ದೇವ್ನಿ ಖ್ಹಾಚಿ ವಚನ್
ಯೋಹಾನ 16
ಆ ಖ್ಹಾರಿ ವಾತೆ ಮಾರಿ ಬಾರೇಮ ಮೇ ತುಮುನ ಬೋಲ್ಯೊತೆ ಶನಖ್ಹಾಜೆ ಕತೊ ತುಮಾರಿ ವಿಶ್ವಾಸ್ ನಾ ಟುಟಿಪಡ್ನುಕರಿ. ಇವ್ಣೆ ತುಮೂನ ಸಬಾಮಂದಿರ್‌ಥು ಭಾರ್‌ ಕಾಡಿನಾಕ್‌ಶೆ; ಯೋ ಕೊಂತೆ ತುಮೂನ ಮಾರಿನಾಖವಾಳೊ ಇನೆ ದೇವ್ನ ಬಲಿದಿದೊಕರಿ ಸೋಚಾನ ಹಗಾಮ್ ಆವ್‌ಶೆ. ಅದ್ಮಿಖ್ಹಾರು ಬಾನ ರ‍್ಹವೊ, ಮನ ರ‍್ಹವೊ ಮಾಲುಮ್ ಕರಿರಾಖ್ಯುಕೊಯ್ನಿತೆ ಇನಖ್ಹಾಜೆ, ತುಮೂನ ಅಮ್ ಖ್ಹಾರು ಕರ್ಶೆ. ಕತೋಬಿ ಮೇ ತುಮೂನ ಆ ಖ್ಹಾರು ಅನಖ್ಹಾಜೆ ಬೋಲಿರಾಖ್ಯೊಸ್, ಶನಕತೊ ಆ ಖ್ಹಾರು ಚ಼ಲಾ಼ನಿ ವಖ್ಹತ್‌ಮ, ಮೇ ಪಹಿಲೆ ಬೋಲ್ಯೋತೆ ವಾತೆ ತುಮೆ ಯಾದ್ ಕರಿಲಿಶು.
ಪವಿತ್ರಾತ್ಮನು ಕಾಮ್
“ಮೇ ತುಮಾರ ಜೋ಼ಡೆ ಥೋತೆ ಇನಖ್ಹಾಜೆ ಅಗಾಡಿಸ್ ಆ ಖ್ಹಾರು ಕೋ ಬೋಲ್ಯೋನಿ. ಕತೋಬಿ ಹಮ್ಕೆ, ಮೇ ಮನ ಮೋಕ್‌ಲ್ಯೊತೆ ಇನಾಕನ ವಳ್ಯೊಜ಼ವುಸ್‌, ತೋಬಿ ತೂ ಕಿಜ್ಗಾ಼ ವಳ್ಯೊಜಾ಼ಸ್‌? ಕರಿ ತುಮಾರಾಮ ಏಕ್‌ನೇಬಿ ಮನ ಪುಛಾ಼ಯಕೊಯ್ನಿ. ಹಮ್ಕೆ ಮೇ ತುಮೂನ ಆ ಖ್ಹಾರಿ ವಾತೆ ಬೋಲ್ಯೋತೆ ಇನಖ್ಹಾಜೆ ತುಮಾರ ದಿಲ್ಮ ದುಖ್ ಭರೈರ‍್ಹೂಸ್. ಕತೋಬಿ ಮೇ ತುಮೂನ ಖ್ಹಾಚ ಬೋಲುಕರುಸ್, ಮೇ ಜಾ಼ವಾನು ತುಮೂನ ಅಛ್ಛು಼ ಹುಯಿರ‍್ಹುಸ್‍, ಶನಕತೊ ಮೇ ನಾ ಗಯೋತೊ, ಯೋ ಮದತ್‌ ಕರವಾಳೊ ತುಮಾರಕನ ಕೋ ಆವ್‌ಶೇನಿ.ಕತೋಬಿ ಮೇ ಗಯೋತೊ, ಇನ ತುಮಾರಕನ ಬೋಲಿ ಮೋಕ್ಲೀಶ್1. ಯೋ ಆವ್‌ಶೇತೆ ತದೆ ಪಾಪ್, ನೀತಿ ಅಜು಼ ನ್ಯಾವ್ ತೀರ್ಪ್‌ನ ಬಾರೇಮ ಜಗತ್ನ ಮಾಲುಮ್ ಕರಾವ್‌ಶೆ. ಪಾಪ್ನಿ ಬಾರೇಮಾಬಿ ಇವ್ಣೆ ಮನ ವಿಶ್ವಾಸ್ ಕರ‍್ಯುಕೊಯ್ನಿ. ಮೇ ಬಾಕನ ಜೈ಼ನ್‌, ನೀತಿನಿ ಬಾರೇಮ ಅದ್ಮಿಖ್ಹಾರನ ಖ್ಹಾಮ್ಣೆ ಸಾಕ್ಷಿದಿಶ್, ಬಿಜು಼ ಅನಪಾರ್ ಮನ ಘಣಿ ವಖ್ಹತ್ ದೇಕ್‌ಶು ಕೊಯ್ನಿ. ನ್ಯಾವ್ನಿ ಬಾರೇಮ ಆ ಜಗತ್ನ ಅದಿಪತಿನ ನ್ಯಾವ್ನಿ ತೀರ್ಪ್ ಹುಯಿಗಯು.
