भटियाली नोआ नियम
इब्रानिया 8
यीशु साड़ा महायाजक
हुण जड़ियां गल्लां असां करा दे न, उना चे सारयां ला बड्डी गल्ल ऐ है, की साड़े तांई इक ऐसा महायाजक है, जड़ा स्वर्गे च उस महिमामय परमेश्वरे दे सिहांसने दे सजे पासे जाई बैठा है। कने साड़ा महायाजक स्वर्गे च सच्चे मिलाप दे तम्बूऐ च बड़िया पबित्र जगा च सेबा करदा है जड़ी स्वर्गे च है, जिसयो परमेश्वरे बणाया ना की कुनी माणुऐ।
क्योंकि हर इक महायाजक जिसयो इस तांई चुणदे न की सै लोकां दी माफी तांई भेंट कने बलिदान चढ़ाऐ। इस तांई साड़े महायाजक यीशु तांई भी ऐ जरूरी था की उस बाल भी कुछ चढ़ाने तांई हो। कने अगर मसीह धरतिया पर होंदा तां कदी भी याजक नी होंदा, क्योंकि मूसा दी व्यवस्था दे अनुसार भेंट चढ़ाने तांई पेहले ला ही याजक हेन। जड़े ऐ याजक करदे न, सै सिर्फ उदी इक नकल कने परछाई है जड़ा स्वर्गे च है। क्योंकि जालू मूसा मिलाप दा तम्बू बणांणा चलया था, तालू परमेश्वरे उसयो ऐ चेतावनी दिती की, “तू हर चीज तियां ही बणायां जदिया उदाहरण तिजो पहाड़े पर दसया था।”
पर जड़ा याजकां दी सेबा दा कम्म साड़े महायाजक यीशुऐ जो मिलया, सै याजकां ला बदीकरी है। क्योंकि सै जिस बाचा दा बिचोलिया है, सै पराणिया बाचा ला खरी है कने खरियां चीजां दे बायदे पर अधारित है।
क्योंकि अगर पेहलिया बाचा च कमियां नी होंदिया तां दूजिया बाचा दी जरूरत ही नी होंदी।
पर परमेश्वरे लोकां पर दोष लाईकरी बोलया, “सै दिन ओआ दे न की, मैं इस्राएल दे लोकां सोगी कने यहूदा दे लोकां सोगी नोई बाचा करणी है। ऐ बाचा उस बाचा सांई नी होणी है, जड़ी मैं उना दे पूर्वजां सोगी कितियो थी, जालू मैं उना जो मिस्र देशे ला कडी लेई आया था, क्योंकि सै मेरी बाचा पर टिकी नी रे, कने मैं उना दी चिंता करणा बंद नी करी दिता, प्रभु ऐई बोलदा है। फिरी प्रभु बोलदा है की, जड़ी नौइ बाचा मैं ओणे बाले दिना च इस्राएल दे लोकां सोगी करणी, सै ऐ है की मैं उना जो मेरी व्यवस्था दे बारे च सोचणा देणा, कने उना उसा जो अपणे मना च रखणा, कने मैं उना दा परमेश्वर बणना, कने उना मेरी अराधना करणी। फिरी कुनी भी इस्राएल दे लोकां अपणे देशे बालयां जो, कने अपणे रिशतेदारां जो ऐ शिक्षा देणे दी जरूरत नी पोंणी, की तुसां प्रभु जो मन्ना, क्योंकि छोटे ला लेईकरी बड्डे लोकां दीकर सारयां मन्नी लेणा की मैं उना दा परमेश्वर है। क्योंकि मैं उना दे पाप माफ करी देणे, कने मैं उना दे पापां जो दुबारा फिरी याद नी करणा।”
परमेश्वरे इसयो नोई बाचा बोलया, इस तांई उनी पेहले बालिया बाचा जो पूराणा करी दिता। जड़ा कुछ भी पूराणा है कने घिस्या-पिटया है, सै खत्म होई जाणा।
भटियाली नोआ नियम. Copyright © 2022 The Love Fellowship. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.