Kitaaba Faaru'uu 62

Waaqa Qofatti Addatuu

Faaruu Daawitii sooressa faarfattootaa Yedutu'uuf.

1Fayyinni kiyya isa irraa waan dhufuuf,

lubbuun tiyya Waaqa qofa cadhittee eegatti.

2Inni callaan rassaa kiyyaa fi fayyinna kiyya;

inni kushee tiyya; ani ijjumaa hin raafamu.

3Nama akka dalleya dhaka'aa ka duufee,

akka dalleya daaqee te'e tokko,

isin haga yoomii isa lolaa teettan ree?

4Isaan nama san addee ulfinnaa irraa

gad isa buusiisaaf barbaadan.

Dhara dubbatiisatti gammadan;

afaan ifiitiin hin eebbisan;

gadhaa ifiitiin ammoo hin abaaran.

5Lubbuun tiyya Waaqa qofa cadhittee eeggatti;

addiin tiyya isa irraa naa dhutti.

6Inni callaan rassaa kiyyaa fi fayyinna kiyya;

inni kushee tiyya; ani ijjumaa hin raafamu.

7Fayyinnii fi ulfinni kiyya Waaqa irraa dhufe;

inni rassaa jabaa kiyya; addee ani itti baqadhulle'e.

8Ee kolba'a, yennaa mara Waaqatti addadha'a;

Waaqi ka itti baqannu waan te'eef,

yaada gadhaa keessanii mara itti himadha'a.

9Ilmaan namaa akka qilleensaa ti;

namooti marti womaa moti.

Isaan yoo madaalamane,

qilleensa caalaa sallatan.

10Hunnaan saamiisatti hin addatina'a;

waan hannaan dhaggameen hin koorina'a;

yoo karri teessan ede'antelle,

addii itti hin godhatina'a.

11Waaqi takkaa dubbateera;

ani waan lama dhage'eera.

Sunille, «Hunni ta Waaqaa ti;

12jaalalli bara baraa ka Gootta'aa ti» ta jettu.

Ee Gootta'a ati maraafuu

akka hujii isaatitti gatii isaaf kaffalta.