वडार
मार्क 16
येशुनदी पुनरुत्थान
शब्बाथदी दिनमु संपाश्या आप्पुड मग्दलीयाद मरिया, याकोब आम्मा मरीयाद इंगा सलोमीद इर वानकी तीकदेंक सुगंधित नुन्या कोंका वच्चीर. इंगा हप्ता पहिला दिन्मु, एकदम नस्कुला फदु फुट्टेताप्पुड आय कब्र तीकुड फोय्या. वार वगा मेगारनी आंदूर की, कब्र मुती मिंदनुस मना कस्रोम राय यवार बाजूक तीश्यार? मग वार फइक सुशीर इंगा वारकी राय दोब्बीनेद कमशा. आदी शेंगेम फेद्दाद उंड्या. वार कब्रला नोनीक फोईर आप्पुड वारकी नवल वाटाश्या. वारकी वगा जवान मनशी मंची शेय तीकनुस कुस्नीनोड कमशा. वाड तेल्लांग झगा फेटकुनीन्या. वाड वारनी आन्या, आद्रा कुंडा, मीर नासरेथकर येशुन येवान क्रूसमिंदा येशीनीर वान फुडकुतुनार. गान वाड लेशीनाड. इंदू लेड. वार वान फेट्टीनीर आदी जागा सुडांडा. फोंडा इंगा वान शिष्यलकी इंगा पेत्रक पण शेपना की, वाड मिकाना मुंची गालील प्रांतकी फोयतुनाड, वाड मिक शेपीने लेका आन्दु वाड मिक कमशी. मग वार बैटीक फोईर, इंगा आद्रकेन कब्रनुस दुराम फारीर. वारकी आश्चर्य आय्या. वार येवारकीच येमीच शेप्पालेद येनटीक की वार आद्री फोइनीर.
मरिया मग्दालिनीक येशुनदी दर्शन
हप्ता पहिला दिन्मु नाबद येशुड लेशी नेंका वाड पहिला मग्दालीया नगरलोन मरियादान, यादान नुस वाड योड दैयाल तीशिन्या, दानकी पहला दर्शन इच्या. आदी फोय्या इंगा येडस्केन शोक शेशेतोर वान शिष्यलकी इदी बातमी शेप्या. वार इनीर की वाड जिवंत उंडाड इंगा आदी वान सुशीनाद. आप्पुड वार दान माटा मिंदा विश्वास फेट्टालेद.
इद्दार शिष्यलकी येशुनदी दर्शन
दिन नंतर वार पैकी इद्दार शिष्यल यरुशलेम दावाता उर तीकुड फोय्येताप्पुड येशुड वारकी इंगोगो रुपता प्रकट आय्या. वार वापस वच्चीर इंगा इंगोगोरकी शेप्पीर गान वार वारमिंदा पण विश्वास फेट्टालेद.
अकरा शिष्यलकी येशुनदी दर्शन
मग अकरा शिष्यल तिनेताप्पुड येशुड वारकी कमशा. वाड शिष्यल अविश्वास कस्रोम इंगा वार अंतकरण कठोरपणा कस्रोम वारनी बेद्रीच्या येनटीक की येवार वान लेशिनेन्का शुशीनीर वार मिंदा वार विश्वास फेट्टालेद.
वाड वारनी आन्या, “आंता दुन्यामलोंक फोंडा इंगा आंता पृथ्वीक सुवार्ताद घोषणा शेयांडा. येवाड पण विश्वास फेट्टी इंगा बाप्तिस्मा तीस्कुनी वानदी तारण आय्यी, पण येवार विश्वास फेट्टाड वानकी शिक्षा आय्यी. पण येवार विश्वास फेट्यार वार संगा इ चिन्हल आय्यी, वार ना फेरता दैयाल तीश्यार, वार कोत्ता कोत्ताय भाषाल माटलाड्यार. वार स्वता शेयता फामुल येत्यार इंगा वार यादपन जेम फोयेद पदार्थ तागते तरी वार सय्याक फोयार. वार बिमार मंदी मिंदा शेय फेट्ट्यार इंगा बिमारोर शिंगार आय्यार.”
प्रभू येशुनदी स्वर्गला फोकाम
मग प्रभू येशुड वारसंगा माटलाडी नेंका वान स्वर्गला तीस्कुनीर इंगा द्यावार मंची शेय तीकुड फोई कुसन्या. शिष्याल बैटीक फोईर इंगा वार प्रत्येक जागाला सुवार्ताद घोषणा शेशीर. प्रभुड वार संगा फनी शेश्या इंगा वाड वचन संगा उंडीने चिन्हलता वारदी खात्री शेसका उंड्या. आमेन.
वडार. Copyright © 2024 Bridge Connectivity Solutions Pvt. Ltd. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.