ሮመ 16

ሳሮ

1ክንክረ ካታማን ደእያ ዎሳ ኬን ኦያ ኑ ምችያ ፌበና ሎኦ ማጫስ ግደይሳ ህንተ ኤራና መላ ኮያይስ። 2ህንተ እዮ አማንያ አሳት ጎዳ ሱንን ሞካናዉ በሲያ አማንያ አሳታፐ እሱዋዳ ሞክተ። እያ ህንተፈ ኮያባ ኡባ እዮ ማድተ። እያ ባ ሁጰን ዳሮ አሳ ማዳሱ፤ ቃስ ታና ታ ሁጰንካ ዳሮ ማዳሱ።

3ክርስቶስ የሱሳ ኦሱዋ ታራ እስፈ ኦያ ጵርስቅላነ አቅላ ሳሮ ጊተ።1 4ኤንቲ ታ ግሾ ባንታ ሸምፑዋ አድ እምዶሶና። ታ ፃላላ ግዶናሽን፥ አይሁደ ግዶና አሳ ዎሳ ኬ ኡባይ ኤንታ ጋላቴስ። 5ኤንታ ሶን ሺቅያ አማንያ አሳ ሳሮ ጊተ።

ኢሰ ቢታን ክርስቶሳ ኮይሮ አማንዳ፥ ታ ዶስያ ኤጳነፆሳስ ታ ሳሮዋ ኦድተ።

6ህንተ ግሾ ኦሶን ዳሮ ዳቡርዳ ማይራሞ ሳሮ ጊተ። 7ታራ ቃሾ ኬን አዳ ታ አይሁደ ላገታ አንድራንቆሳነ ዩንያሳ ሳሮ ጊተ። ኤንቲ የሱሳ ሀዋረታ ግዶን ኤረትዳይሳታ። ቃስ ኤንቲ ክርስቶሳ ታፐ ስን አማንዶሶና።

8ጎዳን አማንያ ታ ሲቆ ላግያ፥ ጵልያፆና ሳሮ ጊተ። 9ክርስቶሳ ኦሱዋ ኑራ እስፈ ኦያ ኡርባኖሳነ ታ ዶስያ እስታኩሳ ሳሮ ጊተ። 10ክርስቶሳን አማንያ አይልያ አጰልሳስ ታ ሳሮዋ ኦድተ። አርስፆቡሎሳ ሶ አሳስ ታ ሳሮዋ ኦድተ። 11ታ አይሁደ ላግያ ሄሮድዮና ሳሮ ጊተ።

ናርስሳስነ እያ ሶ አሳፐ ክርስቶሳ አማንዳይሳታ ሳሮ ጊተ።

12ጎዳ ኦሱዋን ዳቡርያ ትሩፋይናነ ትሩፎሳ ሳሮ ጊተ። ቃስ ጎዳስ ዳሮ ዳቡራዳ ኦያ፥ ታ ዶስያ ፃርስዶ ሳሮ ጊተ። 13ጎዳ ኦሱዋን ዳሮ ኤረትዳ ሩፎሳስነ ታና ባ ናአዳ በእያ እያ አየስ ታ ሳሮዋ ኦድተ።2 14አስቃርፆናስ፥ አፍለሶንጳስ፥ ሄርሜሳስ፥ ጳፅሮባናስ፥ ሄርማስነ ኤንታራ ደእያ አማንያ እሻታ ኡባስ ታ ሳሮዋ ኦድተ። 15ፍሎሎጉሳ፥ ዩላ፥ ኔራ፥ እያ ምችዉ፥ አልንፆሳነ ኤንታራ ደእያ አማንያ አሳ ኡባ ሳሮ ጊተ።

16ጌሻ ዬረተ ዬረትሸ፥ እሶይ እሱዋ ሳሮተ። ክርስቶሳ ዎሳ ኬ ኡባይ ህንተና ሳሮ ያጎሶና።

ዉርሰ ዞረ

17ታ እሻቶ፥ ህንተ ታማርዳ ትምርትያ እፅድ፥ ህንተ ግዶን ሻከተነ መቶ መያ አሳታፐ ናገትተ። ኤንታፈ ሃክተ። 18ሄሳ መላ አሳት ባንታዉ ኦሶናፐ አትሽን፥ ኑ ጎዳ ክርስቶሳስ ኦኮና። ባንታ ማልእያ ዶናንነ ሳጶያ ቃላን አይኮ ኤሮና አሳ ዎዛና ባለሶና። 19ዎንገላስ ህንተ ኪተትዳይሳ አሳ ኡባይ ስእዳይስ ታና ኡፋይሴስ። ሽን ህንተ ሎኦባ ኤራና መላነ ኢታባፐ ሃካና መላ ታ ኮያይስ። 20ሳሮተ ፆሳይ ፃላህያ ህንተ ቶሁዋፐ ጋርሳን ጋጭ የጋና።

ኑ ጎዳ የሱስ ክርስቶሳ አ ኬሀተይ ህንተራ ግዶ።

21ታራ ኦያ ፅሞትዮስ ህንተና ሳሮ ያጌስ።3 ሄሳዳካ፥ ታ ዳቦት ሉቅዮስ፥ ያሶንነ ሶስጳፅሮስ ህንተና ሳሮ ያጎሶና።

22ታኒ፥ ሀ ዳብዳብያ ፃፍዳ፥ ፃርፅዮስ፥ ህንተና ጎዳ ሱንን ሳሮ ያጋይስ።

23ታና ሞክዳይነ ዎሳ ኬ ኡባይ እያ ሶን ሺቅያ ጋዮስ፥ ህንተና ሳሮ ያጌስ። ካታማ ሚሽያ ኦይክያ ኤራስፆስነ ኑ እሻ ቃርፆስ ህንተና ሳሮ ያጎሶና።4 24[ኑ ጎዳ የሱስ ክርስቶሳ አ ኬሀተይ ህንተ ኡባራ ግዶ። አምንእ።]56

25ጋላታይ ፆሳስ ግዶ። ታኒ፥ የሱስ ክርስቶሳባ ኦድያ ዎንገላ ቃላነ ዳሮ ዎደፐ ቆሰትድ ጋምእዳ ቱማተን፥ ፆሳይ ህንተና አማኖን ምንድ ኤሳናዉ ዳንዳኤስ። 26ሽን ሀእ ሄ ቱማይ ቆንጭስ። ካዎተ ኡባይ አማንድ ኪተታና መላ መርና ፆሳ ኪታን ናበት ሄ ቱማባ ፃፍዶሶና።

27የሱስ ክርስቶሳ ባጋራ ጭንጫተ እያ ፃላላስ ደእያ፥ እስ ፆሳስ መርናዉ ቦንቾይ ግዶ። አምንእ።