ದೇವ್ನಿ ಖ್ಹಾಚಿ ವಚನ್
ಅಪೊ 28
ಮೆಲೀತೆಮ
ಹಮೆ ಜ಼ತನ್‌ಥಿ ಕನಾರಿನ ಬಚಿನ್ ಜಾ಼ವಾದಿನ್ ಯೋ ಮೆಲೀತೆ ಟಾಪು ಕರಿ ಮಾಲುಮ್‍ಹುಯು. ತದೆ ಪಾಣಿ ವರ್ಖ್ಹುಕರ್ತೊಥೊ ಅಜು಼ ಘಣು ಠಣ್‍ಥೂತೆಖ್ಹಾಜೆ ಯೋ ಟಾಪುನು ಅದ್ಮಿಖ್ಹಾರು ಪ್ಯಾರ್‌ಥಿ ಇವ್ಣೆ ಶೇಕಾನಖ್ಹಾಜೆ ಆಗ್ ಲಗಾಡಿನ್ ಹಮೂನ ಖ್ಹಾರಾನ ಬುಲಾಯು. ಪೌಲನೆ ಏಕ್‌ ಭಾರೊ ಲಾಕ್ಡಾನ ಎಕ್ಟುಕರಿನ್ ಲೈನ್‌ ಆಗ್ನಉಪ್ಪರ್ ನಾಖುಕರಾನಿವಖ್ಹ್‌ತೆ ಇನ ಅಂಚ಼್‌ನಮಾರ್ಮ ಖ್ಹಾಪ್‌ ಏಕ್‌ ಭಾರ್‌ಆಯಿನ್ ಪೌಲಾನ ಹಾತ್‍ಕೇಡೆ ಲಪ್‍ಟೈಗಯು. ಪೌಲನ ಹಾತ್ನ ಲಪ್‍ಟೈರ‍್ಹುಥೂತೆ ಯೋ ಖ್ಹಾಪ್‍ನ ದೇಖ್ಯೂತೆ ಟಾಪುವಾಳು, “ಆ ಅದ್ಮಿ ಖ್ಹಾಚ ಖೂನಿಸ್‌ ಹುಯಿರೊಸ್. ಆ ಹೈರೋತೆ ದರ‍್ಯಾವ್‍ಮಾಥೊ ಬಚಿನ್ ಆಯೋತೋಬಿ ನಶೀಬ್‌ ಇನ ಜಿವಾನ ಮ್ಹೇಲ್ಯುಕೊಯ್ನಿ.” ಕರಿ ಇವ್ಣ ಇವ್ಣಾಮ ಬೋಲಿಲಿದು. ಕತೋಬಿ ಪೌಲನೆ ಖ್ಹಾಪ್‍ನ ಆಗ್‌ಮ ಝ಼ಟ್ಕಿನಾಖ್ಯೊ; ಇನ ಶನು ಖತ್ರಾಬಿ ಕೊ ಹುಯುನಿ. ಇವ್ಣೆ ಇನು ಅಂಗ್‍ತನ್ ಫುಲಿಜಾಶೆ ನತರ್ ಆ ಅಫ್ಫರ್‌ಥೊಸ್ ಮರಿನ್ ಲಡಕ್‍ಶೆ ಕರಿ ಟಿವೈರ‍್ಹೂಥು. ಕತೋಬಿ ಕೆವ್ಡಿ ವಖ್ಹತ್ ಟಿವೈನ್ ದೇಖ್ಯುತೋಬಿ ಇನ ಶನು ಲುಕ್ಷಾನ್‌ಬಿ ಕೊಹುಯುನಿ. ಅನ ದೇಖ್ಯೂತೆ ಇವ್ಣೆ ಮನ್‍ಫರೈಲಿನ್ ಆ ಏಕ್‌ ದೇವಸ್‌ಕರಿ ಬೋಲ್ಯು. ಯೋ ಟಾಪುನೊ ಮೋಟೊ ಅಧಿಕಾರಿಮ ಏಕ್‍ಜ಼ಣೊ ಪೋಪ್ಲಿಯಾನು ಖೇತರ್‌ ಗದ್ದೆ ಹಮೆಥಾತೆ ಝ಼ಗೊನ ಖನ್ನೇಸ್‍ಮ ಥೂ. ಯೋ ಹಮೂನ ಸ್ವಾಗತ್ ಕರೀನ್ ತೀನ್ ದನ್‌ಲಗು ಹಮೆ ಇನೇಥಿ ಸತ್ಕಾರ್ ಲಿದ. ಪೋಪ್ಲಿಯಾನೊ ಬಾ ತಾವ್‍ಥೀಬಿ ಲ್ಹೊಯ್ಯವ್‌ಹುಯಿನ್ ಛಾ಼ದ್ರಿ ಧರಿರಾಖ್ಯೊಥೊ.