ಮೇ ತುಮೂನ ಬೋಲ್ನುತೆ ವಾತೆ ಬಿಜೂ಼ಬಿ ಘಣಿ ಛಾ಼, ಕತೋಬಿ ಹಮ್ಕೆ ಇನ ಝೇಲಾನ ತುಮೂನ ಕೋ ಉಶೇನಿ. ಕತೋಬಿ ಖ್ಹಾಚೊ಼ ಆತ್ಮ ಆವ್‌ಶೇತೆ ತದೆ, ಯೋ ತುಮೂನ ಖ್ಹಾರಿಸ್ ಬಾರೇಮ ಖ್ಹಾಚಾಮ ಚ಼ಲೈಲಿಜಾಷೆ. ಯೋ ಬೋಲ್‍ಶೇತೆ ಇನಿ ವಾತೆ ಕಾಹೆ, ಯೋ ಶಾತ್‌ ಖ್ಹಮ್‌ಜಾ಼ಸ್ಕಿ ಯೋಸ್‌ ತುಮೂನ ಬೋಲ್‌ಶೆ; ಅಜು಼ ಖ್ಹಾಮ್ಣೆ ಚಾ಼ಲ್‌ಶೇತೆ ಇನಿ ಬಾರೇಮ ತುಮೂನ ಬೋಲ್‌ಶೆ. ಯೋ ಮೇ ಬೋಲುಸ್ತೆ ವಾತೆ ಲೀನ್‌, ತುಮೂನ ಬೋಲಿ ವತಾಳಸ್ತೆ ಇನಖ್ಹಾಜೇಸ್ ಮನಾಸ್ ಮಹಿಮೆ ಕರಸ್. ಬಾಕನ ಛಾ಼ತೆ ಅಖ್ಖೂಸ್ ಮಾರುಸ್‌; ಇನಖ್ಹಾಜೇಸ್ ಪವಿತ್ರಾತ್ಮ ಮೇ ಬೋಲುಸ್ತೆ ಇನಾಸ್ ಲೀನ್‌, ಯೋ ತುಮೂನ ಬೋಲ್‌ಶೆ ಕರಿ ಮೇ ಬೋಲ್ಯೋತೆ.”
ಖ್ಹುಶಿ ಅಜು಼ ದುಖ್
“ಥೋಡ ದನ್ನ ಬಾದ್‌ಮ ತುಮೆ ಮನ ದೇಕ್‌ಶು ಕೊಯ್ನಿ, ಕತೋಬಿ ಇನ ಬಾದ್‌ಮ ಥೋಡ ದನ್ ಕೇಡೆ ಮನ ದೇಕ್‌ಶು” ಕರಿ ಬೋಲ್ಯೊ.
ಅನ ಖ್ಹಮ್‌ಜಿನ್‌, ಇನ ಶಿಷ್ಯರ್‌ಮ ಥೋಡಾನೆ, “ಅನಿ ಮತ್‌ಲಬ್ ಶಾತ್‌? ಥೋಡ ದನ್ನ ಬಾದ್‌ಮ, ತುಮೆ ಮನ ದೇಕ್ಶುಕೊಯ್ನಿ,ಕತೋಬಿ ಅನ ಬಾದ್‌ಮ ಥೋಡ ದನ್‌ಕೇಡೆ ಮನ ದೇಕ್‌ಶು ಕರಿ ಬೋಲಾಸ್ನಿ? ಅಜು಼, ‘ಶನಕತೊ, ಮೇ ಬಾಕನ ವಳ್ಯೊಜ಼ವುಸ್‌ ಕರೀಬಿ ಬೋಲಾಸ್ನಿ?” ಕರಿ ಇವ್ಣ-ಇವ್ಣ ಮಹಿ ವಾತೆ ಬೋಲಿಲಿದು. ಅನೆ ಬೋಲ್ಯೊತೆ ‘ಥೋಡ ದನ್ನ ಬಾದ್‌ಮ’ ಕರಿ ಅನಿ ಮತ್‌ಲಬ್ ಶಾತ್‌? ಶಾತ್‌ ಬೋಲಸ್ಕಿ ಹಮೂನ ಮಾಲುಮ್ ಕೊಯ್ನಿ!” ಕರಿ ಬೋಲಿಲಿದು.
