Kitaaba Faaru'uu 39

Jiruu Namaa Gabaadduu

Faaruu Daawitii, Sooressa faarfattootaa Yedutu'uuf.

(1 Dab. 25:1,3)

1Ani, «Arraba kiyyaan cubbuu akka hin dubbanne

lafa dhaqu maratti ifi hin eegadha;

haga nami hamaan na bira jiru,

ani womaa hin dubbadhu» jedheera.

2Jecha tokkolle hin dubbatinuu cadhise;

marroo waan dansa'aalle hin dubbanne;

rakkinni kiyya ammoo guddataatuma ideeme.

3Gadhaan kiyya na gubatee,

yaada kiyya keessatti ibiddi gabbate;

achiin duuba ani arraba kiyyaan dubbadhee,

4«Mootii Waan Maraa kiyya, dhuma jiruu tiyyaa,

barri jiruu tiyyaa hagam akka te'e natti himi;

ani jiruun tiyya

attam ariifattee dabariisatti akka jirtu beekuu ti!» jedhe.

5Ati bara jiruu tiyyaa taakkuu takkaa goote;

barri jiruu tiyyaa

si duratti woyitti hin laakkowamu.

Dhugumaan jiruu nama maraatuu

akka baafata hafuuraa tokkochaa ti.

6Dhugumaan nami akka gaaddisaa ti.

Inni akkanumaan elowa;

karra tuulata; ammoo ka isii fudhatu hin beeku.

7Goottaa kiyya, amma ani maan eegadha ree?

Addiin tiyya si'i.

8Cubbuu tiyya mara jalaa na baasi;

worri gowwooleen akka natti murganu hin godhin.

9Akka akkana rakkadhu ka godhe si waan teeteef,

ani hin cadhisa; afaan kiyya hin saaqadhu.

10Dhowicha harka keetiitiin dadhabeera;

dhowicha keeti na irraa kaasi.

11Ati sababa yakkaa isaatiif,

nama xixxee hin adadda;

akka waan qu'een nyaattee

karra isaa hin balleessita.

Dhugumaan nami akka baafata hafuura tokkochaa ti.

12Ee Mootiin Waan Maraa,

daadimata kiyya naa dhage'i;

iyya tiyyalle caqasi;

imimmaan tiyyatti hin cadhisin.

Ani si duratti alaga'a;

akkuma abbootii tiyya ta durii keessumma'a.

13Gara hin deebinetti, gara du'aa adoo hin deemin,

gammada diqqaa akka dhaggadhu,

nyaara guurtee na hin ilaalin.