ಪೌಲ ಇನಕನ ಜೈ಼ನ್ ಪ್ರಾರ್ಥನೆ ಕರೀನ್ ಇನ ಮುಡ್‌ಕ್ಯಪರ್ ಹಾತ್‍ಮ್ಹೇಲಿನ್‍ ಅಛ್ಛುಕರ‍್ಯೊ. ಇನಪಾರ್ ಯೋ ಟಾಪನ ಅಜು಼ ಉಭ್‌ರ‍್ಯುತೆ ಖ್ಹಾರುಸ್ ರೋಗಿಬಿ ಪೌಲಕನ ಐನ್ ಗುಣ್‌ಹುಯು. ಇವ್ಣೆ ಹಮೂನ ಜಾ಼ಖ್ಹತ್ ಮರ್ಯಾದಿ ದಿದು. ಹಮೆ ಹಿಜ್ಜಾ಼ಥು ಜಾ಼ವನ ಖ್ಹವಾರನಿ ವಖ್ಹ್‌ತೆ ಹಮೂನ ಜ಼ರೂರತ್‌ಥೂತೆ ಖ್ಹಾರು ಚೀಜ಼್ ಲಯಿನ್ ದಿದು.
ಮೆಲೀತೇಥು ರೋಮ್‍ನ ಆಯೋತೆ
ತೀನ್ ಮಹಿನಾನ ವಾರ್‌ ಅಲೆಕ್ಸಾಂಡ್ರಿಯಾಥು ಅಯಿನ್ ಯೋ ಟಾಪಾಮ ಠಣ್ಣಾದನ್‍ ಕಾಡಿಮ್ಹೇಲಿಜಾ಼ವನ ಖ್ಹಾಜೆ ಏಕ್‌ ಜ಼ಹಾಜ಼್ನ ಚ಼ಢೀನ್ ಗಯ. ಯೋ ಜ಼ಹಾಜ಼್ನ ಖ್ಹಾಮ್ಣೆ ಗ್ರೀಕ್ ಅವಳಿಜವಳಿ ದೇವ್ತಿನು ಖ್ಹಣೇದ್ ಥು. ಹಮೆ ಸುರಕೂಸ್ ಖ್ಹಯೇರ‍್ನ ಐನ್ ಹಿಜ್ಜಾ಼ ತೀನ್‍ದನ್‍ ಥಾ. ಹಿಜ್ಜಾ಼ಥ ಚಾ಼ಲ್ತ ಹುಯಿನ್ ರೇಗಿಯ ಖ್ಹಯೇರ್‌ಮ ಪೇಶ್ಯ. ಏಕ್‍ದನ್ನ ಬಾದ್ಮ ದಕ್ಷಿಣ್‍ನೊ ವಹಿರೊ ವಾಗಲಗ್ಯೊಥೊ. ಇನಖ್ಹಾಜೆ ಬೇನದನ್ನೆ ಪೊತಿಯೋಲಕರಿ ಖ್ಹಯೇರ್‌ಮ ಆಯ. ಹಮೆ ಹಿಜ್ಜಾ಼ ಥೋಡು ವಿಶ್ವಾಸಿವ್‌ನ ದೇಖ್ಯ. ಇವ್ಣಜೋ಼ಡ್ಮ ಖ್ಹಾತ್ ದನ್‌ತೋಬಿ ರ‍್ಹೇವ್ಣುಕರಿ ಬೋಲಿಲಿದು. ಇನಖ್ಹಾಜೆ ಹಮೆ ರೋಮ್‍ನ ಆಯ. ಹಮೆ ಹಜ಼್ಜ ರ‍್ಹವಾನು ರೋಮ್ಮ ಥೂತೆ ವಿಶ್ವಾಸಿನ ಮಾಲುಮ್ ಪಡ್ಯು. ಹಮೂನ ಮಳಾನಖ್ಹಾಜೆ ಥೋಡುಜ಼ಣು “ಅಪ್ಪಿಯ ನಂಗರ್‌ಲಗು ಅಜು಼ ತ್ರಿಛತ್ರಕರಿ ಝ಼ಗೋಲಗೂಬಿ ಆಯು. ಪೌಲನೆ ಇವ್ಣುನ ದೇಖಿನ್ ದೇವ್ನ ಧನ್ಯವಾದ್‌ಕರೀನ್‌ ಭಾಲಿಥಿ ಹುಮ್ಮಖ್ಹ್‌ ಹುಯೊ.
ರೋಮ್ಮ ಪೌಲ
ಇನಕೇಡೆಥು ಹಮೆ ರೋಮ್‍ನ ಪೋಚಾ಼ನಿವಖ್ಹತೆ, ಪೌಲ ಇನ ದೇಖಿಲ್ಯವಾಳೊ ಏಕ್‍ಶಿಪಾಯಿ ಇನಿ ಜೋ಼ಡ್ಮ ರ‍್ಹಿಯೇಜಾ಼ಯ್ ಕರಿ ಬೋಲಾನು ಹುಕುಮ್‌ ಲಿದೊ. ತೀನ್‍ದನ್‍ ಹುವಾನಪಾರ್ ಪೌಲನೆ ಹಿಜ಼್ಜಾನ ಯೆಹೂದ್ಯರ್‌ನ ಘಲ್ಡಾವ್‌ನ ಏಕ್‌ ಝ಼ಗೊ ಎಕ್ಟು ಬುಲಾಯೊ. ಇವ್ಣೆ ಆವಾಮ ಯೋ ಇವ್ಣುನ, “ಮಾರ ಭೈಯೇವೊ ಮೇ ಅಪ್ಣ ಅದ್ಮಿಥಿ ರ‍್ಹವೊ ಗುರುಗುರಬ್‍ಲ್ಯಥಿ ಆಯೂತೆ ವಿರೋದ್‌ಥಿ ರ‍್ಹವೊ ಶಾತ್‌ ಕರ‍್ಯುಕೊಯ್ನಿ. ಮನ ಯೆರೂಸಲೇಮ್ಮ ಖೈದಿಕರೀನ್ ಧರೀನ್ ರೋಮ್‌ವಾಳಾನ ಹಾತ್ಮ ದ್ಯವಾನಿತರ ಹುಯು. ಇವ್ಣೆ ಮನ ವಿಚಾರ್ ಕರೀನ್, ಮಾರಮ ಮರಣ್ಣಿ ದಂಡನೇನು ಆಪರಾದ್ ಖಿವೂಬಿ ಕೊಂತೆಖ್ಹಾಜೆ ಮನ ಛುಟ್ಕಾರ್ ಕರ್ನುಕರಿ ಥೂ. ಕತೋಬಿ ಯೆಹೂದ್ಯರ್ ವಿರೋದ್ ಕರ‍್ಯುತೆ ಇನಖ್ಹಾಜೆ, ಮೇ ಕೈಸರನ ಖ್ಹಾಮ್ಣೆ ಬೋಲಿಲೇವುಸ್ ಕರಿ ಬೋಲ್ನುಪಡ್ಯುಥು. ಕತೋಬಿ ಮಾರು ಶೊಂತ್‍ ಅದ್ಮಿಪರ್ ಗಲ್ತಿ ನಾಲಗಾಡ್ನುಕರಿ ಬೋಲ್ಯೊಕೊಯ್ನಿ. ಆ ಕಾರ‍ಣ್ಣಾಖ್ಹಾಜೆ ಮೇ ತುಮೂನ ಬೋಲ್ನುಕರಿ ಬುಲೈಮಂಗಯೋತೆ. ಇಸ್ರಾಯೇಲ್ ಅದ್ಮಿನ ವಿಶ್ವಾಸ್ನಖ್ಹಾಜೆ ಆ ಖ್ಹಂಕ್‌ಳಿಥಿ ಭಂದೈರ‍್ಹೋಸ್.” ಕರಿ ಬೋಲ್ಯೊ. ಇವ್ಣೆ ಇನ, “ತಾರಿ ಬಾರೇಮ ಯೂದಾಯಥು ಹಮೂನ ಖಿವು ಚಿಟ್ಟಿಬಿ ಕೋ ಆಯೂನಿ. ನತರ್ ಭೈಯೇವ್‌ಮ ಏಕ್‍ಜ಼ಣೂಬಿ ತಾರಿ ಬಾರೇಮ ಖಿವೂಬಿ ಖರಾಬ್ ವಾತ್ ಖ್ಹಮ್‌ಜಾ಼ಡ್ಯುಬಿ ಕೊಯ್ನಿ ಬೋಲ್ಯುಬಿ ಕೊಯ್ನಿ. ಕತೋಬಿ ತಾರಿ ಸೋಚ್ನ ತಾರ ಮ್ಹೋಡೇಖ್ಹೂಸ್ ಖ್ಹಮ್‌ಜಾ಼ನ ಪಸಂದ್ ಕರ್ಯೆಸ್. ಶನಕತೊ ಅಖ್ಖೂಸ್ ಅದ್ಮಿಖ್ಹಾರು ಆ ಝೂ಼ಂಡ್‌ಮ ಕ್ರಿಸ್ತನು ವಿರೋದ್ ಕರೀನ್ ವಾತೆ ಬೋಲುಕರಸ್‍ಕರಿ ಹಮೂನ ಮಾಲುಮ್” ಕರಿ ಬೋಲ್ಯು. ಇನಖ್ಹಾಜೆ ಪೌಲ ಅಜು಼ ಇವ್ಣೆ ಸಭೆ ಮಳಾನ ಏಕ್‍ದನ್ ಖ್ಹಣೇದ್‍ಕರ‍್ಯು, ಯೋ ರೋಜ಼್ಮ ಕೈಯೆಕ್ಕಿ ಜ಼ಣು ಪೌಲನ ಘರ್ಮ ಘಣಿ ಗಣ್ತೀಥಿ ಸಬೆಮಳ್ಯು. ಇನೆ ವ್ಹಾಣೇಥು ಖ್ಹಾಂಜ಼್‌‌ಲಗು ದೇವ್ನ ರಾಜ್ಯನಿ ಬಾರೇಮ ಇನಿ ವಾತೇನ ಇವ್ಣುನ ಸಾಕ್ಷಿನ ಬೋಲ್ತೊಹುಯಿನ್.ಅಜು಼ ಮೋಶೇನು ಧರ್ಮಶಾಸ್ತ್ರ ಪ್ರವಾದಿನು ದಪ್ತರ್‌ನ ಆಧಾರ್ ಲಿದೊ. ಯೇಸುನಿ ಬಾರೇನಿ ವಾತೆಮ ಇವ್ಣುನ ವಿಶ್ವಾಸ್ ರಾಖಾನಿಘೊಣಿ ಕೋಶಿಶ್ ಕರ‍್ಯೊ. ಅನಖ್ಹಾಜೆ ಇನೆ ಪೌಲನೆ ಬೋಲ್ಯೊತೆ ಥೋಡಿ ವಾತೆನ ಥೋಡಜ಼ಣ ಯೆಹೂದ್ಯರ್‌ನೆ ಮಾನಿಲಿದು. ಕತೋಬಿ ಥೋಡಾನೆ ವಿಶ್ವಾಸ್ ಕರ‍್ಯುಕೊಯ್ನಿ. ಇವ್ಣಾಮ ವಗ್ಗುಟ್‌ಕೊಂತೆ ವಳಿಜಾ಼ತುಥೂತೆ ದೇಖಿನ್ ಖ್ಹರ್ತಿಮ ಪೌಲನೆ ಇವ್ಣುನ ಪವಿತ್ರಾತ್ಮನೆ ಪ್ರವಾದಿ ಹುಯಿರೋತೆ ಯೆಶಾಯಥಿ ಗುರುಗುರಬ್‍ಲ್ಯನ ಖ್ಹಾರಾನ ಖ್ಹಾಚ಼ನ ಬಾರೇಮ ಬೋಲ್ತೊ ಹುಯಿನ್, ‘ತೂ ಆ ಅದ್ಮಿಕನ ಜೈ಼ನ್ ಇವ್ಣುನ ‘ತುಮೆ ಖನ್ನೆ ರ‍್ಹೀನ್ ಖ್ಹಮ್‍ಜ್ಯುತೋಬಿ ಮಾಲುಮ್ ಕರಾಸ್ ಕೊಯ್ನಿ; ಡೋಳ ರ‍್ಹೀನ್ ದೇಖ್ಯತೋಬಿ ಪರ್‌ಖ್ಯಾಕೊಯ್ನಿ. ಶನಕತೊ, ಆ ಅದ್ಮಿನು ದಿಲ್‌ ಬಂಡೊ ಹುಯಿಗಯು; ಇವ್ಣು ಕಾನ್‌ ರ‍್ಹಯುತೋಬಿ ಕಾನ್‌ಖ್ಹಾರು ಮೂಚಿರಾಖ್ಯುಸ್ ಖ್ಹಾಚು಼ ರ‍್ಹಯುತೋಬಿ ದೇಖಾನ ಮನ್ ಕರಾಕೊಯ್ನಿ, ನತರ್ ಅವ್ಣೆ ಡೋಳೇಥಿ ದೇಖ್ಯುಹೋತ್ತ್‌, ಕಾನ್‍ಥಿ ಖ್ಹಮ್‍ಜ್ಯುಹೋತ್, ಮನ್‍ಲಗಾಡಿನ್ ಮಾಲುಮ್ ಕರ‍್ಯುಹೊತ್, ಮಾರಭಣಿ ಫರಿಗಯುಹೊತ್; ಮಾರೇಥಿ ಅಛ್ಛು಼ ಹುಯಿಗುಹೊತ್.1 ತದೆ ಪೌಲನೆ ದೇವ್ನು ಆ ರಕ್ಷಣೆನ ಯೆಹೂದ್ಯರ್‌ಕಾಹೆತೆ ಇವ್ಣುನ ಬೋಲಿ ಮೊಕ್‍ಲೈರ‍್ಹುಸ್‍ ಕರಿ ತುಮೂನ ಅಛ್ಛಿನಿತರ ಮಾಲುಮ್ ರ‍್ಹವಾದೆ; ಕರಿ ಬೋಲಿನ್ ಇನಿ ವಾತೆನ ಖ್ಹರ್ತಿಕರ‍್ಯೊ. ಇನೆ ಆ ವಾತೆನ ಬೋಲಾನ ಪಾರ್ ಯೆಹೂದ್ಯರ್ ಘಣು ಖರಾಬ್‌ಥಿ ವಿವಾದ್ ಕರ್ತುಹುಯಿನ್ ಚ಼ಲೀಗು.2 ಇನಕೇಡೆಥು ಯೋಸ್ ಭಾಡು ಲೀರಾಖ್ಯೊಥೊತೆ ಘರ್ಮ ಬೇ ವರಖ್ಹ್‌ಲಗು ರ‍್ಹೀನ್, ಇನಕನ ಆವಾಳಾನ ಖ್ಹಾರಸ್ನ ಸ್ವಾಗತ್ ಕರೀನ್ ಬುಲೈಲೇತೊಥೊ. ತದೆ ಇನೆ ಘಣುಭಾಲಿಥಿ ಅಜು಼ ಖಿವಿ ಅಡ್ಡಿಕೊಂತೆ; ದೇವ್ನು ರಾಜ್ಯನಿ ಬಾರೇಮ ಉಪದೇಶ್ ಕರ್ತೊಹುಯಿನ್ ಪ್ರಭು ಯೇಸುಕ್ರಿಸ್ತನಿ ಬಾರೇನಿ ವಾತೇನ ಬೋಧನೆ ಕರ್ತೊರ‍್ಹಿಯೊ.
Source notes (2)
- Footnote 26ಅಜು಼ 27ನು ವಚನಾನ ಯೆಶಾಯ 6,9,10ನು ವಚನಾಥು ಚೂ಼ಣಿರಾಖ್ಯುಸ್
- Footnote ಥೋಡಿ ಚಿಟ್ಟೀಮ 29 ವಚನ್ ಕೊಯ್ನಿ
ದೇವ್ನಿ ಖ್ಹಾಚಿ ವಚನ್. Copyright © 2023 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.