ಯೇಸುನೆ ಇವ್ಣೆ ಇನ ಪುಛಾ಼ವ್ಣು ಕರಿ ಛಾ಼ ಕರಿ ಮಾಲುಮ್ ಕರಿಲೀನ್, ಇವ್ಣುನ, “ಥೋಡ ದನ್ನ ಬಾದ್‌ಮ ತುಮೆ ಮನ ದೇಕ್‌ಶು ಕೊಯ್ನಿ, ಕತೋಬಿ ಅನ ಬಾದ್‌ಮ ಥೋಡ ದನ್ನ ಕೇಡೆ ತುಮೆ ಮನ ದೇಕ್‌ಶು; ಆಸ್ಕಿ ಶು ತುಮೆ ತುಮಾರ-ತುಮಾರ ಮಹಿ ಪುಛಾ಼ವ್‌ ಕರಾಸ್ತೆ? ಮೇ ತುಮೂನ ಖ್ಹಾಚ ಬೋಲುಕರುಸ್, ತುಮೆ ರೊವ್‌ತಾಹುಯಿನ್, ಕುರ್‌ಲ್ಹಾವ್‌ಶು, ಕತೋಬಿ ಜಗತ್‌ವಾಳು ಖ್ಹುಶೀಕರ್‌ಶೆ; ತುಮೂನ ದುಖ್ ಉಶೆ, ಕತೋಬಿ ತುಮಾರು ದುಖ್ ಜೈ಼ನ್‌, ಖ್ಹುಶಿ ಆವ್‌ಶೆ2. ಏಕ್‌ ತಯೇಡ ಜ಼ಣಾನಿ ವಖ್ಹತ್‌ಮ, ಇನಿ ಅಜಾ಼ನಿ ವಖ್ಹತ್ ಐಗೈ ಕರಿ ದುಖ್ ಕರಾಸ್, ಕತೋಬಿ ಲಡ್ಕು ಪೈದಾ ಕರಾನ ಬಾದ್‌ಮ, ಜಗತ್‌ಮ ಏಕ್‌ ಲಡ್ಕು ಪೈದಾ ಹುಯಿನ್ ಆಯುತೊ, ಯೋ ಖ್ಹುಶಿಥಿ ಅಜಾ಼ನ ಭೈಕಿಜಾ಼ಸ್‌. ಇಮ್ಮಸ್ ತುಮೂನಾಬಿ ಹಮ್ಕೆ ದುಖ್ ರ‍್ಹಯುತೋಬಿ, ಮೇ ತುಮೂನ ಪಾಛೊ಼ ದೇಖಿಶ್‌, ತದೆ ತುಮಾರು ದಿಲ್‌ ಖ್ಹುಶೀಥಿ ಭರೈಜಾ಼ಶೆ, ಅಜು಼ ಕಿನೇಥೀಬಿ ತುಮಾರಿ ಖ್ಹುಶಿನ ದೂರ್ ಕಾಡಾನ ಕೋ ಉಶೇನಿ.
ಯೋ ದನ್ಮ, ತುಮೆ ಮನ ಶಾತ್ಬಿ ಕೋ ಪುಛಾ಼ವ್‌ಶುನಿ. ಮೇ ತುಮೂನ ಖ್ಹಾಚ ಬೋಲುಕರುಸ್, ತುಮೆ ಮಾರ ನಾಮ್‌ಪರ್‌ ಶಾತ್‌ ಮಾಂಗಿಲಿದಾತೋಬಿ ಬಾ ತುಮೂನ ಯೋ ದಿಶೆ. ತುಮೆ ಹಂಕೆತೋಡಿ ಮಾರ ನಾಮ್‌ಪರ್‌ ಶಾತ್ಬಿ ಮಾಂಗಿರಾಖ್ಯಕೊಯ್ನಿ; ಮಾಂಗಿಲೆವೊ ತುಮೂನ ಮಳ್ಶೆ, ತದೆ ತುಮಾರಿ ಖ್ಹುಶಿ ಭರೈನ್ ಝ಼ಲಕ್‌ಶೆ” ಕರಿ ಬೋಲ್ಯೊ.
ಜಗತ್‌ಪರ್‌ ಜೀತ್
ಮೇ ಆ ಖ್ಹಾರು ಮತ್ಲಬ್‌ಥಿ ತುಮೂನ ಬೋಲಿರಾಖ್ಯೊಸ್. ಕತೋಬಿ ಬಿಜು಼ ಖ್ಹಾಮ್ಣೆ ಮತ್ಲಬ್‌ನಿ ಖೇಣಿಥಿ ಕಾಹೆತೆ ಬಾನಿ ಬಾರೇಮ ನೇರ್‌ವಳಿಥಿ ತುಮಾರ ಜೋ಼ಡೆ ವಾತೆ ಬೋಲಾನಿ ವಖ್ಹತ್ ಆವ್‌ಶೆ. ಯೋ ದನ್ಮ, ಮಾರ ನಾಮ್‌ಪರ್‌ ಮಾಂಗಿಲಿಶು; ಮೇ ಬಾಕನ ತುಮಾರಖ್ಹಾಜೆ ಮಾಂಗಿಲೀಶ್‌ ಕರಿ ಮೇ ತುಮೂನ ಬೋಲಿಶ್ ಕೊಯ್ನಿ. ತುಮೆ ಮನ ಪ್ಯಾರ್‌ಕರೀನ್ ಮೇ ಬಾಕಂಥೊ ಆಯೋಕರಿ ವಿಶ್ವಾಸ್ ಕರ‍್ಯಾತೆ ಇನಖ್ಹಾಜೆ ಬಾಸ್ ತುಮೂನ ಪ್ಯಾರ್‌ಕರಾಸ್‌. ಮೇ ಬಾಕಂಥೊ ಜಗತ್ನ ಆಯೊ; ಹಮ್ಕೆ ಆ ಜಗತ್ನ ಮ್ಹೆಂದಿನ್, ಬಾಕನ ವಳ್ಯೊಜ಼ವುಸ್‌” ಕರಿ ಬೋಲ್ಯೊ.
ತದೆ ಶಿಷ್ಯರ್‌ನೆ ಇನ, “ಹಮ್ಕೆ ತೂ ಮತಲಬ್‌ಥಿ ಕೋ ಬೋಲುಕರಾನೀತೆ ನೇರ್‌ವಳಿಥಿ ಬೋಲುಕರಾಸ್‌. ತುನ ಖ್ಹಾರುಸ್‌ ವಾತೆ ಮಾಲುಮ್ ಕರಿ,ಹಮೂನ ಮಾಲುಮ್. ಅಜು಼ ತುನ ಕೋಣ್‌ಬಿ ಪುಛಾ಼ವಾನಿ ಜ಼ರೂರತ್ ಕೊಯ್ನಿ ಅನೇಥಿ ತೂ ದೇವ್‌ಕಂಥೊ ಆಯೊಹುಯೊ ಕರಿ ಹಮೆ ವಿಶ್ವಾಸ್ ಕರಿಯೇಸ್” ಕರಿ ಬೋಲ್ಯ.
ತದೆ ಯೇಸುನೆ ಇವ್ಣುನ, “ಹಮ್ಕೆ ವಿಶ್ವಾಸ್ ಕರೋಸ್ಕಿಶು? ಹಂದೇಖೊ, ವಖ್ಹತ್ ಐರ‍್ಹೀಸ್ ಹಂಕೇಸ್‌ ಯೋ ವಖ್ಹತ್ ಐರ‍್ಹೀಸ್, ತುಮಾರಾಮ ಏಕೇಕ್‌ ಜ಼ಣು, ಇವ್ಣಿ-ಇವ್ಣಿಝ಼ಗೋಮ ಛಿದ್‍ರೈಜಾ಼ಶು ಮನ ಏಕ್ಲನಾಸ್‌ ಮ್ಹೆಂದಿದ ಕರಿತುಮೆ ನಕೊಸೋಚೊ ಕತೋಬಿ ಮಾರೊ ಬಾ ಮಾರ ಜೋ಼ಡೆ ಛಾ಼. ತುಮೆ ಮಾರಾಮ ರ‍್ಹೀನ್, ತುಮೂನ ಶಾಂತಿ ಮಳ್‌ಣು ಕರಿ ಆ ಖ್ಹಾರು ತುಮೂನ ಬೋಲಿರಾಖ್ಯೊಸ್. ಜಗತ್‌ಮ ತುಮೂನ ಖ್ಹತಾಪ್ಣಿ ಛಾ಼, ಕತೋಬಿ ಘಟ್ ರ‍್ಹವೊ,ಶನಕತೊ ಮೇ ಜಗತ್ನ ಜೂತಿರಾಖ್ಯೋಸ್‌” ಕರಿಬೋಲ್ಯೊ.
Source notes (2)
- Footnote ಬಾನಿ ಹುಕುಮ್‌ನ ಚ಼ಲಾವ್ಣು ಪಡ್ಯುಥು
- Footnote ಸೊರ್ಗನಿ ಖುಷಿ ಮಳ್ಶೆ
ದೇವ್ನಿ ಖ್ಹಾಚಿ ವಚನ್. Copyright © 2023 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.