Kitaaba Faaru'uu 80

Adde'etti Deebi'iisa Israa'eliitiif Daadimata Dhikaate

Sooressa faarfattootaatiif, faaruu Asaafii ta akka yoyyoma faaruu, «Daraaraa» jedhantee beekkantutti faarfatante, ta dhugaa bayiisaa.

1Ee tissee Israa'elii,

ka sanyii Yoseefii akka hoole'ee sooressitu,

ka barcumaa mootumma'aa keeti

ka wodhakkaa dada ol-gubba'aa

ta koola qadduu irra teetteertu,

nuu dhage'i;

ifa keeti issiitii,

2sanyii Efreemii, sanyii Beniyaaminiitii fi

sanyii Minaasee duratti mudhisi.

Hunna teetiin ka'iitii,

koyii nu baasi.

3Ee Waaqa adde'etti nu deebisi;

nuu marariitii nu baasi.

4Ee Mootii Waan Maraa

Waaqa waan mara dande'u,

haga yoomii daadimata kolbaa teetiititti aarta?

5Ati imimmaan akka sagale'ee isaan areerte;

akka bisaanii imimmaan isaan obaatte1.

6Gosi biyya adda addaa ta ollaa keennaa,

lafa teenna fudhatiisaaf

akka wol lolanu goote;

diinoti keennalle nutti murgane.

7Ee Waaqa waan mara dande'u,

adde'etti nu deebisi;

nuu marariitii nu baasi.

8Ati muka woyni'ii2 biyya Gibxi'iitii fiddee,

gosa biyya adda addaa ariitee baattee,

lafa san keessatti dhaadde.

9Ati lafa san cirteefii,

muki woyni'ii sunille hidda gad fageeffatee,

lafa san guute.

10Gaaroti gaaddisa isaatiin gollamane;

dameeleen isaalle hindheensa gugurdaa gollite.

11Dameelee ifii haga abbaayaa Mediteraaniya'aa,

kichuu ifiille haga laga Efraaxiisii diriirfate.

12Ati maaf dalleya isatti marfameeru irraa diiddee,

nami karaa san dabaru marti

midhaan isaa irraa guurata ree?

13Gurreen gongoma'aa irra sirban;

bineensi marti irraa nyaatan.

14Ee Waaqa waan mara dande'u,

gara keenna deebi'i;

ol-gubbaa irraa gad nu ilaalii, nuu dhaggi;

muka woyni'ii kana kunuunsi.

15Muka harki keeti middichi dhaabe kana,

biqiltuu ifiif guddifate tana eegi.

16Diinoti muranee, ibiddaan gubaneeran;

xixxaa teetiin isaan ilaalii, isaan balleessi.

17Nama harka keeti middicha keessa jiru,

ka ifiif jabeeffatte,

harki keeti isa irra jiraatuu ti.

18Achiin duuba nuuti

ijjumaa si irraa duubatti hin deebinu;

jiruu nuu kenni;

nuutille maqaa keeti waammanna.

19Ee Mootii Waan Maraa

Waaqa waan mara dande'u,

adde'etti nu deebisi;

nuu marariitii nu baasi.