ದೇವ್ನಿ ಖ್ಹಾಚಿ ವಚನ್
ಅಪೊ 9
ಸೌಲ ಬದಲಾವ್ಣಿ ಹುಯೋತೆ
(ಅಪೊ 22:6-16; 26:12-18)
‘ಪ್ರಭುನ ಶಿಷ್ಯರ‍್ನ ಡರಾವನ ಅಜು಼ ಮಾರಾನಖ್ಹಾಜೆ ಯೆರೂಸಲೇಮ್ಮ ಸೌಲ ಬಿಜೂ಼ಬಿ ಕೋಶಿಶ್ ಕರುಕರ್ತೊಥೊ. ಇನಖ್ಹಾಜೇಥಿ ಯೊ ಗಲ್‌ಢಯಾಜಕ್‌ಕನ ಜೈ಼ನ್, ದಮಸ್ಕ ಖ್ಹಯೇರ‍್ನಿ ಸಭೆನ ಚಿಟ್ಟಿ ಲೀಖಿನ್ ದಮಸ್ಕಮ ಕ್ರಿಸ್ತಾನ ಮಾರಗ್‍ಮ ಚಾ಼ಲವಾಳು ತಯೇಡ ರ‍್ಹವೊ ಪರ್ಖ್ಹೊ ರ‍್ಹವೊ ಇವ್ಣುನ ಬೇಡಿ ಘಾಲಿನ್ ಖ್ಹತಾವನ ಯೆರೂಸಲೇಮ್ಮ ಖೇಚಿಲಿ ಆವಾನ ಮನ ಹುಕುಮ್ ದೆವೊ ಕರಿ ಬೋಲಿಲಿದೊ. ಯೊ ದಮಸ್ಕನ ಖನ್ನೆ ಚಾ಼ಲ್ತೊಹುಯಿನ್‌. ಖ್ಹಯೇರ‍್ನ ಆವಾನಿ ವಖ್ಹ್‌ತೆ, ಆಕಾಶ್‌ಮಾಥು ಏಕ್‌ ಉಜಾ಼ಳು ಅಪ್‌ಗುಪ್‌ಥೀಸ್ ಐನ್ ಇನ ಅಶ್ಪಿಶ್ ಉಜಾ಼ಖ್ಹ್‌ಥಿ ಝ಼ಮ್‍ಕ್ಯು. ಯೊ ಜ಼ಮೀನ್‌ಪರ್ ರಡ್ಕಿಗಯೊ ತದೆ, “ಸೌಲ, ಸೌಲ ಮನ ಶನ ಖ್ಹತಾವಸ್?” ಕರಿ ಬೋಲಾನಿ ಆವಾಜ಼್‌ನ ಖ್ಹಮ್‍ಜ್ಯೊ. ಸೌಲನೆ, “ಪ್ರಭು ತೂ ಕೋಣ್?” ಕರಿ ಬೋಲ್ಯೊ. ಪ್ರಭುನೆ, “ತೂ ಖ್ಹತವ್‍ಕರಸ್ತೆ ಯೇಸುಸ್ ಮೇ” ಕತೋಬಿ ತೂ ಉಠೀನ್ ಖ್ಹಯೇರ‍್ನ ಮಹಿ ಜಾ಼, ತೂ ಕರ್ನುತೆ ಅಖ್ಖು ಹಿಜ಼್ಜ ತುಮುನ ಮಾಲುಮ್ ಪಡ್‌ಶೆ” ಕರಿ ಬೋಲ್ಯೊ. ಇನ ಜೋ಼ಡೆ ವಳೇಜಾ಼ತಥಾತೆ ಇವ್ಣೆ ಯೋ ಅವಾಜ಼್ ಖ್ಹಮ್‌ಜ್ಯು ಪಣ್ಕಿ ಕಿನಾಬಿ ದೇಖಾನ ಕೋಹುಯುಂತೆ ಮುಕ್ಕಪಡಿಗ. ಸೌಲ ಜ಼ಮೀನ್‍ಪರ್ಥೊ ಉಠೀನ್ ಡೋಳ ಪಾಡಮ ಶಾತ್ಬಿ ಕೋ ದೆಖಾಯುನಿ. ಇನಖ್ಹಾಜೆ ಇವ್ಣೆ ಇನ ಹಾತ್‍ಧರೀನ್ ದಮಸ್ಕಮ ಬುಲೈಲಿನ್ ಗಯ. ಇನ ತೀನ್ ದನ್ ಡೋಳ ಕೋ ದೆಖಾಯುನಿ,ಅಜು಼ ಇನೆ ಶಾತ್ಬಿ ಖಾದೊಪೀದೊ ಕೊಂತೆಥೊ. ತದೆ ದಮಸ್ಕಮ ಅನನೀಯಕರಿ ಏಕ್‍ಜ಼ಣೊ ವಿಶ್ವಾಸಿಥೊ. ಪ್ರಭುನೆ ದರ್ಶನ್‍ಮ, ‘ಅನನೀಯ’ ಕರಿ ಬೋಲಖ್ಹತರ್, ತದೆ ಇನೆ ಮೆ ಹಜ್ಜಾ಼ಸ್ ಛೂ಼ ಕರಿ ಬೋಲ್ಯೊ. ಪ್ರಭುನೆ ಅನನೀಯನ, “ತೂ ಉಠೀನ್ ಖ್ಹತ್ತಡ್‍ ಗಲ್ಲಿಕರಿ ಬೋಲಾನು ನಾಮ್ನಿ ಗಲ್ಲಿಮ ಜಾ಼. ಹಿಜ್ಜಛಾ಼ತೆ ಯೂದನ ಘರ್‌ಮ ದೇಖಿನ್ ತಾರ್ಸಸ್‍ ಖ್ಹಯೇರ‍್ನು ಸೌಲನಿ ಬಾರೇಮ ಪೂಛಾ಼ವ್ ಯೊ ಹಮ್ಕೆ ಪ್ರಾರ್ಥನೆ ಕರುಕರಸ್. ಸೌಲನೆ ಏಕ್‌ ದರ್ಶನ್ ದೇಖ್ಯೊ. ಅನನೀಯಕರಿ ಏಕ್‍ಜ಼ಣೊ ಆವ್‌ಶೆ ಇನ ಪಾಛು಼ ಡೋಳ ದೇಖಾವನಿತರ ಇನ ಉಪ್ಪರ್ ಹಾತ್‍ ಮ್ಹೆಲಾಖ್ಹತರ್ ಇನೆ ದೇಖ್ಯೊ ಕರಿ ಬೋಲ್ಯೊ. ತದೆ ಅನನೀಯನೆ ಪ್ರಭು,ಯೆರೂಸಲೇಮ್‌ನು ತಾರ ದೇವ್ನಅದ್ಮಿ ಖ್ಹಾರಾನ ಕೆತ್ರೇಕ್ಕಿ ಖ್ಹತಾಪ್ಣಿನ ದಿದೂತೆ ಅನಿ ಬಾರೇಮ ಕೈಯೇಕ್‍ಜ಼ಣಾಥಿ ಖ್ಹಮ್‍ಜಿರಾಖ್ಯೊಸ್. ಅಜು಼ ಹಜ್ಜಾ಼ಬಿ ಗಲ್‌ಢಯಾಜಕ್‌ಥಿ ಅದಿಕಾರ್ ಲೀರಾಖ್ಯೊಸ್‍ಕಿ, ತಾರ ನಾಮ್ನ ಬೋಲವಾಳಾನ ಬೇಡಿಘಾಲ್ನುಕರಿ. ಪ್ರಭುನೆ ಅನನೀಯನ “ತೂ ಜಾ಼; ಯೋ ಅದ್ಮಿಖ್ಹಾರ ಯೆಹೂದ್ಯರ್‌ಕಾಹೆತೆ ಅದ್ಮಿವೊನ ರಾಜಾ಼ವ್‌ನ, ಅಜು಼ ಇಸ್ರಾಯೇಲ್ ಅದ್ಮಿವೊನ ಮಾರ ನಾಮ್ನ ಖ್ಹಮ್‍ಜಾ಼ಡನಖ್ಹಾಜೆ ಮೇ ಚೂ಼ಣಿರಾಖ್ಯೊತೆ ಏಕ್‌ ಜಿನಖ್ಹ್‌ ಹುಯಿರೊಸ್. ಯೊ ಮಾರ ನಾಮ್ನಖ್ಹಾಜೆ ಕೆತ್ರು ಲತಾಡ ಲಿಶೆಕರಿ ಮೇಸ್ ಇನ ವತಾಳಿಶ್.” ಕರಿ ಬೋಲ್ಯೊ. ತದೆ ಅನನೀಯ ಚಾ಼ಲ್ತೊ ಯೊ ಘರ್‌ಮ ಜೈ಼ನ್ ಇನಾಪರ್ ಇನೊ ಹಾತ್‍ ಮ್ಹೇಲಿನ್, “ಮಾರೊ ಭೈ ಸೌಲ, ತೂ ಆವಾನಿ ವಾಟ್ಮ ತುನ ದೆಖಾಯೊತೆ ಪ್ರಭು ಯೇಸು ತುನ ಪಾಛು಼ ಡೋಳೊ ದೆಖಾವಾನಿಘೊಣಿಬಿ, ತು ಪವಿತ್ರಾತ್ಮಾಥಿ ಭರಾವ್ಣು ಕರೀಬಿ ಮನ ಮೋಕ್ಲಿರಾಖ್ಯೊಸ್” ಕರಿ ಬೋಲ್ಯೊ. ಯೋ ವೇಳ್ಮಾಸ್ ಸೌಲನ ಡೋಳೇಥಿ ಪಡದ್ನಿಘೋಣಿ ಶಾತ್ಕಿ ಹೇಟ್ ನಿಕ್ಳಿ ಪಡೀನ್ ಇನೊ ಡೋಳ ಪಾಛು಼ ದೆಖಾವಲಗ್ಯು. ಯೋ ಉಠೀನ್ ಬ್ಯಾಪ್ತಿಸ್ಮ ಲಿದೊ. ಇನಕೇಡೆಥು ಖಾಣು ಖಾವಖ್ಹತರ್ ಇನ ಶಕತ್ ಆಯು. ಸೌಲ ಥೋಡದನ್‍ಲಗು ದಮಸ್ಕಮ ಸುವಾರ್ತೆನ ಬೋಲ್ಯೊ. ಅಜು಼ ವಿಶ್ವಾಸಿನಿ ಜೋ಼ಡ್ಮ ಥೊ.
ದಮಸ್ಕಮ ಸೌಲನಿ ಬೋಧನೆ
ಪೌಲ ತದ್ನುತದೇಸ್, “ಯೇಸು ದೇವ್‌ನೊ ಛಿಯ್ಯೊ” ಕರಿ ಸಭೆ ಮಳಾನಿ ಝ಼ಗೋಮ ಬೋಲಾನ ಶುರು ಕರ‍್ಯೊ. ಆ ವಾತೆನ ಖ್ಹಮ್‍ಜ್ಯುತೆ ಖ್ಹಾರು, “ಯೆರೂಸಲೇಮ್ಮ ಆ ಅದ್ಮಿಸ್‌ ಯೇಸುನ ನಾಮ್ನ ವಿಶ್ವಾಸ್ ಕರವಾಳನ ಮಾರಿನಾಖು ಕರ್ತೊಥೋತೆ ಆಸ್ ಕಾಹೆಕಿ ಶು? ಅಜು಼ ಇವ್ಣುನ ಗಲ್‌ಢಯಾಜಕ್‌ಕನ ಧರಿಲೀನ್ ಜಾ಼ವ್ಣುಕರೀಸ್ ಆ ಹಜ಼್ಜ ಐರ‍್ಹೋಸ್ತೆ?” ಕರಿ ಬೋಲಿಲಿದು. ಇನೆ ಅಜೂ಼ಬಿ ಘಣು ವಚನ್ನು ಆಧಾರ್‌ಥಿ ಯೇಸು ಕ್ರಿಸ್ತಾಸ್ ಜಗತ್ನ ಬಚಾ಼ಡವಾಳೊಕರಿ ಬೋಲಾನು ಖ್ಹಾಚಿಸ್ ಕರಿ ಸೌಲನೆ ದಮಸ್ಕಮಥೂತೆ ಯೆಹೂದ್ಯರ್‌ನ ಸಾಬಿತ್ ಕರಾಯೊ. ಕೆತ್ರಾಕಿ ದನ್ನಪಾರ್ ಯೆಹೂದ್ಯವಾಳು ಸೌಲನ ಮಾರಿನಾಕ್ಣುಕರಿ ಖ್ಹೂಜ಼್ ಕರ‍್ಯು. ಯೆಹೂದ್ಯರ್‌ವಾಳು ಸೌಲ ಮಳಾನು ದೇಕ್‍ತುಹುಯಿನ್‍ ನಂಗರ‍್ನ ಖ್ಹಾರ ದರ‍್ವಾಜ಼ವ್‌ಕನ ರಾತ್ ದನ್ ಕಾವ್ಲಿ ಥು. ಕತೋಬಿ ಯೋ ಖ್ಹಾರು ಸೌಲನ ಮಾಲುಮ್ ಪಡ್ಯು. ಏಕ್‍ರಾತ್ ಪೌಲನ ಥೋಡ ಶಿಷ್ಯರ‍್ನೆ ಇನ ಖ್ಹಯೇರ‍್ನ ಭಾರ್‌ ಮೋಕ್ಲಾನಟೇಕೆ ಇನ ಏಕ್‌ ಟೋಕ್ರಾಮ ಬೆಖ್ಹಾಡಿನ್‌ ಖ್ಹಯೇರ‍್ನ ಭೀತ್‌ನ ಉಪ್ಪರ್‌ಥು ಹೇಟ್ ಉತಾರಿದಿದು.
