ከሳ 13

ባይር ኡባይ ጎዳስ ዱማ

1ጎዳይ ሙሰኮ፥ 2“ባይራ የለትዳ አደ ኡባ ታዉ ዱማያ። እስራኤለ አሳ ግዶን ባይራ የለትዳ ኡባይ፥ አሰ ዎይኮ መሄ ግድን ኡባይ ታባ” ያግስ።

3ሄሳፈ ጉየ፥ ሙሰይ አሳኮ፥ “ሀ ጋላሳይ፥ ህንተ ግብፀ አይለተፈ ከይዳ ጋላስ ግድያ ግሾ እያ ቆፕተ። ጎዳይ ባ ግታ ዎልቃን ህንተና ከስዳይ ሄ ጋላሳና ግድያ ግሾ፥ እርሾይ ገልዳባ አይኮካ ሞፕተ። 4አቢባ አጌናን፥ ሀች ጋላሳን ህንተ ግብፀፈ ከይደታ። 5ጎዳይ ካናነታ፥ ህተታ፥ አሞረታ፥ ህወታነ ያቡሰታ ቢታ ህንተና ላትሳናዉ ህንተ ማይዛታስ ጫቅስ። ጎዳይ ህንተና ማነ ኤስ ኩምዳ ሄ ቢታ ጋያ ዎደ ላይን ላይን ሀ ኮይሮ አጌናን ሀ ጋላሳ ቦንችተ። 6ላፑን ጋላስ ኩመ እርሾይ ገልቦና ኡይ ሚተ። ላፑን ጋላሳይ ጎዳ ቦንችያ ባኣለ ግዳና። 7ሄ ላፑን ጋላሳታን እርሾይ ገልቦና ኡይ ሚተ። እርሾይ ዎይኮ እርሾይ ደእያባይ ህንተ ግዶንነ ህንተ ዛዋን በንቶፎ። 8ሄ ጋላስ ኔኒ፥ ‘ታኒ ሀይሳ ኦይ ታኒ ግብፀፈ ከይያ ዎደ ጎዳይ ታዉ ኦዳይሳ ቆፓናሳ’ ያጋዳ ነ ናይታስ ኦዳ። 9ሀ ባለይ ህንተ ኩሸን ዎይኮ ህንተ ሶምኦን ቃሸትዳ ማላ ግድድ ህንተና ቆፍስያባ ግዳና። ጎዳይ ህንተና ባ ግታ ዎልቃን ግብፀፈ ከስዳ ግሾ፥ ጎዳ ዎጋይ ህንተ ዶናፐ ዎና መላነ ሀራታስ ህንተ ኦዳና መላ ህንተና ቆፍሳና። 10ሄሳ ግሾ፥ ህንተ ሀ ባልያ ላይን ላይን ባ ዎድያን ቦንችተ።

11“ጎዳይ ህንተዉነ ህንተ ማይዛታስ እማና ግድ ጫቅዳ ካናነታ ቢታ ገልስድ፥ ሄ ቢታ ህንተዉ እምያ ዎደ፥ 12ባይራ የለትዳ ኡባ ጎዳስ እማ። ነ መሄታን ባይራ የለትያ አደ ኡባይ ጎዳሳ። 13ባይራ የለትያ ሀረ ማር ኡባ ዶርሳ ማራን ዎዛ። ዎዞና እፅኮ እያ ሞርግያ መን። ነ አደ ናይታ ግዶን ባይራ የለትዳ ኡባ ዎዛ። 14ስንራ ያና ላይታን ነ ናይት ነና፥ ‘ሀይስ አይቤ?’ ግድ ኦይችኮ ኔኒ፥ ‘ጎዳይ ኑና ባ ግታ ዎልቃን ግብፀ አይለተፈ ከስስ። 15ግብፀ ካዎይ ባ ዎዛና ሙምስድ ኑና የዶና እፅን፥ ጎዳይ ግብፀ ቢታን ደእያ አሳፐ ዶምድ መሄ ጋካናዉ ባይራ ኡባ ዎስ። ኑኒ ባይራ የለትዳ መሄ አደ ጎዳስ ያርሸይነ ባይራ አደ ናይታ ኑኒ ዎዘይ ሄሳሳ ያጋ። 16ጎዳይ ኑና ባ ግታ ዎልቃን ግብፀፈ ከስዳ ግሾ፥ ሀ ባለይ ኑ ኩሸን ዎይኮ ኑ ሶምኦን ቃሸትዳ ማላ ግድድ ኑና ቆፍስያባ ግዳና’ ያጋ” ያግስ።

ሻራነ ታማ ቱኡሱ

17ካዎይ አሳ የድዳ ዎደ፥ ፆሳይ ኤንታ ማታ ግድዳ ፍልስፄመ ቢታራ ካንስያ ኦግያራ ካለቤና። ፆሳይ ሄሳ ኦዳይ፥ “አሳ ኦል ጋክኮ፥ ባንታ ቆፋ ላምድ ጉየ ግብፀ ስማና” ያግድ ቆፕዳ ግሾሳ። 18ሄሳ ግሾ፥ ፆሳይ አሳ መላ ቢታ ኦግያራ ዩሽድ፥ ዞኦ አባኮ1 ካለስ። እስራኤለት ኦላስ ጊግድ ግብፀ ቢታፈ ከይዶሶና።

19ዮሰፍ፥ “ፆሳይ ቱማ ህንተና አሻናዉ ያና። ሄ ዎደ ህንተ ታ መቀ ሀ ቢታፈ ኤክድ ቢተ” ያግድ እስራኤለታ ጫቅስድ ዎዳ ግሾ ሙሰይ እያ መቀ ባራ ኤክድ ብስ።

20ኤንቲ ሱኮታፐ ደንድድ መላ ቢታ ጋፃን ደእያ ኤታማን ኡትዶሶና። 21ኤንቲ ጋላስነ ቃማ ሄመታና መላ ጋላስ ኤንታና ካለናዉ ሻራ ቱሳን፥ ቃማ ፖእስድ ኤንታ ካለናዉ ታማ ቱሳን ኤንታ ስንን ብስ። 22ጋላስ ሻራ ቱሳይ፥ ቃማ ታማ ቱሳይ አሳ ስንፈ ክችቤና።