वडार
मार्क 6
येशुनदी नासरेथला तिरस्कार
मग येशुड कफर्णहुम नुस येल्ली नासरथकी वान नगरकी वच्या इंगा वान शिष्यल वान संगा वच्चीर. शब्बाद दिनमू वाड यहुदी सभास्थानला शिका नेरपु. शेंगेम मंदी वानदी शिक्षण इनीर आप्पुड वार थक्क आय्यीर. वार आनीर, “इ मनशीक इदी शिकवण यानुस वच्या? वानकी द्यावार याद ज्ञान इच्चीनाड इंगा इन शेयता इ येन्नी चमत्कारलु आताय? येवाड सुतार, मरिया दान कोडकु इंगा याकोब, योसे, यहुदा इंगा शिमोन इर तम्मूड वाड इडे उंडाड गरा?” इंगा इर मना संगा उंडार वार इन शेल्यान्लू लेर येम? वांदी स्वीकार शेशे बद्दल वारकी प्रश्न फड्या. इंगा येशुड वारनी आन्या, “संदेष्ट्यालदी सन्मान काद इल्ला लेद. फक्त वान नगरला, वान नातेवाईकलाला इंगा वान परिवारला वानदी सन्मान काद.” काहीक बिमार मंदी मिंदा शेई फेट्टी वाड वारनी बागा शेश्या, दिन इडशी इंगोगोट यादुच चमत्कार वानकी आंदू शेय्यादाले. वार अविश्वास कस्रोम वारकी आश्चर्य वाटाश्या. मग येशुड उपदेश इच्केन उळाउळाक तीरग्या.
बारा प्रेषित लान आंपडीचकाम
मग येशुड बारा शिष्यलनी वान तिकुड फिलच्या इंगा वारनी जोडीजोडीता आंप्या, वाड वारकी अशुद्ध आत्माल मींदा अधिकार इच्या. इंगा वारकी आज्ञा इच्या की, “कट्या इडशी प्रवास कस्रोम इंगोगोट येमीच एका फोकुंडा. रोट्याल, झोळी इंगा खिशाला दुडलु तीस्कोना कुंडा. गान शप्पुल फेटकेन नडवांडा; रोंड आंगुल तिस्कूनाकुंडा.” इंगा वाड वारनी आन्या, “यादुपण इल्लुक मीर फोतार आंदू मीर आदी शहर इडशी नंताक निलवांडा. इंगा या जागाला मिद स्वागत काक फोई लेकाते मिद इनाक फोयार आंदनुस येलेताप्पुड, वारकी साक्ष कावाला आंका मी काळाद मन्नु आंदे झाड्सकाडना.” मग शिष्यल आंदनुस येल्लीर इंगा मंदी पश्चाताप शैयाला दिनकस्रोम वार घोषणा शेशीर. वार शेंगेम दैयाल तीशीर इंगा शेंगेम बिमार मंदीन नुन्या तीक्की वारनी बागा शेशीर.