ಯೆರೂಸಲೇಮ್ಮ ಸೌಲ
ಸೌಲ ಯೆರೂಸಲೇಮ್ಮ ಜೈ಼ನ್ ವಿಶ್ವಾಸಿ ಟೋಳ್ಮ ಮಳೀರ‍್ಹೇಣುಕರಿ ಕೋಶಿಶ್ ಕರ‍್ಯೊ. ಕತೋಬಿ ಇವ್ಣೆಖ್ಹಾರು, ಸೌಲನ ಖ್ಹಾಚಮಾಬಿ ಯೇಸುನೊ ಶಿಷ್ಯಕರಿ ನಂಬ್ಯುಕೊಂತೆ ಇನೇಥಿ ಡರಿಗಯು. ಕತೋಬಿ ಬಾರ್ನಬನೆ ಇನ ಮದತ್ ಕರಾನ ಅಪೊಸ್ತಲರ್‌ಕನ ಬುಲೈಲಿನ್ ಆಯೊ. ಸೌಲನೆ ದಮಸ್ಕನ ಮಾರಗ್‍ಮ ಪ್ರಭುನ ದೆಖ್ಯೊತೆ ಪ್ರಭು ಸೌಲಥಿ ವಾತೆ ಬೋಲ್ಯೊತೆ ಅಖ್ಖೂಸ್ ಖ್ಹಮ್‌ಜಾ಼ಡ್ಯೊ. ಕಾಹೆತೆ ದಮಸ್ಕಮ ಡರ್‌ಕೊಂತೆ ಪ್ರಭು ಯೇಸುನ ನಾಮ್‍ಲೀನ್ ಬೋಧನೆ ಕರ‍್ಯೊತೆಯಿನ ಇವ್ಣುನ ಬೋಲಿ ಖ್ಹಮ್‌ಜಾ಼ಡ್ಯೊ. ಇನಬಾದ್ಮ ಸೌಲ ಯೆರೂಸಲೇಮ್ಮ ವಿಶ್ವಾಸಿನಿ ಜೋ಼ಡ್ಮ ಮಳಿನ್ ಶಿಕಾಡ್ತೊಹುಯಿನ್ ಪ್ರಭುನ ನಾಮ್‍ಥಿ ಡರ್‌ಕೊಂತೆ ಬೋಧನೆ ಕರಾಲಗ್ಯೊ. ಗ್ರೀಕ್ ವಾತೆ ಬೋಲ್‍ತುಥೂತೆ ಯೆಹೂದ್ಯರ್‌ನ, ಜೋ಼ಡ್ಮ ಸೌಲ ಕದೇಬಿ ವಾದ ಕರ್ತೊಥೊ. ಇನಖ್ಹಾಜೆ ಇನ ಮಾರಿನಾಕ್ಣುಕರಿ ಕೋಶಿಶ್ ಕರ‍್ಯು. ಅನ ಮಾಲುಮ್ ಕರ‍್ಯುತೆ ವಿಶ್ವಾಸಿಖ್ಹಾರು ಇನ ಕೈಸರೈ ಖ್ಹಯೇರ‍್ನ ಬುಲೈಲಿಜೈ಼ನ್ ಹಿಜ್ಜಾ಼ಥು ತಾರ್ಸಸ್‍ ಖ್ಹಯೇರ‍್ನ ಮೋಕ್ಲಿದಿದು. ಇನಬಾದ್ಮ ಯೂದಾಯ, ಗಲಿಲಾಯ, ಅಜು಼ ಸಮಾರ್ಯನ ತಬರ್‌ಖಾಮ ಥೀತೆ ಖ್ಹಾರಿ ಸಭೆಮ ಸಮಾಧಾನ್‍ ಪಡ್ಯು. ಸಬೆ ಭಡ್ತುಹುಯಿನ್ ಪ್ರಭುನ ಡರ್‌ಮಾಬಿ ಭಕ್ತಿಮಾಬಿ ಜಿವ್ತುಹುಯಿನ್, ಪವಿತ್ರಾತ್ಮಥಿ ಜಾ಼ಖ್ಹತ್ ಹೋತುಹುಯಿನ್ ಭಡ್ಯು.
