भगवानेन छाचला बुल
युहन्ना 9
ईसु पयदावारी सी आंदळा हवलाक देखणेन ताकत आपे
ईसु हेरा चेला भेळुत वाटे जाणे बाजी रवलु ती चु एक माणुस काजे देख्यु चु पयदा हयु ती सीत आंधळु हतलु। ती ईसुन चेला ईसु काजे पुछ्या, “ए मास्तर कुण पाप कर्यु हसे ने जु आंधळु पयदा हयु। जु माणुस पाप कर्यु हसे की हेरा आयस-बास पाप कर्या हसे?”
ईसु जपाप आप्यु, “नी ते जु माणुस पाप कर्यु ने नी ते हेरा आयस-बास पाप कर्या बाकुन जु हेरेन करीन आंधळु पयदा हयु की ईनाक वारु करनेन सी हेरी जीवन मां भगवानेन ताकत देखाव पड़ जाय। ने भगवान जु मेसेक मकेल्लु छे, आपणुक तेरो काम दीसुत पुरो कर लेणु वारु रवसे। बाकुन ची रात आवणे वाळी छे, तेरेमां कुयक काम नी कराये। जत्यार लग मे कळी मां छे तत्यार लग कळीन वीजाळो छे।”
ज कयदीन ईसु भुयमां थुप्यु ने हाते करीन धुळु कालवीन आंदळान डुळा पर चुपड़ी देदु। ने तीना आंदळा काजे कह्यु, “जां सीलोम नावेन हळाव मां तारा डुळा धुय ले।” सीलोम नावेन मतलब छे मकेल्लु। अतरा मां चु आंधळु माणुस जाय्न तीना हळाव मां डुळा धुय लेदु ने जत्यार चु पछु आयु तत्यार देखणे बाजी गुयु।
ईना आंदळान आड़े-धड़े वाळा ने उळखायता माणसे चे पेहल ईनाक भीक मांगतेला देखला चे ईनाक हय देखीन कह्या,
“काय जु चु नी हय जां बठीन पेहेल भीक मांगतेलु?” थुड़ाक माणसे कह्या, “जु हयुत छे। थुड़ाक माणसे कह्या जु चु आंधळु माणुस नी हय बाकुन तेरेन तसु देखाये।”
बाकुन चु आंधळु माणुस कह्यु, “मे हयुत छे।”
ज सामळीन चे तीनाक पुछणे बाजी गुया, “ती तु कसु काय देखणे बाजी गुयु।”
चु माणुस जपाप आप्यु, “ईसु नावेन माणुस थुपे करीन धुळु मारा डुळा पर चुपड़ी देदु। ने मेसेक कह्यु, सीलोम नावेन हळाव मां तारा डुळा धुय ले। ने मे जाय्न डुळा धुय लेदु ने मे देखणे बाजी गुयु।”
ज सामळीन चे तीनाक पुछ्या, “चु कां छे।”
ने चु कह्यु, “काय जाणु।”
फरीसी माणसे वारु हय गुयला आंदळान पतु लागाड़े
वारु हय गुयला आंदळा माणुस काजे चां भेळा हवला माणसे फरीसी माणसे ने यहुदी माणसे धड़े लाया। तीने दाहड़े ईसु धुळु1 कालवीन तीना आंदळान डुळा वारु करलु चु दाहड़ु आरामेन दाहड़ु हतलु। अतरामा फरीसी माणसे बी तीना माणसेक पुछणे बाजी गुया, “तु कसु काय देखणे बाजी गुयु।” चु तीनुक कह्यु, “ईसु नावेन माणुस धुळु कालवीन मारा डुळा पर चुपड़ी देदु। ने मे धुय लेदु ती पछेन देखणे बाजी गुयु।”
जी वात सामळीन थुड़ाक फरीसी माणसे कह्या, “हीयु ईसु आरामेन दाहड़ु नी पाळतु। तेरेमां हीयु भगवानेन्चां सी नी आवलु हय।”
ने जी वात सामळीन थुड़ाक फरीसी माणसे कह्या, “पापी माणुस असा वारु कामेन सहलाणी कसु देखाड़ सके?” अतरा मां ईसुन बारामां तींद्रे-तींद्रे मां वीरुद हय गुयु।
एक कावा अळी तीना आंदळा काजे पुछ्या, “जु माणुस तारा डुळा वारु करलु छे, तेरा बारामां तु काय कहें?” ने चु माणुस कह्यु, “चु एक भगवानेन अघी सी आवणे वाळी वात बताड़ने वाळु माणुस छे।”
