ ዎሳናዉ፥ ጋናታናዉነ ጋላታናዉ በሰይሳ ታኒ ነና አኬክሳይስ። 2ኑኒ ቱማ አያና ደኦንነ ጌሻተን ፆሳ ጎይንሸ ሳሮተንነ ዎፑ ግዳ ደኦን ዳና መላ ካዎታስነ ሹማታ ኡባስ ዎስተ። 3ሄሳ መላ ዎሳይ ኑና አሽያ ፆሳ ስንን ሎኦነ ኡፋይስያባ። 4ፆሳይ አስ ኡባይ አታናዳነ ቱማ ኤራናዳ ኮዬስ። 5እስ ፆሲ ደኤስ። ፆሳፈነ አሳፐ ግዶን ግድድ ስገያ እሶይ ደኤስ፤ እካ አሰ ግድዳ ክርስቶስ የሱሳ። 6እ አሳ ኡባ ዎዛናዉ ባና አድ እሚስ። ፆሳይ ባ ዎድያን አሳ ኡባ ዎዛናዉ ኮየይሳ በሲያ ማርካይ ሀይሳ። 7ፆሳይ ታና ዎንገላስ አስታማረነ ሀዋረ ኦድ ዶርዳይ ሄሳሳ። ታኒ ቱማ ኦዳይስ፤ ዎርዶትከ፤ አማኖንነ ቱማን አይሁደ ግዶና አሳስ ማርካታና መላ ፆሳይ ታና ሹምስ።1

8ሄሳ ግሾ፥ ኡባ በሳን ደእያ አደት፥ ባንታና ፆሳስ ዱማይድ፥ ሀንቆነ ፓላማ ድግድ፥ ባንታ ኩሽያ ፑደ ደንድ ፆሳ ዎሳና መላ ኮያይስ።

9ሄሳዳ ማጫሳይ ባንታና ሃርዳይሳ ቆንጭስያ፥ ቦንቾይነ ማር ደእያ ማኡዋ ማአናዉ በሴስ። ኤንቲ ማር ባይና ሁጰ ዳን፥ ዎርቃን ዎይኮ እንቆን፥ ዎይኮ አልኦ አፍላን ባንታና አሌቅሶፖ።2 10ሽን ፆሳስ ጎይናይስ ግያ ማጫሳይ ባንታዉ በሰይሳዳ ሎኦባ ኦና።

11ማጫስ ኪተተን ስእ ግድ ታማሮ። 12ታኒ ማጫሳይ ታማርሳና መላ ዎይኮ አደ ቦላ አዋታና መላ ግዶናሽን፥ ስእ ግድ ዳና መላ ኮያይስ። 13አዳመይ ኮይሮ መትስ፤ ጉየፐ ሄዋና መታሱ።3 14ቃስ ጭመታዳ ፆሳ ህግያ መንዳይ ማጫስፐ አትሽን፥ አዳመ ግደና።4 15ሽን ማጫስ አማኖን፥ ሲቆንነ ጌሻተን ባንታና ሃርድ ደእኮ5 ናይታ የሎን አታና።