ಲುದ್ದ ಅಜು಼ ಯೊಪ್ಪಮ ಪೇತ್ರ
ಯೆರೂಸಲೇಮ್‌ನು ಅಶ್‌ಪಿಶ್‍ಥೂತೆ ಖ್ಹಾರ ಗಾಮ್ಮ ಪೇತ್ರ ಫರ್ತೊಜಾ಼ವಾನಿ ವಖ್ಹ್‌ತೆ ಲುದ್ದಕರಿ ಗಮ್ಮರ‍್ಹವಾಳ ದೇವ್ನ ಅದ್ಮಿಖ್ಹಾರಾನ ಮಳ್ಯೊ. ಹಿಜ್ಜಾ಼ ಲಕ್ವೊಮಾರಿನ್ ಆಟ್ ವರಖ್ಹ್ ಥೊ ಬಿಛಾ಼ವ್ಣಪರ್ ಪಡ್ಯೊಥೋತೆ ಐನೇಯ ಕರಿ ಏಕ್‌ ಜ಼ಣಾನ ದೇಖ್ಯೊ. ಪೇತ್ರನೆ ಯೋ ಅದ್ಮಿನ, “ಐನೇಯ,ಯೇಸು ಕ್ರಿಸ್ತಾಸ್ ತುನ ಅಛ್ಛು಼ ಕರುಕರಸ್. ಉಟ್ ತಾರ ಬಿಛಾ಼ವ್ಣನ ತೂಸ್ ಬಿಚೈ಼ಲೇ” ಕರಿ ಬೋಲ್ಯೊ. ತುರಂತ್ ಯೋ ಉಠಿನಿಕ್‍ಳ್ಯೊ. ಲುದ್ದಮ ಅಜು಼ ಶಾರೋನ್‍ಮ ರ‍್ಹವಾಳು ಅದ್ಮಿಖ್ಹಾರು ಇನ ದೇಖಿನ್ ಪ್ರಭು ಯೇಸುನ ಉಪ್ಪರ್ ವಿಶ್ವಾಸ್ ಕರ‍್ಯು. ಯೊಪ್ಪ ಖ್ಹಯೇರ್‌ಮ ತಬಿಥಾಬಿ ಯೇಸುನಿ ಏಕ್‌ ಶಿಷ್ಯೇ ಥಿ. ಗ್ರೀಕ್‍ನಿ ಬೋಲಿಮ ಇನು ನಾಮ್ ‘ದೊರ್ಕ’ ಇನಿ ಮತ್‌ಲಬ್ ‘ಚೀತಳ್‌ಕರಿ’ ಯೋ ಕದೇಬಿ ಅಛ಼್ಛುಕಾಮ್ ಕರಾವಳಿ ಅಜು಼ ದಾನಧರಮ್‍ ದ್ಯವಾಳಿ ಹುಯಿರ‍್ಹಿಥಿ. ಯೋ ವಖ್ಹತ್‌ಮ ಇನ ರೋಗ್ ಅಯಿನ್ ಮರಿಗಯಿ. ಅಜು಼ ಇನ ಶರೀರ್‌ನ ಧೊಯಿನ್ ಉಪ್‌ಲ್ಯಖನ್ನ ಕೋಣಾಮ ಲಯಿನ್ ಮ್ಹೇಲ್ಯ. ಆ ‘ಲುದ್ದ’ ಯೊಪ್ಪ ಖ್ಹಯೇರ‍್ನ ಖನ್ನೆಸ್‌ ರ‍್ಹವಾಮ ಪೇತ್ರ ಹಿಜ್ಜಾ಼ ರ‍್ಹವಾನು ಶಿಷ್ಯರ‍್ನೆ ಖ್ಹಮ್‌ಜಿನ್‌ “ದಯಾ ಕರೀನ್ ಒಗ್ಗಿಸ್‌ಮ ಹಮಾರ ಗಮ್ಮ ಆವ್ಣು” ಕರಿ ಬೇಜ಼ಣಾನ ಬೋಲಿ ಮೋಕ್‌ಲ್ಯೊ. ಪೇತ್ರ ತಯಾರ್‌ಹುಯಿನ್ ಹಿಜ್ಜಾ಼ ಆಯೊ. ತದೆ ಇನ ಘರ್‌ನ ಉಪ್‌ಲ್ಯಖನ್ನ ಕೋಣಾಮ ಬುಲೈಲಿನ್ ಗಯು. ಹಿಜ಼್ಜಾಥೂತೆ ಮುಂಡಚ್ಚಿಖ್ಹಾರು ಪೇತ್ರನ ಅಶ್ಪಿಶ್ ರೋವ್‍ತೆಹುಯಿನ್,ಅಜು಼ ದೊರ್ಕ ಜಿವ್ತಿಥೀತೆ ತದೆ ಇವ್ಣಖ್ಹಾಜೇಥಿ ಬಣೈನ್ ದಿದಿಥೀತೆ ಪೇರ್‌ವಾಖ್ಹ್ ಅಜು಼ ಝ಼ಗ್ಗಾನು ಬಣಾವಟ್ನ ವತಾಳ್‍ಯೆ. ಅಜು಼ ಪೇತ್ರನೆ ಅದ್ಮಿಖ್ಹಾರಾನ ಭಾರ್‌ ಮೋಕ್ಲಿನ್ ಢುಕ್‍ಣ್ಯಮೇಟೆ ಹುಯಿನ್ ಪ್ರಾರ್ಥನೆ ಕರೀ ಶರೀರ್‌ಭಣಿ ಫರೀನ್, “ತಬಿಥಾ, ಉಪ್ಪರ್ ಉಟ್” ಕರಿಬೋಲ್ಯೊ. ಯೋ ಡೋಳಪಾಡಿನ್ ಪೇತ್ರನ ದೇಕ್‍ಥೀಸ್ ಉಠಿ ಭೀರಿಗಯಿ. ಇನೆ ಹಾತ್‍ದೀನ್‍ ಉಠಾಡಿ ಭೀರಾಖ್ಯೊ. ತದೆ ವಿಶ್ವಾಸಿಖ್ಹಾರು ಅಜು಼ ಮುಂಡಚ್ಚಿ ತಯೇಡಾವ್‍ನ ಯೊ ಕೋಣಾಮ ಬುಲೈ ಜಿವ್ತುಹುಯಿತೆ ಇನ ಇವ್ಣುನ ವತಾಳ್ಯೊ. ಯೊಪ್ಪಮ ಹರೇಕ್ ಬಾಜು಼ಮ ಥೂತೆ ಅದ್ಮಿವೋನ ಆ ವಾತೆ ಮಾಲುಮ್ ಪಡ್ಯು. ಯೊ ಅದ್ಮಿಖ್ಹಾರಾಮ ಕೆತ್ರೂಕಿ ಜ಼ಣು ಪ್ರಭುನ ವಿಶ್ವಾಸ್ ಕರ‍್ಯು. ಪೇತ್ರನೆ ಯೊಪ್ಪಮ ಚಾ಼ಂಬ್ಡಾನು ಕಾಮ್‍ಕರವಾಳೊ ಸೀಮೋನ್ನ ಘರ್‌ಮ ಘಣ ದನ್‌ಲಗು ರ‍್ಹಿಯೊ.
ದೇವ್ನಿ ಖ್ಹಾಚಿ ವಚನ್. Copyright © 2023 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.