योहान बाप्तिस्मा इच्चेतोनदी हत्या
हेरोद राजा येशुन बद्दल इन्या येनटीक की येशुनदी फेर आन्नी तीकुड गाजास्न्या. काही मंदी आंदूर, “बाप्तिस्मा शेशेतोड योहान सचीनेन्का लेशीनाड, दिनकस्रोम वान देगार चमत्कार शेशेद सामर्थ्य उंडाद.” बाकी मंदी आंटार, “येशुड एलीया उंडाड.” तर काही मंदी आंदूर, “इड संदेष्टा शेंगेम पहिला संदेष्ट्याल पैकी वगाड उंडाड.” इंगा हेरोद यप्पुड इन्या आप्पुड वाड आन्या, “या योहानदी नीन तलकाया कोशिन्टीन वाडे लेशीन्डाड.” हेरोद स्वता योहाननी फटी तुरुंगला येशेद आज्ञा इच्चीन्या येनटीक की वान तम्मूड फिलीप्प इन वडती हेरोदियाद दिनसंगा हेरोद फेंडली शेस्कुंड्या. इंगा योहान हेरोदकी शपदु की, “नु नी तम्मुन वडती फेटकुणाला इदी शास्त्र नुसार लेद.” दिनकस्रोम हेरोदियाद योहान बद्दल मनला कोफाम फेटन्या. आदी वान मत्तेसकाडेद मोका सूदू. गान आदी वान मती शेकायाले, येनटीक की योहान नीतिमान इंगा पवित्र मनशी उंडाड इदी जानाशी हेरोद वानकी आद्रु इंगा वानदी रक्षा शेयदु. हेरोद योहानी माटलु इनदु आप्पुड, शेंगेम गोंधळाशी फोदू, तरी वाड वानी माटलु खुशीता इनदु. मग वगा नाड इल्ला वेळ वच्या की हेरोदियाद येमतरी शेशी शकाश्या. हेरोद वान वाढदिवस नाबद वान प्रधान, सेनापतीलाक इंगा गालील प्रांतलोंन मुख्य मंदीक तिनकाम इच्या. हेरोदियादान कुतुर लोनीक फोई नाचाशी हेरोद इंगा वच्चीने सुट्टालनी खुश शेश्या. आप्पुड हेरोद राजा कुतुरनी आन्या, “निक येम बेक आदी आडगु नीन निक इस्तान.” वाड वटू येस्केन दान आन्या, “ना आर्दाम राज्य नंताक येम पन नु आडग्याव आदी नीन निक इस्तान.” आदी बेटीक फोया इंगा दान आम्मान आन्या, “नीन येम आडगुदून?” आम्मा आन्या, “बाप्तिस्मा शेशे योहानदी तलकाया.” मग आदी आन्बीडा लगेच लोनीक राजा तीकुड फोया इंगा आन्या, “नाक नु इप्पुडे बाप्तिस्मा शेशे योहानदी तलकाया वगा तेल्याला येतकेन वच्ची इ इल्ला नाद इच्छा उंडाद.” राजाक शेंगेम वाईट वाटाश्या, गान वान वटु कस्रोम इंगा तिनदेंक वच्चीने सुट्टाल कस्रोम वानकी दान लेद आना दाक फो. आप्पुड राजा लगेच जल्लादनी आंपी योहानदी तलकाया येकेन दा इल्ला आज्ञा इच्या. मग वाड फोया इंगा जेललोंक फोई योहानदी तलकाया कोश्या. आदी तलकाया तल्याला फेट्टी कुतुरकी येकेन वच्ची इच्या. इदी इनी. योहान शिष्यल वच्चीर इंगा वार वानदी फिनग्या येकेन फोईर इंगा कब्रला फेट्टीर.
बारा प्रेषितलाद वापस वचकाम
दिनबाद प्रेषितलु येशुन देगार जमा आय्यीर इंगा वार येम शेशीर इंगा नेरपीर आदी आंता वानकी शप्पीर. इंगा वाड वारनी आन्या, “मीर जंगल्लोंग शांत जागालोंक नंडा इंगा रवा आराम शेयांडा.” येनटीक की आन्दु संगेम मंदी फोयेद वच्चेद शेयदूर इंगा वारकी तिनदेंक पण वेळ शिक्का कुंदु. आप्पुड वार आंदार जहाजला कुसनी शांत जागालोंक फोईर. गान शेंगेम मंदी वारनी फोयेताप्पुड सुशीर इंगा वार येवार उंडार इदी वारकी तेलच्या आप्पुड उळ्योन्टोर मंदी नडस्का फारका येल्लीर इंगा वार दावाकाना मुंची वार आंदुक पोहोचाशीर.
पाच हजार मंदीक तिनामतेद
येशुड कंटाम मिंदा दिगीनेन्का, वाड शेंगेम मंदिद समुदाय सुश्या; वार मेपेतोड लेकुन्ने मेंढरयाल लेका उंडीर, दिनकस्रोम वानकी वारदी दया वच्या; दिनकस्रोम वाड वारकी शेंगेम माटला बद्दल नेरपेदेंक आंट्या. शेंगेम फददु मुनगी फोईनेन्का वान शिष्यल वान तीकुड वच्ची आनीर, “इदी सुनसान जागा उंडाद इंगा इप्पुड शेंगेम मुनगीनाद. मंदीन फोनी आंटे वार देगार शेलालोंक इंगा उळ्ळाक फोई वार कस्रोम तीनदेंग येमाना कोंकेन वच्यार.” गान वाड वारकी उत्तर इच्या, “मिरे वारकी तिनदेंक येमाना इयांडा.” वार वान आनीर, “मिम फोई वारकी तीनदेंक दोनशे यंडी नाण्याल1 रोट्याल कोंका दावाला येम?” वाड वारनी आन्या, “फोंडा इंगा सुडांडा की मी देगार यन्नी रोट्याल उंडाय?” सुशीनेन्का वार आनीर, “मादेगार आय्यीद रोट्याल इंगा रोंड मिल उंडाय.”
