Yoube 34

1-2Dilia da asigi dawa:su bagadedafa dunuse!

Wali na sia:nebe amo nabima! 31

Dilia da ha:i manu naba:lalu, amo ha:i manu da noga:iyale dawa:digisa.

Be bagade dawa:su sia: amo dilia nabasea, hamedafa dawa:digisa.

4Be amo sia: da nini ninisu sia:sa:ili, ilegemu da defea.

5Yoube hi da wadela:le hame hamoi amola ea hou da moloidafa sia:sa.

Amola Gode da e da giadofale hame hamoi, amane hame sia:i,

Yoube da amane egane sia:sa.

6Yoube da amane adole ba:sa, ‘Na da giadofai, ogogolewane abuli sia:ma:bela:?

Na da bogoma:ne fofa:gi dagoi, be na da wadela:le hame hamoi,’

7Dilia dunu Yoube agoai ba:bela:?

E da Gode da Mimogo Baligili Bagadedafa Dunu hame dawa:sa.

8E da wadela:i hamosu dunuma gilisimu hanai, amola ili gilisili ahoana.

9E da Gode Ea hanai amoga fa:no bobogesu hou da dunu hame fidisa, amane sia:sa.

10Dilia bagade dawa:su dunu!

Gode Bagadedafa da giadofale hamoma:bela:? Hame mabu! 112

E da dunu ilia hamobe defele, ilima bidi iaha.

Amola ilia hou hamoi defele, ilima hamosa.

12Gode Bagadedafa da wadela:le hamomu hamedafa dawa:.

E da dunu huluane ilima moloidafa hou fawane hamosa.

13Gode da Ea gasa enoma labala?

Dunu eno da Ema E da osobo bagade ouligima:ne ilegebela:? Hame mabu!

14Gode da esalusu mifo amo bu samogei ganiaba,

15esalebe dunu huluanedafa da bogole, bu gulu dou hamona:noba.

16Dilia da bagade dawa:su galea, na sia:be nabima!

17Dilia da Gode Moloidafa Ema diwaneya udidisala:?

E da moloidafa fofada:su higasa, dilia da dawa:sala:?

18Hina bagade dunu amola ouligisu dunu da wadela:le hamosea,

Gode da ilima se dabe ima:ne, fofada:sa.

19E da ouligisu dunumagale hame fofada:sa.

Amola bagade gagui dunu da hame gagui dunuma fofada:sea,

E da bagade gagui dunumagale hame fofada:sa.

Bai E da dunu huluane defele hahamoi dagoi.

20Amabela:? Ninia hedolowane gasia bogoma:bela:?

Gode da nini fabeba:le, ninia da bogosa.

E da asabolewane, mimogo gasa bagade dunu medole legesa.

21E da ninia osa:le gagabe huluane sosodolala.

22Gasidunasidafa da Gode mae ba:ma:ne, wadela:i dunu uligimu hamedei.

23Ninia huluane da Ema fofada:musa: doaga:mu.

Be E da amo eso hame ilegesa.

24E da ouligisu dunu fadegale, eno dunu ilia sogebi lama:ne ilegesea,

E da abodele hame ba:sa.

25Bai E da ilia hamobe huluane dawa:.

E da ili fadegale, amola gasia ili banenesisa.

26E da dunu huluane ba:ma:ne, wadela:le hamosu dunugili se dabe iaha.

27Bai ilia da Ema fa:no bobogebe hou yolesili,

Ea hamoma:ne sia:i huluane higa:i.

28Ilia da hame gagui dunu banenesiba:le,

hame gagui dunu da Godema ili fidima:ne wele sia:i.

Amola Gode da ilia wele sia:i nabi dagoi.

29Gode da fidisu hame hamoma:ne ilegei ganiaba,

dunu da Ema gagabuli sia:mu da hamedela:loba.

E da Ea odagi ninia mae ba:ma:ne wamoaligisu hamoi ganiaba,

nini da hahanini wadela:lesi dagoi ba:la:loba.

30Gode Ea hou hame lalegagui banenesisu dunu fawane da fifi asi gala

amo ouligimu ga:la:loba,

amola amo fifi asi gala dunu da amo hou afadenene hamedei ba:la:loba.

31Yoube! Di da dia wadela:i hou amo Godema sisane fofada:bela:?

Di da Ema, dia da bu hamedafa wadela:le hou hamomu, ilegele sia:bela:?

32Di da Godema E da dia giadofasu dima olelema:ne adole ba:bela:?

Dia wadela:le hamonanebe amo yolesima:ne, Ema sia:bela:?

33Di da Gode Ea dima hamoma:ne sia:i amo higabeba:le,

di abuliba:le E da dia hanai defele hamoma:beyale dawa:sala:?

Na da hame sia:mu. Di fawane sia:ma!

Wali, dia asigi dawa:su ninima adoma!

34Bagade dawa:su dunu, ilia da na sia:be defele amane dawa:mu,

35‘Yoube e da hame dawa:beba:le, udigili hamedei sia: fawane sia:sa.’

36Yoube ea sia:i liligi huluane noga:le abodele dawa:ma.

Amasea, e da wadela:i hou hamosu dunu defele sia:sa, dilia da ba:mu.

37E da ea wadela:i hamobe amoma odoga:su hou gilisisa.

E da ninia midadi, Godema habosesesa.