जु माणुस पेहेल आंधळु हतलु, चु माणुस हय देखणे बाजी गुयु ईनी वातेम तीनु यहुदी मुख्या काजे भुरसु नी आयु ने चे तीना माणसेन आस्या-बास्या काजे बुलाया। ने तीनुक पुछ्या, “जु तुंद्रु पुर्यु छे काय? जु पयदा हयु तीन आंधळु हतलु काय? ‘आंधळु हतलु’ कहुं ती हय जु कसु देखणे बाजी गुयु?” चे आस्या-बास्या जपाप आप्या, “हामु जाणजे की हामरु पुर्यु छे, ने जु पयदा हयु तीन आंधळु हतलु। बाकुन हय जु कसु देखणे बाजी गुयु जी वात हामुक मालम नी हय। हामुक ज बी नी मालम हय की हेरा डुळा कुण वारु कर्यो ईनात काजे पुछ लेवु। जु नानलु नी हय आपसान बारामां खुद बताड़ देसे।” यहुदी डाहला भेळा हय्न जी वात नक्खी कर लेदला की कुय बी ईसु काजे मसी करीन मान लेसे ती आपणा भक्तीन घर मां सी बाहर नीकाळीन बाहरु कर देसुन। ने तीनाक वारु हय गुयला आंदळान आस्या-बास्या मन मां यहुदी मुख्यान धाक भराय गुयली। तेरेमां तेरा आस्या-बास्या कहला की, “जु मटु हय गुयु ईनात काजे पुछ लेवु।”
चे यहुदी मुख्यान तीना वारु हय गुयला आंदळाक अळी बुलाया ने तीनाक कह्या, “भगवानेन आण घालीन कहं की मे तीना भगवानेन बड़ाय करीस। हामु जाणजे की चु माणुस पापी छे।”
चु जपाप आप्यु, “चु माणुस पापी हय की नी हय जी वात मेसेक मालम नी हय बाकुन मे अतरोत जाणो की मे आंधळु हतलु ने हय मे देखो।”
ने चे तीनाक अळी पुछ्या चु तारे काय कर्यु? “चु तारा डुळाक कसु वारु कर्यु?” चु कह्यु, “मे तुहुं काजे पेहलुत कय देदु तेबी तुहुंक भुरसु नी आवतु, ती हय अळी काहा सामळने हींडी र्या? तुहुं बी तेरा चेला बणने हींड र्या काय?” चे तीनाक बेसका लड़ीन कह्या, “तुत छे तेरु चेलु बाकुन हामु ते मुसान चेला छे। हामु जाणजे की भगवान मुसा साते वात करलु बाकुन तीना ईसुन बारामां हामु जाणजे लग नी, की चु कां सी आवलु छे।”
चु वारु हय गुयलु माणुस तीनाक कह्यु, “जो! तुहुंक पल्ले नी पड़तो काय चु आंदळान डुळाक वारु कर देदु तेबी तुहुंक मालम नी हय की चु कां सी आवलु छे। आपणु जाणजे की भगवान पापी माणसेन दुवा नी सामळे बाकुन तीना माणसेन दुवा सामळे जु भगवानेन भक्ती करतु हय ने भगवानेन मरजी2 पर जीवन जीवे। कळी घड़ाय तीसी आज लग ज सामळने मां नी आयो की काहनु बी आंधळु पयदा वारी माणसेन डुळा उघाड़ीन वारु कर्यु हय। कदी भगवान ईना माणसेक नी मकेलतु ती चु कसु मारा आंदळा डुळा उघाड़तु।”
चे यहुदी मुख्या वारु हय गुयला आंदळाक कह्या तुते पाप मां पयदा हयु ने पापेत मां पुसायु, “ने बेसकु! तु हामुक सीकाड़ने बाजी र्यु!” ने असु कहीन चे तीनाक तींद्रा घर मां सी खयड़े नीकाळ दीन बाहर कर देदा।
जीवेन आंदळान बारामां ईसु, फरीसी माणसेक देखाड़े
अळतेन ईसु सामळ्यु की फरीसी माणसे यहुदी मुख्या तीनाक चां बाहर कर देदला छे, ने अळतेन ईसु तीनाक भेळु हयु ती तीनाक कह्यु, “तु माणसेन पुर्या पर भुरसु करे काय?” चु वारु हय गुयलु आंधळु माणुस कह्यु, “ए मालीक! मेसेक देखाड़ दे की माणसेन पुर्यु कुण छे, ने मे तेरे पर भुरसु करीस।”
ईसु तीना माणसेक कह्यु तु तीनाक देखलु छे, “ने चु तार साते वात करने बाजी र्यु ने हयुत माणसेन पुर्यु छे।”
चु वारु हय गुयलु आंधळु ईसु काजे कह्यु ए मालीक! मे भुरसु कर्यु ने चु ईसुन पाये पड़ीन आंध्यु।
ने ईसु कह्यु, “मे ईनी कळी मां नीयाव करने वाळु छे की जे आंदळा छे चे देखणे बाजी जाय बाकुन जे देखणे बाजी र्या चे आंदळा हय जाय।”
फरीसी माणसे मुख्या मायन थुड़ाक चां ईसु साते हतला ने चे ज सामळीन ईसु काजे कह्या, “छाचलीन हामु आंदळा नी हय। हामु बी आंदळा छे करीन तु कय र्यु काय?”
ईसु तीनु काजे कह्यु, “कदी तुहुं छाचलीन आंदळा रवता ती पापी नी गीणायता बाकुन हय ते तुहुं कय र्या की हामु देखजे ने तुहुं पापीत गीणाय र्या।”
Source notes (2)
- Footnote मिट्टी
- Footnote ईच्छा
भगवानेन छाचला बुल. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.