येशुड आंता मंदीक आज्ञा इच्या की गड्डी मिंदा कुसनांडा. आप्पुड वार शंभर-शंभर इल्ला पंगतता कुसनीर. येशुड आय्यीद रोट्याल इंगा रोंड मिल तीस्केन फईक स्वर्ग तीकुड सुशी, आशीर्वाद इच्या इंगा रोट्याल तेंपी फंचेदेंक वान शिष्यल देगार इच्या इंगा मिलपण फंची इच्या. इंगा वार आंदार तिनी तृप्त आय्यीर. इंगा वार मिग्लीने तुकडाली बारा फुटकाल निंचकुनीर इंगा मिलाय पण तुकडाल एका फोईर. रोट्या तीनेतोर पाच हजार मंदी उंडीर. यंकसार नीन मंदीन इल्लुक आंपतान इंगा मीर जहाजला कुसनी आतुक बैतसदा इंदूक फोडा, इल्ला शप्पी येशुड लगेच शिष्यलनी वान मुन्दारकी फोयदेंक शेप्या. मंदीन आंपी वाड प्रार्थना शेशेदेंक कोंडा मिंदीक फोया. फददु मुनग्या आप्पुड जहाज सरोवर नडमा उंड्या इंगा येशुड वक्काडे भुमी मिंदा उंड्या. इंगा वारकी वल्ही मतेदेंक कठीण फोतुनाद इल्ला वानकी कमशा, येनटीक की घाली वार उलटा उंड्या. इंगा फदिना मुड ते सहा वागीन नडमा येशु सरोवर मिन्देल नडस्का वार तीकुड वच्या, वार देगार नुस वानकी मुन्दारकी फोयेद उंड्या. गान वान सरोवर नेळामिंदा नडशेताप्पुड सुशी, वारकी वाड दैयाम उंडाड इल्ला वाटाश्या इंगा वार कीरलीर. येनटीक की वार आंदार वान सुशीर इंगा वार आद्री फोईर. वाड लगेच वारनी आन्या, “दम फटना, आद्रा कुंडा, नीन उंडान.” मग वाड वार तीकुड जहाजलोंक फो आप्पुड घाली शांत आय्या. आप्पुड वार शेंगेम आश्चर्य चकीत आय्यीर. येनटीक की वारकी रोट्याद माटा तेलवा लेकुंड्या इंगा वारी मनलु कठोर आईन्या.
येशुड गनेसरेतला रोग्यालनी बागा शेस्ताड
वार सरोवर दाटीनेन्का गनेसरेतकी वच्चीर इंगा जहाज कट्टेशीर. वार जहाजलेल दिगे ताप्पुडे मंदी येशुन ओळखाशीर. इंगा वार आसपास आन्नी भागला आन्नी तीकुड फारका तीरगीर इंगा येंदू पण वाड उंडाड इल्ला मंदी गुम्मा मिन्दा फडू, आंदु-आंदु मंदी बिमार मंदीन मंचाम मिंदा येकाफोदूर. वाड उळ्योंक किंवा शेल्लोंग येंदूक पण फोइना, आंदूक मंदी बिमार मंदीन भर संताला येकोची फेटदूर इंगा वान बट्टाल गोंड्यालनी तरी फट्टानिंडा इल्ला विनंती शेयदूर इंगा यंता मंदी वान फट्टीर आंता मंदी बागा आय्यीर.
Source notes (1)
- Footnote दोनशे यंडी नाण्याल दोनशे नाळाद मजदुरी
वडार. Copyright © 2024 Bridge Connectivity Solutions Pvt. Ltd. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.