Zabuli 21

Malumbo kwa kusumya

(Kwa yalingwaluchiza kwimba. Zabuli ya Daudi.)

1Gwa Mkulu Nguluwi, mndewa kangutowa luchenze kwa mong'ho wa hegwe,

kangusangalala ng'hatu kwa kusumya koumpele.

2Nakumha kugana kwa nhumbula ya heye,

haulemile kulanda kwa heye.

3Nakumuyila, nakumha utambichizo winji,

nakumvaliza kofia ya undewa ya zahabu inojile kumutwi kwa heye.

4Nakakulanda ukomu nagwe nakumha,

nakumha ukomu wa kikala mazuwa gose.

5Kwa kusumya kwa hegwe, mndewa kana ukulu ng'hatu,

hegwe nakumha ukulu na kuhulichizwa.

6Nakumdita heye yawe yatambichizwe mazuwa gose,

nakumsangalaza heye, kwa kukuhejelela hegwe.

7Mndewa kangitumbila kwa Mkulu Nguluwi,

kwa igano lya kwimilila lya Nguluwi Yawele Kuchanya, hotigaswa.

8Gwa mndewa, moko wa hegwe wowebata wang'honyo wa hegwe weng'ha,

moko wa hegwe wa kudilo wowebata walingukuzudila.

9Houlawila kowadumya kota itanuli lya chiluli.

Mkulu Nguluwi kowadumya kwa ng'halazi ya heye,

chiluli chowalakaza ng'hatu.

10Gwa mndewa, kowadumya walelwa wa hewo muisi,

wana wa hewo hawopona hali wanhu.

11Hanga howochijesa kukuditila gehile,

wone wowika goya mbuli za wihe,

hawoweza kusumya hebu.

12Kwa vila hegwe kowadita wabilime,

louwagololela kumeho misale ja hegwe.

13Utogoligwe gwa Mkulu Nguluwi, kwa chiwalo cha mong'ho wa hegwe.

Tokwimba na kutogola ludali lwa hegwe.